ຕອນເຊົ້າວັນທີ່ 30 ສິງຫາ 2022 ສະພາປະຊາຊົນແຂວງ ຫລວງນ້ຳທາ ເປີດກອງປະຊຸມປຶກສາຫາລື ກ່ຽວກັບການສ້າງບົດບັນທຶກຊ່ວຍຈຳການຮ່ວມມືໄມຕີຈິດມິດຕະພາບລະຫວ່າງ ສະພາປະຊາຊົນແຂວງຫລວງນ້ຳທາ ກັບຄະນະກຳມະການປະຈຳສະພາຜູ້ແທນປະຊາຊົນແຂວງຢູນນານ ແຫ່ງສາທາລະນະລັດປະຊາຊົນຈີນ ໂດຍເປັນປະທານຂອງທ່ານ ມີໄຊ ມີວິໄລ ກຳມະການຄະນະປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ ເຂົ້າຮ່ວມຂອງທ່ານ ເພັດມະໂນ ໄຊຍະທິ ຫົວໜ້າຂະແໜງພົວພັນຕ່າງປະເທດ , ມີຄະນະເລຂາທິການ, ຫົວໜ້າຂະແໜງ, ​ພ້ອມດ້ວຍວິຊາການທີ່ກ່ຽວຂ້ອງ ເຂົ້າຮ່ວມ 10 ກວ່າຄົນ.

ອິງໃສ່ແນວທາງນະໂຍບາຍການຕ່າງປະເທດ ຂອງສອງພັກ-ສອງລັດຖະບານ ແລະ ເພື່ອຮັດແໜ້ນ, ພັດທະນາສາຍພົວພັນມິດຕະພາບອັນເປັນມູນເຊື້ອ ລະຫວ່າງ ສາທາລະນະລັດປະຊາທິປະໄຕປະຊາຊົນລາວ ແລະ ສາທາລະນະລັດປະຊາຊົນຈີນ ໃຫ້ກ້າວຂື້ນອິກບາດກ້າວໜຶ່ງ, ຊູກຍູ້ການແລກປ່ຽນຮ່ວມມືລະຫວ່າງ ອົງການຕົວແທນທ້ອງຖິ່ນຂອງສອງຝ່າຍ, ຈັດຕັ້ງປະຕິບັດແຜນແມ່ບົດວ່າດ້ວຍການຮ່ວມມືລາວ-ຈີນ, ຈຶ່ງໄດ້ເປັນເອກະພາບກັນກ່ຽວກັບການສ້າງສາຍພົວພັນຮ່ວມມືໄມຕີຈິດ ແລະ ພ້ອມກັນລົງນາມໃນບົດບັນທຶກຊ່ວຍຈຳ; ຊື່ງພິທີເຊັນບົດບັນທຶກຮ່ວມແມ່ນຄາດຈະເປີດຂື້ນໃນກາງເດືອນຕຸລາ 2022 ນີ້;  ກອງປະຊຸມຄັ້ງນີ້ ສະພາປະຊາຊົນແຂວງ ຮ່ວມ ພະແນກການຕ່າງປະເທດແຂວງ ໄດ້ຄົ້ນຄວ້າ, ປຶກສາຫາລືແລກປ່ຽນບົດຮຽນ, ປະກອບຄຳຄິດເຫັນຢ່າງກົງໄປກົງມາ ເພື່ອກຽມຄວາມພ້ອມຮອບດ້ານ, ເປັນຕົ້ນ ທາງດ້ານເນື້ອໃນ, ພິທີການອື່ນໆ ເພື່ອຮັບປະກັນໃຫ້ການເຊັນບົດບັນທຶກສຳຄັນດັ່ງກ່າວ ໄດ້ເປີດຂື້ນຕາມກຳນົດເວລາ, ຖຶກຕ້ອງສອດຄ່ອງກັບລະບຽບການພົວພັນກັບຕ່າງປະເທດ, ເວົ້າລວມເວົ້າສະເພາະແມ່ນການຮ່ວມມືລະຫວ່າງ ຄະນະປະຈຳສະພາປະຊາຊົນແຂວງຫລວງນ້ຳທາ ແຫ່ງ ສາທາລະນະລັດປະຊາທິປະໄຕປະຊາຊົນລາວ ແລະ ຄະນະກຳມະການປະຈຳສະພາຜູ້ແທນປະຊາຊົນແຂວງຢູນນານ ແຫ່ງ ສາທາລະນະລັດປະຊາຊົນຈີນ ໃຫ້ເປັນຮູບປະທຳຍິ່ງໆຂຶ້ນ.