ເພື່ອເອກະພາບດ້ານເນື້ອໃນທີ່ຈະນໍາເຂົ້າກອງປະຊຸມສະໄໝສາມັນເທື່ອທີ8 ຂອງສະພາປະຊາຊົນແຂວງ ຫລວງນ້ຳທາ (ສພຂ) ແລະ ເຊັນບົດບັນທຶກຮ່ວມ ໃນຕອນເຊົ້າວັນທີ 6 ພະຈິກ 2024 ທີ່ຫ້ອງປະຊຸມ ສພຂ  ໄດ້ເປີດກອງປະຊຸມປຶກສາຫາລືເນື້ອໃນທີ່ຈະນຳເຂົ້າກອງປະຊຸມສະໄໝສາມັນເທື່ອທີ່8 ຂອງ ສພຂ ແລະ ພິທີເຊັນສັນຍາລະຫວ່າງ ສພຂ ກັບ ອົງການປົກຄອງແຂວງ ຂຶ້ນທີ່ຫ້ອງປະຊຸມ ສພຂ ໂດຍພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານ ສພຂ ໃຫ້ກຽດເຂົ້າຮ່ວມຂອງທ່ານ ອ່ອນຈັນ ຄຳພາວົງ ຮອງເຈົ້າແຂວງໆຫລວງນ້ຳທາ, ມີສະມາຊິກ ສພຂ, ຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງ, ສານປະຊາຊົນແຂວງ, ອົງການໄອຍະການ, ກອງບັນຊາການປ້ອງກັນຄວາມສະຫງົບແຂວງ ພ້ອມດ້ວຍພະນັກງານວິຊາການເຂົ້າຮ່ວມ 35 ທ່ານ, ຍິງ 7 ທ່ານ.

ໃນວາລະທີ1 ໄດ້ຈັດພິທີເຊັນບົດບັນທຶກຮ່ວມ ລະຫວ່າງ ສພຂ ກັບ ອົງການປົກຄອງແຂວງ ຂຶ້ນຢ່າງເປັນທາງການ ຊຶ່ງນັບແຕ່ມີການເລືອກຕັ້ງສະພາປະຊາຊົນແຂວງຊຸດທີ I ໃນປີ 2016, ສະພາປະຊາຊົນແຂວງຫຼວງນໍ້າທາ ກໍໄດ້ເອົາໃຈໃສ່ເຄື່ອນໄຫວ ແລະ ປະຕິບັດໜ້າທີ່ໃນການເປັນຕົວແທນແຫ່ງສິດ, ຜົນປະໂຫຍດຂອງປະຊາຊົນບັນດາເຜົ່າໃນອຂບເຂດທົ່ວແຂວງ ໂດຍປະຕິບັດ ສາມ ພາລະບົດບາດຫຼັກຄື: ດ້ານນິຕິກໍາ, ການຕົກລົງບັນຫາສໍາຄັນພື້ນຖານຂອງແຂວງ ແລະ ການຕິດຕາມກວດກາ; ຜ່ານການຈັດຕັ້ງປະຕິບັດເນື້ອໃນບົດບັນທຶກໄລຍະເວລາ 7 ປີ, ປັດຈຸບັນ ເຫັນວ່າມີບາງເນື້ອໃນ ບາງມາດຕາ ບໍ່ສອດຄ່ອງກັບສະພາບການຕົວຈິງ ເນື່ອງຈາກກົດໝາຍມີການປັບປຸງ, ສະພາບໃນໄລຍະໃໝ່ມີການປ່ຽນແປງ ຈຶ່ງມີຄວາມຈໍາເປັນຕ້ອງໄດ້ປັບປຸງບາງເນື້ອໃນ ໃຫ້ຖືກຕ້ອງ, ສອດຄ່ອງກັບກົດໝາຍ ແລະ ສະພາບການໃນປັດຈຸບັນ, ຈຶ່ງໄດ້ປັບປຸງ ແລະ ລົງນາມຄືນ ເພື່ອເຮັດໃຫ້ສິດ, ໜ້າທີ່, ພາລະບົດບາດ  ແລະ ການເຄື່ອນໄຫວວຽກງານຮ່ວມກັນຂອງສອງອົງການ ມີຄຸນນະພາບ ແລະ ໄດ້ຮັບປະສິດທິຜົນດີຂຶ້ນ;

ພ້ອມດຽວກັນ ໃນວາລະທີ2 ຍັງໄດ້ມີການປຶກສາຫາລື ແລະ ເອກະພາບບັນດາເນື້ອໃນທີ່ຈະນຳເຂົ້າກອງປະຊຸມສະໄໝສາມັນເທື່ອທີ8 ຂອງ ສພຂ, ເປັນຕົ້ນ; ວຽກງານຂອງອົງການປົກຄອງແຂວງ; ວຽກງານຂອງອົງການກວດກາລັດ ແລະ ກວດສອບແຫ່ງລັດ; ວຽກງານຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ແລະ ວຽກງານຂອງສະພາປະຊາຊົນແຂວງ; ນອກນັ້ນ ຜູ້ແທນເຂົ້າຮ່ວມກອງປປະຊຸມຍັງໄດ້ສຸ່ມໃສ່ປະກອບຄໍາຄິດເຫັນໃສ່ບັນດາເນື້ອໃນທີ່ຈະນໍາເຂົ້າພິຈາລະນາໃນກອງປະຊຸມ ສພຂ ຢ່າງມີຈຸດສຸມເພື່ອເຮັດໃຫ້ເນື້ອໃນມີຄວາມຖຶກຕ້ອງສອດຄ່ອງສົມບຸນ, ສາມາດນຳເຂົ້າພິຈາລະນາໃນກອງປະຊຸມດັ່ງກ່າວໃຫ້ທ່ວງທັນກັບເວລາ;

ຕອນທ້າຍທ່ານ ອ່ອນຈັນ ຄຳພາວົງ ຮອງເຈົ້າແຂວງ ຍັງໄດ້ມີຄຳເຫັນ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄວາມເປັນເອກະພາບບັນດາເນື້ອໃນທີ່ຈະນໍາເຂົ້າພິຈາລະນາໃນກອງປະຊຸມ ສພຂ ແລະ ສະແດງຄວາມຊົມເຊີຍຕໍ່ບົດບັນທຶກຮ່ວມທັງສອງພາກສ່ວນ ເພື່ອໃຫ້ມີຄວາມສະດວກ, ຖຶກຕ້ອງສອດຄ່ອງໃນການຈັດຕັ້ງປະຕິບັດວຽກງານ, ພ້ອມທັງ ຮຽກຮ້ອງໃຫ້ພາກສ່ວນທີ່ຮັບຜິດຊອບດ້ານເນື້ອໃນ,​ ໂດຍສະເພາະການສ້າງນິຕິກໍາລຸ່ມກົດໝາຍ ໃຫ້ຮີບຮ້ອນປັບປຸງໃຫ້ສໍາເລັດ, ໃຫ້ທັນພິຈາລະນາ ໃນກອງປະຊຸມຄັ້ງນີ້ຕາມຄາດໝາຍທີ່ວາງໄວ້

ໂດຍ ນາງ ວັນນີ ແຝງບົວວັນ