ຕອນເຊົ້າຂອງວັນທີ 19 ທັນວາ 2023 ນີ້ ຢູ່ທີຫ້ອງປະຊຸມຂອງສະພາປະຊາຊົນແຂວງ ໄດ້ເປີດກອງປະຊຸມ ປະເມີນຜົນສະເພາະກ່ອນການແຕ່ງຕັ້ງໃຫ້ດຳລົງຕຳແໜ່ງໃໝ່ ຂອງພະນັກງານ-ລັດຖະກອນ ພາຍໃນສະພາປະຊາຊົນແຂວງ ຕຳແໜ່ງປະເພດ 5 – 6 ຂື້ນທີ່ຫ້ອງປະຊຸມຂອງສະພາປະຊາຊົນແຂວງ ໂດຍການເປັນປະທານຂອງ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ ໃຫ້ກຽດເຂົ້າຮ່ວມມີຄະນະປະຈຳສະພາປະຊາຊົນແຂວງ, ຄະນະເລຂາທິການສະພາປະຊາຊົນແຂວງ, ຫົວໜ້າຂະແໜງ, ຮອງຫົວໜ້າຂະແໜງ ພ້ອມທັງພະນັກງານລັດຖະກອນພາຍໃນສະພາປະຊາຊົນແຂວງ ເຂົ້າຮ່ວມທັງໝົດ 30 ທ່ານ, ຍິງ 17 ທ່ານ.

ໃນກອງປະຊຸມ ທ່ານ ມີໄຊ ມີວິໄລ ກຳມະການປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ ໄດ້ຂຶ້ນຜ່ານດຳລັດ ສະບັບເລກທີ 461/ລບ ລົງວັນທີ 9 ຕຸລາ 2012 ວ່າດ້ວຍມາດຕະຖານຕຳແໜ່ງບໍລິຫານຂອງລັດຖະກອນແຫ່ງ ສ ປປ ລາວ ແລະ ຂໍ້ຕົກລົງຂອງຄະນະເລຂາທິການສະພາປະຊາຊົນແຂວງຫລວງນໍ້າທາ ວ່າດ້ວຍການແຕ່ງຕັ້ງຄະນະຮັບຜິດຊອບການປະເມີນຜົນສະເພາະກ່ອນການແຕ່ງຕັ້ງໃຫ້ດຳລົງຕຳແໜ່ງໃໝ່ຂອງພະນັກງານ-ລັດຖະກອນພາຍໃນສະພາປະຊາຊົນແຂວງ ສະບັບເລກທີ 746/ຄລຂ.ສພຂ ລົງວັນທີ 18/12/2023

ພ້ອມດຽວກັນນັ້ນ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ ຍັງໄດ້ມີຄຳເຫັນເນັ້ນໜັກຕໍ່ພະນັກງານລັດຖະກອນ ໃນການທາບທາມບຸກຄະລາກອນຂອງສະພາປະຊາຊົນແຂວງ ທີ່ຈະດຳລົງຕຳແໜ່ງປະເພດ 5-6 ພາຍໃນສະພາປະຊາຊົນແຂວງ ຕ້ອງປະເມີນເອົາບຸກຄະລາກອນຜູ້ທີ່ມີຄວາມຮູ້, ຄວາມສາມາດ, ມາດຖານເງື່ອນໄຂທີ່ຄົບຖ້ວນ ແລະ ໃຫ້ຄະແນນແຕ່ລະມາດຖານດ້ວຍຄວາມໂປ່ງໃສ ແລະ ຍຸຕິທຳ ເພື່ອໃຫ້ໄດ້ບຸກຄະລາກອນຜູ້ທີ່ມີຄວາມຮູ້ຄວາມສາມາດມາດຳລົງຕຳແໜ່ງດັ່ງກ່າວ ທັງນີ້ກໍເພື່ອຮັບປະກັນໃຫ້ວຽກງານມີຄວາມສະດວກ, ວ່ອງໄວ ຮັບປະກັນຄຸນນະພາບດີຂຶ້ນກວ່າເກົ່າ; ພ້ອມດຽວກັນ ພະນັກງານລັດຖະກອນພາຍໃນສະພາປະຊາຊົນແຂວງ ໄດ້ພ້ອມກັນລົງຄະແນນປະເມີນເອົາບຸກຄະລາກອນຂອງສະພາປະຊາຊົນແຂວງ ທີ່ຈະດຳລົງຕຳແໜ່ງປະເພດ 5-6  ເຊິ່ງບຸກຄະລາກອນນຳມາປະເມີນຂຶ້ນເປັນປະເພດ 5 ໃນຄັ້ງນີ້ ມີທັງໝົດ 5 ທ່ານ  ແລະ ປະເມີນຂຶ້ນເປັນປະເພດ 6 ມີທັງໝົດ 11 ທ່ານ.

ໂດຍ ນາງ ອຳພອນ ສີປະເສີດ