ກອງປະຊຸມປະເມີນຜົນການຈັດຕັ້ງການປະຕິບັດລັດຖະທໍາມະນູນ ແຫ່ງ ສປປ ລາວ ສະບັບປີ 2015 ໄດ້ຈັດຂື້ນໃນວັນທີ 23 ກໍລະກົດ 2024 ທີ່ຫ້ອງປະຊຸມສະພາປະຊາຊົນແຂວງວຽງຈັນ ໂດຍການເປັນປະທານ ຂອງ ທ່ານ ນາງ ຈັນທະຄອນ ສີອໍາພອນ ກໍາມະການພັກແຂວງ ຮອງປະທານສະພາປະຊາຊົນແຂວງ ເຂົ້າຮ່ວມມີ ປະທານ, ຮອງປະທານຄະນະກໍາມະການ,ປະທານ,ຮອງປະທານສານປະຊາຊົນແຂວງ ແລະ ຫົວໜ້າ-ຮອງຫົວໜ້າອົງການໄອຍະການປະຊາຊົນແຂວງ ພ້ອມດ້ວຍພະນັກງານຫຼັກແຫຼ່ງຂອງສານ ແລະ ໄອຍະການແຂວງມີຫົວໜ້າ-ຮອງຫົວໜ້າຂະແໜງພາຍໃນສະພາປະຊາຊົນແຂວງວຽງຈັນ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການຂື້ນຜ່ານບົດປະເມີນການຈັດຕັ້ງປະຕິິບັດລັດຖະທໍາມະນູນ ແຫ່ງ ສປປ ລາວ ສະບັບປີ 1015 ( ໄລຍະ 2015 ຫາ 2024) ສະເໜີໂດຍ ທ່ານ ບຸນນໍາ ຈັນທອງສີ ປະທານຄະນະກໍາມະການຍຸຕິທໍາ ແລະ ປກຊ-ປກສ ເຊິ່ງທ່ານໄດ້ຍົກໃຫ້ເຫັນຄວາມໝາຍຄວາມສໍາຄັນຂອງ ລັດຖະທໍາມະນູນສະບັບທໍາອິດຂອງ ສປປ ລາວ ໄດ້ຖຶກຮັບຮອງ ແລະ ປະກາດໃຊ້ຢ່າງເປັນທາງການ ໃນ ປີ 1991, ມາຮອດປັດຈຸບັນ ເປັນເວລາ 33 ປີ ໃນໄລຍະຜ່ານມາ ກໍໄດ້ມີການປັບປຸງ 2 ຄັ້ງຄື: ການປັບປຸງປີ 2003 ແລະ ປີ 2015 ລັດຖະທໍາມະນູນ ສະບັບປີ 2015 ມາຮອດປັດຈຸບັນ ກໍ່ເປັນເວລາ 9 ປີ ຊື່ງໄດ້ເປັນກົດໝາຍພື້ນຖານສໍາຄັນຂອງປະເທດຊາດ, ເປັນບ່ອນອີງໃຫ້ແກ່ການສ້າງ ແລະ ປັບປຸງກົດໝາຍ ເພື່ອເປັນເຄື່ອງມືຂອງລັດໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ແລະ ສ້າງເງື່ອນໄຂພື້ນຖານໃຫ້ແກ່ການສ້າງລັດປະຊາທິປະໄຕປະຊາຊົນລາວຂອງພວກເຮົາ ໃຫ້ເປັນລັດທີ່ປົກຄອງດ້ວຍກົດໝາຍ ໃຫ້ດີຂື້ນເທື່ອລະກ້າວ.ພ້ອມນັ້ນບັນດາທ່ານທີເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບເພື່ອສຸມໃສ່ຄົ້ນຄວ້າປະກອບຄໍາຄິດຄໍາເຫັນບັນດາເນື້ອໃນຂອງລັດຖະທໍາມະນູນ ສະບັບ ປີ 2015 ໃຫ້ແທດເໜາະກັບຄວາມເປັນຈິງ, ຍົກໃຫ້ເຫັນດ້ານດີ, ດ້ານອ່ອນ, ຂໍ້ສະດວກ, ຂໍ້ຫຸຍ້ງຍາກແລະ ວີທີແກ້ໄຂຢ່າງຊັດເຈນ ເພື່ອປັບປຸງເນື້ອໃນຂອງລັດຖະທໍາມະນູນ ສະບັບປີ 2015 ທີ່ຍັງບໍ່ທັນສອດຄອງ ໃຫ້ມີເນື້ອໃນທີ່ຖຶກຕ້ອງ ຄົບຖ້ວນ, ສອດຄອງກັບໜ້າທີການເມືອງຂອງພັກ ແລະ ລັດເຮົາໃນໄລຍະໃໜ່ໃຫ້ກາຍເປັນກົດໝາຍພື້ນຖານສໍາຄັນຂອງປະເທດຊາດ, ເປັນບ່ອນອີງໃຫ້ ແກ່ການສ້າງ ແລະ ປັບປຸງບັນດາກົດໝາຍ ໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ.
ພາບ-ຂ່າວ ບູລາຕີ ແສນທະວົງ