ຕອນເຊົ້າວັນທີ 24 ພຶດສະພາ 2023 ທີ່ຫ້ອງປະຊຸມສະພາປະຊາຊົນແຂວງຫລວງນ້ຳທາ ໄດ້ເປີດກອງປະຊຸມປະເມີນ ແລະ ຄົ້ນຄວ້າທາບທາມ ເນື້ອໃນກົດໝາຍວ່າດ້ວຍການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊົນຊົນແຂວງ ເພື່ອປັບປຸງ ພາຍໃຕ້ການເປັນປະທານຂອງທ່ານ ກົງເພັດ ແກ້ວບົວພາ ກຳມະການພັກແຂວງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ຮອງປະທານສະພາປະຊາຊົນແຂວງ ມີບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ,ຮອງຫົວໜ້າພະແນກການຂອງເເຂວງ, ສອງກຳລັງ ປກຊ-ປກສ ແຂວງ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 28 ທ່ານ.
ກອງປະຊຸມບັນດາທ່ານຜູ້ແທນກອງປະຊຸມໄດ້ປະກອບຄຳຄິດເຫັນຕໍ່ກັບການຄົ້ນຄວ້າ ປັບປຸງກົດໝາຍວ່າດ້ວຍ ການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຊຶ່ງກົດໝາຍທັງ 2 ສະບັບ ແມ່ນໄດ້ປັບປຸງລ່າສຸດໃນຄັ້ງວັນທີ 15 ພະຈິກ 2016 ແລະ ໄດ້ລວມເຂົ້າກັນມາເປັນກົດໝາຍວ່າດ້ວຍ ການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊົນຊົນແຂວງ ຜ່ານການຈັດຕັ້ງປະຕິບັດຜ່ານມາ ກົດໝາຍສະບັບດັ່ງກ່າວແມ່ນໄດ້ກາຍເປັນເຄື່ອງມື, ເປັນບ່ອນອີງ ໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ ສາມາດຈັດຕັ້ງເຄື່ອນໄຫວວຽກງານໄດ້ເປັນຢ່າງດີ; ແຕ່ມາໃນສະພາແຫ່ງຊາດຊຸດທີ 9 ໄດ້ຮັບການປັບປຸງກົງຈັກຕ່າງໆ ຈຶ່ງເຮັດໃຫ້ກົດໝາຍບາງມາດຕາ ຕ້ອງໄດ້ຮັບກາບປັບປຸງໃຫ້ສອດຄ່ອງກັບສະພາບການພັດທະນາເສດຖະກິດ-ສັງຄົມໃນປັດຈຸບັນ ແລະ ຈຳເປັນໄດ້ຄົ້ນຄວ້າປະເມີນຜົນການຈັດຕັ້ງປະຕິບັດ ເພື່ອເປັນພື້ນຖານໃຫ້ແກ່ການທາບທາມ ການປັບປຸງ ກົດໝາຍດັ່ງກ່າວເປັນຕົ້ນ; ໃນມາດຕາ2 ການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນແຂວງ; ມາດຕາ7 ປະເພດການຕິດຕາມກວດກາ; ມາດຕາ8 ຄວາມຮັບຜິດຊອບໃນການຕິດຕາມກວດກາ; ມາດຕາ9 ການເຂົ້າຮ່ວມໃນການຕິດຕາມກວດກາ; ມາດຕາ10 ການແກ້ໄຂຜົນຕິດຕາມກວດກາ; ສຳລັບການຕິດຕາມກວດກາຂອງສະພາແຫ່ງຊາດແມ່ນໃນມາດຕາ 19, ມາດຕາ 23 ແລະ ການຕິດຕາມກວດກາຂອງສະພາປະຊາຊົນແຂວງ ໃນມາດຕາ 52, 54, 55, 60, 64,65,70 ທັງນີ້ ກໍເພື່ອເປັນພື້ນຖານໃນການທາບທາມຄວາມເຫັນ ໃຫ້ມີຄວາມກວ້າງຂວາງ ແລະ ເລິກເຊີ່ງ ຊຶ່ງຈະເຮັດໃຫ້ການຄົ້ນຄວ້າປັບປຸງກົດໝາຍໃນຄັ້ງນີ້ ໃຫ້ມີຄຸນນະພາບ ແລະ ສາມາດຈັດຕັ້ງປະຕິບັດໄດ້ໃນພຶດຕິກຳຕົວຈິງ.
