ວັນທີ 01 ກຸ່ມພາ 2022 ນີ້ຢູ່ທີ່ຫ້ອງປະຊຸມສະພາປະຊາຊົນແຂວງບໍ່ແກ້ວໄດ້ຈັດກອງປະຊຸມປະຈຳປີ 2021 ຂອງສະມາຊິກສະພາແຫ່ງປະຈຳເຂດເລືອກຕັ້ງທີ 5 ແຂວງບໍ່ແກ້ວ. ໂດຍການເປັນປະທານຂອງ ທ່ານ ຈອມສີ ລັດຕະນະປັນ ຮອງເລຂາພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 5 ແຂວງບໍ່ແກ້ວ, ປະທານສະພາປະຊາຊົນແຂວງ, ເປັນກຽດເຂົ້າຮ່ວມຂອງທ່ານ ປອ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງເຈົ້າແຂວງໆບໍ່ແກ້ວ, ທ່ານ ນ.ທຸມມາລີ ວົງພະຈັນ ກຳມະການຄະນະປະຈໍາສະພາແຫ່ງຊາດ, ປະທານກໍາມາທິການວັດທະນະທໍາ-ສັງຄົມ, ມີສະມາຊິກສະພາປະຊາຊົນແຂວງ ແລະ ແຂກຖືກເຊີນເຂົ້າຮ່ວມ.
ເພື່ອເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ການຈັດຕັ້ງປະຕິບັດມະຕິກອງປະຊຸມ ຂອງຄະນະສະມາຊິກສະພາແຫ່ງຊາດ ຊຸດທີ IX ຄະນະສສຊແລະພະນັກງານ-ລັດຖະກອນ ປະຈຳເຂດເລືອກຕັ້ງທີ 5 ຍັງຮັກສາໄດ້ດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ມີແນວຄິດອຸ່ນອຽນທຸ່ນທ່ຽງເຊື່ອໝັ້ນຕໍ່ແນວທາງນະໂຍບາຍປ່ຽນແປງໃໝ່ຮອບດ້ານແລະມີຫຼັກການຂອງພັກມີຄວາມສາມັກຄີຊ່ວຍເຫຼືອຊຶ່ງກັນ ແລະ ກັນ, ມີສະຕິຕໍ່ການ ຈັດຕັ້ງ ແລະ ມີຄວາມຮັບຜິດຊອບສູງຕໍ່ວຽກງານວິຊາສະເພາະທີ່ຂັ້ນເທິງມອບໝາຍໃຫ້
ໃນກອງປະຊຸມໄດ້ຮັບຮອງເອົາບົດລາຍງານການຈັດຕັ້ງປະຕິບັດການເຄື່ອນໄຫວວຽກງານປະຈໍາປີ 2021 ແລະ ທິດທາງແຜນການ 2022 ຄະນະສສຊປະຈຳເຂດເລືອກຕັ້ງທີ 5 ແຂວງບໍ່ແກ້ວໃນການຈັດຕັ້ງປະຕິບັດວຽກຕາມ 3 ພາລະບົດບາດ ທີ່ໄດ້ກຳນົດໄວ້ໃນກົດໝາຍ ແລະ ມີຜົນ ສຳເລັດຄື: ດ້ານນິຕິບັນຍັດ ແລະ ນິຕິກຳ, ກອງປະຊຸມໄດ້ຮັບຟັງການລາຍງານຫຍໍ້ຜົນສໍາເລັດ ກອງປະຊຸມສະໄໝສາມັນເທື່ອທີ2 ຂອງສະພາແຫ່ງຊາດຊຸດທີIX,ຜ່ານມະຕິຂອງຄະນະປະຈໍາສະພາແຫ່ງຊາດສະບັບເລກທີ162/ຄປຈ, ລົງວັນທີ2/07/2021 ວ່າດ້ວຍການຈັດຕັ້ງແລະການເຄື່ອນໄຫວຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ.ກອງປະຊຸມໄດ້ພ້ອມກັນປະກອບຄໍາເຫັນໃສ່ຮ່າງມະຕິຂອງກອງປະຊຸມປະຈໍາປີ2021ຂອງຄະນະສະມາຊິກສະພາແຫ່ງຊາດ ຊຸດທີIXປະຈໍາເຂດເລືອກຕັ້ງທີ5ແຂວງບໍ່ແກ້ວເພື່ອເຮັດໃຫ້ບົດສະຫຼຸບ ມີເນື້ອໃນທີ່ສົມບູນ ແລະກອງປະຊຸມໄດ້ອັດລົງໃນຕອນບ່າຍຂອງມື້ນັ້ນ.