ຕອນບ່າຍຂອງວັນທີ 23 ທັນວາ 2024 ນີ້ ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ່ 3 ແຂວງຫຼວງນໍ້າທາ ໄດ້ໄຂກອງປະຊຸມປະຈຳປີ 2024 ຂອງຕົນຂຶ້ນຢ່າງເປັນທາງການທີ່ສະໂມສອນຂອງແຂວງ ໂດຍການເປັນປະທານຂອງ ທ່ານ ຄຳຟອງ ອິນມານີ ຮອງເລຂາຄະນະບໍລິຫານງານພັກແຂວງ ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 3 ແຂວງຫຼວງນໍ້າທາ, ປະທານສະພາປະຊາຊົນແຂວງຫຼວງນໍ້າທາ, ໃຫ້ກຽດເຂົ້າຮ່ວມໂດຍ ທ່ານ ພົຕ ປອ ວົງສັກ ພັນທະວົງ ຄະນະປະຈຳສະພາແຫ່ງຊາດ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ່ແຂວງຫຼວງນໍ້າທາ, ມີບັນດາທ່ານ ຄະນະປະຈຳພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ສອງກອງບັນຊາການ, ຫົວໜ້າພະແນກການທີ່ກ່ວຂ້ອງອ້ອມຂ້າງແຂວງ, ອະດີດສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ3 ແຂວງຫຼວງນໍ້າທາ, ເຂົ້າຮ່ວມທັງໝົດ 70 ກວ່າທ່ານ.
ໃນກອງປະຊຸມໄດ້ຜ່ານບົດລາຍງານການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການປະຈຳປີ 2025 ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ ເພື່ອຕີລາຄາຄືນການເຄື່ອນໄຫວວຽກງານປະຈຳປີ 2024 ທາງດ້ານການເມືອງແນວຄິດ, ການຈັດຕັ້ງ ແລະ ບຸກຄະລາກອນ, ການປະຕິບັດ 3 ພາລະບົດບາດຂອງສະພາແຫ່ງຊາດປະຈຳເຂດເລືອກຕັ້ງ, ເປັນຕົ້ນ ດ້ານນິຕິບັນຍັດ, ນິຕິກຳ,ໄດ້ຄົ້ນຄວ້າ, ທາບທາມ ແລະ ປະກອບຄໍາຄິດເຫັນໃສ່ຮ່າງກົດໝາຍຂອງສະພາແຫ່ງຊາດ, ພາກສ່ວນທີ່ກ່ຽວຂ້ອງທີ່ສົ່ງໃຫ້ ໄດ້ທັງໝົດ 22 ສະບັບ, ສ້າງໃໝ່ 4; ຮັບຮອງເອົາໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຈໍານວນ 13 ສະບັບ, ສະໄໝສາມັນເທື່ອທີ 8 ຈຳນວນ 9 ສະບັບ, ທ້ອງຖິ່ນໄດ້ພິຈາລະນາຮັບຮອງເອົາວຽກງານອົງການປົກຄອງແຂວງ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ແລະ ວຽກງານຂອງສະພາປະຊາຊົນແຂວງຕາມມາດຕາ 60 ຂອງກົດໝາຍການປັບປຸງບາງມາດຕາຂອງກົດໝາຍສະພາແຫ່ງຊາດ ແລະ ສະພາປະຊາຊົນແຂວງອອກເປັນມະຕິກໍາຈຳນວນ 4 ສະບັບ, ໄດ້ຄົ້ນຄວ້າພິຈາລະນາຮັບຮອງບັນຫາສໍາຄັນຂອງທ້ອງຖິ່ນໃນກອງປະຊຸມຄະນະປະຈຳສະພາປະຊາຊົນແຂວງແຕ່ລະເດືອນຈຳນວນ 11 ຄັ້ງ ມີ 58 ເນື້ອໃນ ແລະ ອອກເປັນມະຕິຂອງຄະນະປະຈໍາສະພາປະຊາຊົນແຂວງ 16 ສະບັບ ແລະດ້ານຕິດຕາມກວດໄດ້ເອົາໃຈໃສ່ຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍຂອງທ້ອງຖິ່ນ ໄດ້ຕິດຕາມກວດກາຕາມມະຕິກອງປະຊຸມສະໄໝສາມັນເທື່ອທີ5, ເທື່ອທີ6 ແລະຕິດຕາມຮ່ວມກັບກຳມາທິການຂອງສະພາແຫ່ງຊາດ ແລະ ໄດ້ສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ, ພະນັກງານລັດຖະກອນ, ໄດ້ເຂົ້າຮ່ວມຝຶກອົບຮົມ ແລະ ສໍາມະນາຫົວຂໍ້ຕ່າງໆທາງສູນກາງ, ທ້ອງຖິ່ນໄດ້ 62 ຄັ້ງ, ໄດ້ລົງພົບປະຜູ້ມີສິດເລືອກຕັ້ງບັນດາກຸ່ມເປົ້າໝາຍໄດ້ສໍາເລັດຕາມເປົ້າໝາຍ ແລະ ຈະສືບຕໍ່ແຜນການຈັດຕັ້ງປະຕິບັດວຽກງານປະຈຳປີ 2025 ຕາມພາລະບົດບາດ, ສິດໜ້າທີ່ ຂອງສະມາຊິກສະພາແຫ່ງຊາດປະຈໍາເຂດເລືອກຕັ້ງ ໃຫ້ສຳເລັດຕາມຄາດໝາຍທີ່ວາງໄວ້; ນອກນັ້ນ ກອງປະຊຸມຍັງໄດ້ຮັບຟັງຜ່ານຮ່າງມະຕິກອງປະຊຸມ ວ່າດ້ວຍການຮັບຮອງບົດລາຍງານການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການປະຈຳປີ 2025 ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ ແລະ ຜູ້ແທນກອງປະຊຸມໄດ້ປະກອບຄໍາຄິດເຫັນຕໍ່ບົດລາຍງານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ຢ່າງມີຈຸດສຸມ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດໃຫ້ດີຂຶ້ນເປັນກ້າວໆ.
ໂດຍ ນາງ ວັນນີ ແຝງບົວວັນ