(ສພຊ) ກອງປະຊຸມຄະນະສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ໄດ້ເປີດຂຶ້ນໃນວັນທີ 08 ມັງກອນ 2024 ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ, ເຂົ້າຮ່ວມມີທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ພ້ອມດ້ວຍບັນດາການນຳພັກ-ລັດຂັ້ນແຂວງ, ຄະນະ ສສຊ ປະຈໍາເຂດເລືອກຕັ້ງ, ສະມາ ຊິກສະພາປະຊາຊົນແຂວງ (ສສຂ) ແລະ ແຂກຖືກເຊີນຈາກບັນດາພະແນກການກ່ຽວຂ້ອງຂອງແຂວງຈຳນວນໜຶ່ງ.
ກອງປະຊຸມໄດ້ຮັບຟັງບົດສະຫຼຸບການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ປະຈຳປີ 2023 ແລະ ທິດທາງແຜນການວຽກງານປະຈໍາປີ 2024 ສະເໜີໂດຍຮອງປະທານຄະນະ ສສຊ ປະຈຳເຂດເລືອກຕັ້ງທີ 13, ບົດລາຍງານກ່ຽວກັບການຈັດສັນ ແລະ ການຄຸ້ມຄອງ 3 ປະເພດປ່າ ຈາກທ່ານຫົວ ໜ້າພະແນກກະສິກຳ-ປ່າໄມ້ແຂວງ, ບົດລາຍງານກ່ຽວກັບການຄຸ້ມຄອງ ແລະ ການສົ່ງເສີມການລົງທຶນພາຍໃນແຂວງ ຈາກທ່ານຫົວໜ້າພະແນກແຜນການ ແລະ ການລົງທຶນແຂວງ ແລະ ບົດລາຍງານຈາກຜູ້ຕາງໜ້າສາຂາທະນາຄານພາກກາງ ກ່ຽວກັບການຄຸ້ມຄອງອັດຕາການແລກປ່ຽນເງິນຕາພາຍໃນແຂວງສະຫວັນນະເຂດ. ຈາກນັ້ນ, ບັນດາທ່ານ ສສຊ ໄດ້ເປັນເຈົ້າການສຸມສະຕິປັນຍາເຂົ້າໃສ່ການຄົ້ນຄວ້າປະກອບຄໍາຄິດຄໍາເຫັນຢ່າງສ້າງສັນ ແລະ ຊັກຖາມບັນດາພະແນກການຢ່າງກົງໄປກົງມາຕໍ່ບັນຫາທີ່ນຳມາປຶກສາຫາລືໃນກອງປະຊຸມຄັ້ງນີ້ ເຊິ່ງເປັນການສະແດງໃຫ້ເຫັນຄວາມຮຽກຮ້ອງຕ້ອງ ການ ແລະ ຄວາມມຸ່ງມາດປາຖະໜາຂອງພໍ່ແມ່ປະຊາຊົນ; ພາກສ່ວນກ່ຽວຂ້ອງກໍໄດ້ຂຶ້ນຊີ້ແຈງທຸກໆບັນຫາທີ່ ສສຊ ຕັ້ງຂຶ້ນດ້ວຍຄວາມສ້າງສັນ ເຮັດໃຫ້ການພິຈາລະນາ-ຮັບຮອງເອົາບັນຫາຕ່າງໆ ບົນຈິດໃຈແຫ່ງຄວາມເປັນເອກະພາບທາງດ້ານທັດສະນະ, ແນວຄິດ, ລະບຽບຫຼັກການ ແລະ ຄວາມຮັບຜິດຊອບສູງຂອງບັນດາທ່ານສະມາຊິກສະພາແຫ່ງຊາດ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)