ໃນຕອນເຊົ້າວັນທີ 14 ກຸມພາ 2023 ພາຍໃຕ້ການເປັນປະທານຂອງທ່ານ ຄໍາຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ຫລວງນ້ຳທາ ໃຫ້ກຽດເຂົ້າຮ່ວມຂອງທ່ານ ພົນຕີ ປະລິນຍາເອກ ວົງສັກ ພັນທະວົງ ຄະນະປະຈຳສະພາແຫ່ງຊາດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ3, ມີຄະນະປະຈຳພັກແຂວງ ຮອງເຈົ້າແຂວງ, ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ອາດີດສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການຂອງແຂວງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 60 ກວ່າທ່ານ, ຍິງ 8 ທ່ານ.
ກອງປະຊຸມໄດ້ຮັບຟັງຮ່າງບົດສະຫລຸບການເຄື່ອນໄຫວວຽກງານປະຈຳປີ 2022 ແລະ ທິດທາງແຜນການປະຈຳປີ 2023 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 3ແຂວງຫລວງນ້ຳທາ ເຊິ່ງໄລຍະ 1 ປີຜ່ານມາ ສະມາຊິກສະພາແຫ່ງຊາດປະຈຳເຂດເລືອກຕັ້ງໄດ້ເອົາໃຈໃສ່ປະກອບຄໍາເຫັນ ໃນແຜນການສ້າງ ແລະ ປັບປຸງບັນດາກົດໝາຍ ຂອງສະພາແຫ່ງຊາດ ໃນກອງປະຊຸມປະຊຸມສະໄໝວິສາມັນ, ກອງປະຊຸມສະໄໝສາມັນເທື່ອທີ 2 ເທື່ອທີ 3 ຂອງສະພາແຫ່ງຊາດ ມີທັງໝົດ 34 ສະບັບ. ໃນນີ້, ກົດຫມາຍສ້າງໃຫມ່ 10 ສະບັບ ແລະ ກົດໝາຍປັບປຸງ 24 ສະບັບ; ນອກນັ້ນ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ຮ່ວມກັບສະພາປະຊາຊົນແຂວງ ພິຈາລະນາ, ຮັບຮອງເອົາຂໍ້ຕົກລົງຂອງທ່ານເຈົ້າແຂວງ ໃນກອງປະຊຸມສະໄໝສາມັນເທື່ອທີ 2 ເທື່ອທີ 3 ແລະ ກອງປະຊຸມສະໄໝວິສາມັນຄັ້ງທີ 2 ຂອງສະພາປະຊາຊົນແຂວງ ຊຸດທີ II ຈຳນວນ 4 ສະບັບ; ໄດ້ປະສານສົມທົບກັບສະພາປະຊາຊົນແຂວງ ແລະ ພາກສ່ວນທີ່ກ່ຽວຂອງຢູ່ທ້ອງຖິ່ນ ໃນການປະກອບຄຳເຫັນໃສ່ບັນດາຮ່າງກົດໝາຍ ແລະ ນິຕິກຳທີ່ສຳຄັນຂອງແຂວງໄດ້ 21 ສະບັບ ແລະ ໄດ້ເຂົ້າຮ່ວມ, ຮັບຕ້ອນຕິດຕາມກວດກາຮ່ວມກັບບັນດາກໍາມາທິການ ຂອງສະພາແຫ່ງຊາດ ທີ່ລົງມາເຄື່ອນໄຫວຢູ່ໃນທ້ອງຖິ່ນໄດ້ 5 ຄະນະ, ຕິດຕາມກວດກາຜ່ານຄໍາຮ້ອງ, ຄໍາສະເໜີຂອງປະຊາຊົນ ຜ່ານໂທລະສັບສາຍດ່ວນຂອງສະພາແຫ່ງຊາດ ໄດ້ 4 ເລື່ອງ ຊຶ່ງຜ່ານການຕິດຕາມກວດກາຊຸກຍູ້ນັ້ນ, ໄດ້ເຮັດໃຫ້ການເຄື່ອນໄຫວຂອງຂະແໜງການໃນທ້ອງຖິ່ນ ມີອັນໄດ້ຮັບການປັບປຸງ, ມີສະຕິເຄົາລົບ ແລະ ປະຕິບັດລະບຽບກົດໝາຍດີຂຶ້ນກ່ວາເກົ່າ ພ້ອມດຽວກັນ ຜູ້ແທນເຂົ້າຮ່ວມກອງປະຊຸມຍັງໄດ້ແລກປ່ຽນປະກອບຄຳຄິດເຫັນໃສ່ຮ່າງບົດສະຫລຸບຢ່າງມີຈຸດສຸມ ເພື່ອເຮັດໃຫ້ວຽກງານຂອງສະມາຊິກສະພາແຫ່ງຊາດປະຈຳເຂດເລືອກຕັ້ງ ໃນຕໍ່ໜ້າໃຫ້ມີຄຸນນະພາບ ແລະ ໄດ້ຮັບຜົນສຳເລັດຫລາຍຂຶ້ນກວ່າເກົ່າ.