ກອງປະຊຸມທາບທາມ ແລະ ປະກອບຄໍາເຫັນໃສ່ຮ່າງກົດໝາຍ 3 ສະບັບຄື: ຮ່າງກົດໝາຍວ່າດ້ວຍ ສະພາແຫ່ງຊາດ; ຮ່າງກົດໝາຍວ່າດ້ວຍ ສະພາປະຊາຊົນຂັ້ນແຂວງ ແລະກົດໝາຍວ່າດ້ວຍ ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ໄດ້ຈັດຂຶ້ນໃນວັນທີ 18-19 ມີນາ 2024 ນີ້, ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ແຂວງ. ໂດຍການເປັນປະທານຂອງ ທ່ານ ບຸນລ້ວນ ຊົມສີຫາປັນຍາ ກໍາມະການພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ່ 7, ຮອງປະທານສະພາປະຊາຊົນ ແຂວງໄຊຍະບູລີ, ທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ; ມີທ່ານ ເພັດພິໄຊ ສູນວິໄລ ກໍາມະການປະຈໍາພັກແຂວງ, ຮອງເຈົ້າແຂວງ; ບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງ; ຄະນະປະຈໍາສະພາປະຊາຊົນແຂວງ; ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ; ອາດີດການນໍາຂອງສະພາປະຊາຊົນແຂວງ; ຫົວໜ້າ, ຮອງຫົວໜ້າພະແນກການ-ອົງການ, ກົມກອງ ພ້ອມດ້ວຍວິຊາການທີ່ກ່ຽວຂ້ອງ ເຂົ້າຮ່ວມ.

ກອງປະຊຸມຄັ້ງນີ້, ໄດ້ຕັ້ງໜ້າສຸມໃສ່ຄົ້ນຄວ້າ, ປະກອບຄໍາຄິດຄໍາເຫັນ ໃສ່ບັນດາເນື້ອໃນຮ່າງກົດໝາຍທັງ 3 ສະບັບ ເປັນຕົ້ນແມ່ນ: ມາດຕາ 2; 3; 8; 9; 12; 14; 17; 25; 29; 30; 34; 38; 59 ແລະມາດຕາ 88 ຂອງຮ່າງກົດໝາຍວ່າດ້ວຍ ສະພາແຫ່ງຊາດ ແລະສະພາປະຊາຊົນຂັ້ນແຂວງ; ໝວດທີ I; ໝວດທີ II, ມາດຕາ 9; 10 ແລະ12; ໝວດທີ III, ມາດຕາ 17; ໝວດທີ 5, ມາດຕາ 23; 25; 26; ໝວດທີ 6, ມາດຕາ 31; ໝວດທີ 7, ມາດຕາ 40; 41 ແລະໝວດທີ X, ມາດຕາ 48 ຂອງຮ່າງກົດໝາຍວ່າດ້ວຍ ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ.

ທັ້ງນີ້, ກໍເພື່ອຮັບປະກັນໃຫ້ເນື້ອໃນຂອງຮ່າງກົດໝາຍທັງ 3 ສະບັບນີ້ ທີ່ຈະນໍາເຂົ້າພິຈາລະນາຮັບຮອງເອົາ ໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດຊຸດທີ IX ມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມ.