(ສພຊ) ຫວ່າງບໍ່ດົນຜ່ານມາ, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ ຫລັກ 6 ຄະນະສະຫະພັນແມ່ຍິງ ສະພາແຫ່ງຊາດ (ສພຊ) ໄດ້ຈັດກອງປະຊຸມທາບທາມບຸກຄະລາກອນທີ່ຈະລົງສະໝັກເປັນຄະນະສະຫະພັນແມ່ຍິງ ສພຊ ຊຸດທີ V ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ຮອງປະທານ ສພຊ, ມີບັນດາຄະນະສະຫະພັນແມ່ຍິງ ພ້ອມດ້ວຍສະມາຊິກຈາກແຕ່ລະໜ່ວຍພາຍໃນ ສພຊ ເຂົ້າຮ່ວມ.

ທັງນີ້, ກໍເພື່ອສືບຕໍ່ຈັດຕັ້ງປະຕິບັດແຜນພັດທະນາແມ່ຍິງ ເປັນຕົ້ນແມ່ນການປະຕິບັດຂໍ້ແຂ່ງຂັນ 3 ດີ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ພ້ອມກັນສ້າງຜົນງານ, ສ້າງທຸກເງື່ອນໄຂເພື່ອກະກຽມໃຫ້ແກ່ການດໍາເນີນກອງປະຊຸມໃຫຍ່ຂອງ ສະຫະພັນແມ່ຍິງ ສພຊ ຊຸດທີ V ທີ່ຈະມາເຖິງນີ້ ແລະ ທາບທາມບຸກຄະລາກອນຮອບທີ 2 ເພື່ອລົງສະໝັກເປັນຄະນະສະຫະພັນແມ່ຍິງ ສພຊ ຊຸດທີ V.

ໂອກາດດັ່ງກ່າວ, ກອງປະຊຸມໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາຈາກທ່ານຮອງປະທານ ສພຊ ໂດຍທ່ານໄດ້ຍົກໃຫ້ເຫັນໜ້າທີ່ການເມືອງ, ຄວາມໝາຍຄວາມສໍາຄັນຂອງສະຫະພັນແມ່ຍິງລາວ ກໍຄືສະຫະພັນແມ່ຍິງ ສພຊ, ຄວາມແຕກຕ່າງກັນລະຫວ່າງຄະນະສະຫະພັນແມ່ຍິງ ກັບສະມາຊິກສະຫະພັນແມ່ຍິງ, ໂດຍລວມແມ່ນນໍາພາສຶກສາອົບຮົມເຕົ້າໂຮມຄວາມສາມັກຄີ, ອັນສະເພາະແມ່ນຕົວຢ່າງທ່ານປະທານສະຫະພັນແມ່ຍິງ ຄະນະບໍລິຫານສູນກາງແມ່ຍິງລາວ ໜ້າທີ່ຄວາມຮັບຜິດຊອບຂອງເພິ່ນແມ່ນເປັນເລຂາທິການ ສພຊ ໃນ 2 ປີ ແຕ່ກ່ອນນັ້ນເພິ່ນເຮັດຫຍັງ ເຊິ່ງບົ່ງບອກເຖິງຄວາມຮັບຜິດຊອບໜ້າທີ່ການເມືອງຂອງແຕ່ລະຄົນ, ຕິດພັນກັບບັນຫານີ້ແມ່ນຫຍັງ, ກ່ອນຈະດໍາເນີນໄດ້ຕ້ອງໄດ້ສໍາຫລວດກວດກາ ແລະ ຍັງໄດ້ດໍາເນີນກອງປະຊຸມແຕ່ລະໜ່ວຍ, ການດໍາເນີນກອງປະຊຸມບໍ່ແມ່ນຮູບການ ຕ້ອງເຮັດໃຫ້ມີເນື້ອໃນເລິກເຊິ່ງຈິງໃຈຕໍານິສົ່ງຂ່າວ ກໍ່ສ້າງຊ່ວຍເຫລືອເຊິ່ງກັນ ແລະ ກັນ ການເຄື່ອນໄຫວວຽກງານການຈັດຕັ້ງສະຫະພັນແມ່ຍິງ 7 ປີຜ່ານມາ, ອັນດີມີຈັກອັນ, ອັນອ່ອນຄ້າງຄາມີຈັກອັນ ໃນຕໍ່ໜ້າເຮົາຈະອີງໃສ່ທາບທາມນີ້ເພື່ອກໍານົດຈຸດແກ້ໄຂໃຫ້ເປັນ ຄວາມສໍາຄັນອັນທີ 1 ພວກສະຫາຍສາມາດຈັດແບ່ງປະເພດໃຜເປັນປະເພດດີ, ໃຜເປັນປະເພດດີເດັ່ນ,ໃຜເປັນປະເພດອ່ອນຫລ້າຫລັງ, ບໍ່ໃຫ້ເຮັດແບບສະເລ່ຍ ຜູ້ເຮັດໜ້ອຍໄດ້ຫລາຍ ຜູ້ເຮັດຫລາຍຍິ່ງໄດ້ຫລາຍ ຖ້າເປັນແນວນີ້ກະບໍ່ເປັນຂະບວນການ ຄວາມສໍາຄັນທີ 2 ແມ່ນກອງປະຊຸມໃຫຍ່, ການວາງອອກວິໄສທັດ, ການວາງແຜນພັດທະນາຍຸດທະສາດພັດທະນາແມ່ຍິງຂອງ ສພຊ, ການວາງທິດທາງພັດທະນາ ທິດທາງວຽກງານຂອງແມ່ຍິງ ສພຊ ອີງໃສ່ອັນໃດແດ່, ອັນທີ 1 ຕ້ອງໄດ້ອີງໃສ່ມະຕິກອງປະຊຸມໃຫຍ່ຜູ້ແທນແມ່ຍິງທົ່ວປະເທດ, ອັນນີ້ແມ່ນຄາດໝາຍສູ້ຊົນ ຄາດໝາຍເພິ່ນມີຫຍັງແດ່ ແລະ ສໍາລັບສະພາເຮົາກໍຕ້ອງອີງໃສ່ທີ່ຕັ້ງພາລະບົດບາດຂອງພວກເຮົາເຮັດໜ້າທີ່ເປັນເສນາທິການໃຫ້ແກ່ຄະນະປະຈໍາ ຢູ່ໃນ 3 ພາລະບົດບາດຂອງ ສພຊ ບົດບາດນິຕິບັນຍັດ, ບົດບາດໃນການຕັດສິນບັນຫາ, ຕົກລົງບັນຫາສໍາຄັນຂອງຊາດ ແລະ ບົດບາດຕິດຕາມກວດກາການປະຕິບັດລັດຖະທໍາມະນູນ ແລະ ກົດໝາຍຂອງອົງການບໍລິຫານລັດຂັ້ນຕ່າງໆ ແລະ  ອີງໃສ່ວິໄສທັດວຽກງານຂອງ ສພຊ 5 ປີ ຕໍ່ໜ້າ 10 ປີຕໍ່ໜ້າ ເພາະພວກເຮົາເຮັດໃນການກໍານົດທິດທາງຂອງສະຫະພັນແມ່ຍິງ ບໍ່ແມ່ນເຮົາຊິໄປອີງໃສ່ແຕ່ວ່າແມ່ຍິງນີ້ມີໜ້າທີ່ສຶກສາອົບຮົມເຕົ້າໂຮມຄວາມສາມັກຄີ ອັນນັ້ນກະເປັນຫລັກ ແຕ່ວ່າອັນອື່ນພວກເຮົາກໍໄດ້ສ້າງຄວາມເຂັ້ມແຂງ ເພື່ອພັດທະນາເຮັດໃຫ້ແມ່ຍິງມີຄວາມຮູ້ຄວາມສາມາດ ໃນການກ້າວຂຶ້ນຈາກພະນັກງານວິຊາການ ຈົນກາຍມາເປັນພະນັກງານການເມືອງ ກໍຄືເປັນຜູ້ແທນ ຍ້ອນມະຕິຂອງພວກສະຫາຍນີ້ມັນຈະກວມລວມເຫລືອແຕ່ 2 ປີ ແລະ ອີກສອງປີປາຍກໍຈະເປັນ ສພຊ ຊຸດທີ 9 ອັນນັ້ນແມ່ນການກໍານົດທິດທາງໃຫ້ຈະແຈ້ງທີ່ສຸດ, ການຕີລາຄາ ສໍາຄັນແມ່ນຈັດເປັນປະເພດໃຫ້ຈະແຈ້ງ ແຕ່ການຍົກຈຸດດີຈຸດອ່ອນກໍໃຫ້ຈະແຈ້ງ, ການກໍານົດທິດທາງນີ້ ກາຍເປັນບ່ອນອີງກາຍເປັນນິຕິກໍາໃຫ້ພວກເຮົາທັງໝົດໄດ້ເຄື່ອນໄຫວໄດ້ຈັດຕັ້ງປະຕິບັດແທ້ໆ ອັນນີ້ສໍາຄັນທີ່ສຸດ ສະນັ້ນຕ້ອງຊ່ວຍກັນຄົ້ນຄວ້າຊ່ວຍກັນຂຽນ, ຂຽນແລ້ວທາບທາມຄໍາຄິດຄໍາເຫັນຂອງສະຫະພັນແມ່ຍິງ ໃນນັ້ນ, ສະມາຊິກສະຫະພັນແມ່ຍິງນັ່ງຢູ່ນີ້ກໍແມ່ນສະມາຊິກສະຫະພັນແມ່ຍິງຕ້ອງໃຫ້ໄດ້ຄໍາຄິດຄໍາເຫັນບັນດາແມ່ຍິງທີ່ເປັນກໍາມາທິການ  ຈຶ່ງຈະສາມາດເປັນບ່ອນອີງໃນການປະຕິບັດໄດ້ ອັນນັ້ນເປັນຄວາມສໍາຄັນອັນທີສອງ, ອັນທີ 3 ແມ່ນເຮົາໄດ້ທິດທາງນະໂຍບາຍແລ້ວ ເຮົາເຫັນໄດ້ອັນດີອັນອ່ອນຂໍ້ຄົງຄ້າງພໍໄດ້ບົດຮຽນ ແຕ່ສໍາຄັນຢູ່ທີ່ການແກ້ໄຂບັນຫາດັ່ງກ່າວນັ້ນ ແມ່ນພົວພັນເຖິງບຸກຄົນ, ພົວພັນເຖິງບຸກຄະລາກອນ ພົວພັນເຖິງຄະນະສະຫະພັນແມ່ຍິງຊຸດໃໝ່. ສະນັ້ນ, ຢູ່ໃນບັນຫານີ້ແມ່ນສໍາຄັນຫລາຍ ເຊິ່ງພາຍຫລັງທີ່ຂ້າພະເຈົ້າມີຄໍາເຫັນຕໍ່ພວກສະຫາຍແລ້ວ ທາງຄະນະກໍຈະຈັດກອງປະຊຸມທາບທາມລົງຄະແນນສຽງບຸກຄະລາກອນ ເພື່ອປະກອບເຂົ້າເປັນຄະນະນໍາສະຫະພັນແມ່ຍິງຂອງພວກເຮົາ. ສະນັ້ນ, ຄະນະສະຫະພັນແມ່ຍິງຊຸດໃໝ່ນີ້ ໂຄງປະກອບກໍຕ້ອງມີຄະນະຜູ້ອາວຸໂສແດ່ ຜູ້ທີ່ມີຕໍາແໜ່ງລະດັບສູງສົມຄວນ ເພື່ອຈະບໍລິຫານວຽກງານໃນຕໍ່ໜ້າ ເປັນຜູ້ຕາງໜ້າໃຫ້ແກ່ທຸກໆພາກສ່ວນ, ແຕ່ລະຕໍາແໜ່ງງານຂອງພວກເຮົານີ້ ມີທັງຜູ້ເກົ່າຜູ້ໃໝ່ ສະນັ້ນຊິແມ່ນຜູ້ແນວໃດກໍຕ້ອງເຂົ້າໃຈວ່າບັນດາສະຫາຍຈະເປັນຜູ້ນໍາພາຂະບວນການແມ່ຍິງເຮົາໃນ 5 ປີຕໍ່ໜ້າ ເພື່ອກະກຽມເຮັດກອງປະຊຸມ ອີກບັນຫາສໍາຄັນທີ່ສຸດໃຫ້ພວກສະຫາຍເຂົ້າໃຈວ່າຜູ້ຈະເປັນຄັນທຸງນໍາພາວຽກງານດ້ານນີ້ ຈະຕ້ອງແມ່ນຜູ້ທີ່ມີທັງຄວາມຮູ້ຄວາມສາມາດ ກໍາແໜ້ນແນວທາງນະໂຍບາຍຂອງພັກ-ລັດ, ເຂົ້າໃຈທີ່ຕັ້ງພາລະບົດບາດຂອງ ສພຊ , ເຂົ້າໃຈກົດໝາຍ ແລະ ກໍາໄດ້ພາລະບົດບາດຂອງອົງການທີ່ຕົນສັງກັດຢູ່ ຄື ສພຊ, ເປັນຄົນເບິ່ງກວ້າງເຫັນໄກ ມີຈິດໃຈກວ້າງຂວາງ ເປັນຜູ້ເຕົ້າໂຮມຄວາມສາມັກຄີ ເປັນແບບຢ່າງເປັນຄັນທຸງໃຫ້ແຕ່ລະພາກສ່ວນ; ອັນທີ 3 ຢາກໃຫ້ເບິ່ງຄວາມຮັບຜິດຊອບໜ້າທີ່ການເມືອງຂອງຜູ້ກ່ຽວທີ່ນອນຢູ່ໃນຂົງເຂດວຽກງານໃດໜຶ່ງເປັນຜູ້ມີຄວາມສາມັກຄີມີຄວາມເສຍສະຫລະດຸໝັ່ນ ເພື່ອນໍາພາແມ່ຍິງກ້າວໄປເຖິງຈຸດໝາຍ ໄດ້ທາບທາມບຸກຄະລາກອນຂອງທຸກໜ່ວຍ ຕິດພັນກັບບຸກຄະລາກອນໃນເວລາທາບທາມຕ້ອງສ້າງຄວາມເຂົ້າໃຈ ມີຫລັກໝັ້ນຮັກສາຕົນເອງ ຄົ້ນຄວ້າວິເຄາະຕົກລົງ ຈະຮັກສາໃຜເປັນຜູ້ນໍາພາໃຫ້ເຮັດຕາມເງື່ອນໄຂຂອງການປ່ອນບັດ. ເພາະຜົນຂອງການທາບທາມຈະເປັນຜົນທີ່ປ່ອນບັດຄັດເລືອກເອົາຄະນະສະຫະພັນແມ່ຍິງໃນວັນທີ 30 ເມສາ 2018. ສະນັ້ນ, ຈຶ່ງຮຽກຮ້ອງມາຍັງສະມາຊິກແມ່ຍິງທີ່ເຂົ້າຮ່ວມທາບທາມ ໃນນັ້ນກວມຈັກເປີເຊັນຂອງຜູ້ທີ່ຈະລົງຄະແນນສຽງໃນມື້ນັ້ນ ຢາກໃຫ້ຄະນະຈົ່ງເອົາໃຈໃສ່ສະຫລຸບວຽກງານລວມຈໍານວນຜູ້ທີ່ມາປ່ອນບັດມີຈັກສະຫາຍ, ຢາກໃຫ້ຈັດກອງປະຊຸມຜັນຂະຫຍາຍພາຍຫລັງທີ່ຈັດກອງປະຊຸມຄັ້ງປະຖົມມະລືກແລ້ວ ເພື່ອຜັນຂະຫຍາຍມະຕິກອງປະຊຸມໃຫ້ກາຍເປັນຄູ່ມືປະຕິບັດຂອງສະມາຊິກສະຫະພັນແມ່ຍິງ ມັນເປັນການເຝິກຝົນຈົນກາຍໄປເປັນນັກການເມືອງ. ພ້ອມດຽວກັນນີ້ ທ່ານຍັງໄດ້ຍົກໃຫ້ເຫັນບົດບາດຜົນງານຂອງແມ່ຍິງຕັ້ງແຕ່ອະດີດຈົນເຖິງປັດຈຸບັນໃນການປະກອບສ່ວນເຂົ້າຊ່ວຍພັກຊ່ວຍລັດຕໍ່ສູ້ກູ້ຊາດ,  ປົກປັກຮັກສາ ແລະ ສ້າງສາພັດທະນາປະເທດຊາດ.

ຫລັງຈາກນັ້ນ, ກອງປະຊຸມຍັງໄດ້ປ່ອນບັດເລືອກເອົາຄະນະສະຫະພັນແມ່ຍິງສະພາແຫ່ງຊາດຊຸດທີ v ຮອບທີ 2 ດ້ວຍຜົນສໍາເລັດອັນຈົບງາມ.

(ສອນສັກ ວັນວິໄຊ)