ເພື່ອຈັດຕັ້ງຜັນຂະຫຍາຍ ຄໍາແນະນຳຂອງກຳມາທິການກົດໝາຍ ສະພາແຫ່ງຊາດ ໃນການທາບທາມລະດົມສະຕິປັນຍາ, ຄໍາຄິດເຫັນທີ່ເປັນປະໂຫຍດຂອງສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ຄະນະສະມາຊິກສະພາປະຊາຊົນຂັ້ນແຂວງໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ກໍຄືເປົ້າໝາຍທີ່ກ່ຽວຂ້ອງຕ່າງໆທີ່ເຂົ້າຮ່ວມທາບທາມ. ໃນລະຫວ່າງວັນທີ 25-26 ເມສາ 2024 ທີ່ສຳນັກງານສະພາປະຊາຊົນແຂວງຄໍາມ່ວນ ໄດ້ເປີດກອງປະຊຸມທາບທາມຄໍາເຫັນໃສ່ຮ່າງກົດໝາຍ ທີ່ຈະນຳເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໂດຍການເປັນປະທານຂອງທ່ານ ບຸນມີ ພິມມະສອນ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ປະທານສະພາປະຊາຊົນແຂວງ, ເຂົ້າຮ່ວມມີ ຮອງປະທານສະພາປະຊາຊົນແຂວງ, ມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ12, ຄະນະສະມາຊິກສະພາປະຊາຊົນຂັ້ນແຂວງ, ອົງການກວດກາພັກ-ລັດແຂວງ, ພະແນກການທີ່ກ່ຽວຂ້ອງ ແລະຕະຫລອດຮອດແຂກຖືກເຊີນເຂົ້າຮ່ວມ.
ພາຍຫຼັງ ປະທານ ກ່າວເປີດກອງປະຊຸມ, ທ່ານ ສະເຫຼີມ ສັກແກ້ວຈັນທະລາ ຄະນະປະຈໍາສະພາປະຊາຊົນແຂວງ ເລຂາທິການສະພາປະຊາຊົນແຂວງຄໍາມ່ວນ ໄດ້ສະເໜີບົດຮ່າງກົດໝາຍ ຈໍານວນ 5 ສະບັບ ຄື: (1)ຮ່າງກົດໝາຍວ່າດ້ວຍ ສະຫະກອນ ( ສະບັບສ້າງໃໝ່ ); (2)ຮ່າງກົດໝາຍວ່າດ້ວຍ ຊັບພະຍາກອນທີ່ເປັນຢາ ( ສະບັບສ້າງໃໝ່ ); (3)ຮ່າງກົດໝາຍວ່າດ້ວຍ ການສໍ້ລາດບັງຫຼວງ ( ສະບັບປັບປຸງ ); (4)ຮ່າງກົດໝາຍວ່າດ້ວຍ ການປົກປັກຮັກສາສິ່ງແວດລ້ອມ ( ສະບັບປັບປຸງ); (5)ຮ່າງກົດໝາຍວ່າດ້ວຍ ການກັນ ແລະ ຄວບຄຸມເຊື້ອເຮສໄອວິ/ພະຍາດເອດ ( ສະບັບປັບປຸງ ); ຈາກນັ້ນບັນດາທ່ານ ຜູ້ແທນເຂົ້າຮ່ວມກອງປະຊຸມໄດ້ພ້ອມກັນຄົ້ນຄວ້າ ລະດົມແນວຄໍາຄິດ, ຄໍາເຫັນປະກອບໃສ່ຮ່າງກົດໝາຍ ຈໍານວນ 5 ສະບັບ ຢ່າງມີຈຸດສຸມໃຫ້ມີຄວາມຄົບຖ້ວນ, ຖືກຕ້ອງ, ສອດຄ່ອງ, ແທດເໝາະກັບສະພາບຕົວຈິງ ແລະ ທັນກັບກຳນົດເວລາ ໃນການລາຍງານຕໍ່ຄະນະຮັບຜິດຊອບສ້າງ ແລະ ປັບປຸງກົດໝາຍ ຂອງສະພາແຫ່ງຊາດ.
ໃນຕອນທ້າຍກອງປະຊຸມ ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ ໄດ້ສະແດງຄວາມຍ້ອງຍໍຊົມເຊີຍ ບັນດາທ່ານຜູ້ແທນ ແລະ ແຂກຜູ້ເຂົ້າຮ່ວມກອງປະຊຸມໃນຄັ້ງນີ້ ທີ່ໄດ້ເອົາໃຈໃສ່ຄົ້ນຄວ້າ, ປະກອບຄຳເຫັນຢ່າງກົງໄປກົງມາ ແລະ ມີເນື້ອໃນຈິດໃຈທີ່ສະແດງເຖິງຄວາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າຢ່າງແທ້ຈິງ. ພ້ອມນັ້ນ, ກໍໄດ້ສະແດງຄວາມຊົມເຊີຍຕໍ່ກອງເລຂາກອງປະຊຸມ ທີ່ເອົາໃຈໃສ່ບັນທຶກ ແລະ ສັງລວມການປະກອບຄໍາເຫັນເພື່ອຈະລາຍງານໃຫ້ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ລາຍງານຕໍ່ຄະນະຮັບຜິດຊອບສ້າງ ແລະ ປັບປຸງກົດໝາຍ ສະພາແຫ່ງຊາດ ໄດ້ຮັບຊາບຕາມກຳນົດເວລາ, ເພື່ອໃຫ້ສາມາດນຳເອົາຮ່າງກົດໝາຍ ຈໍານວນ 5 ສະບັບ ດັ່ງກ່າວເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ທີ່ຈະໄດ້ໄຂຂຶ້ນໃນບໍ່ດົນຕໍ່ໜ້ານີ້.
ໂດຍ: ເອື້ອ ມະໂນສິງ