ໃນວັນທີ 24 ຕຸລາ 2022 ຢູ່ທີ່ສະພາປະຊາຊົນແຂວງຊຽງຂວາງ ໄດ້ເປີດກອງປະຊຸມຕິດຕາມກວດກາແລະ ຊຸກຍູ້ການຈັດຕັ້ງປະຕິບັດວຽກງານການອອກໃບຕາດິນ ແລະ ການພັດທະນາບໍ່ແຮ່ທີ່ດໍາເນີນໃນຮູບແບບທົດລອງຂອງກຳມາທິການເສດຖະກິດ, ເຕັກໂນໂລຊີແລະສິ່ງແວດລ້ອມສະພາແຫ່ງຊາດ ໂດຍການເປັນປະທານຂອງທ່ານ ຄໍາມ່ວນ ຊົມສີຫາປັນຍາ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມສະພາແຫ່ງຊາດ, ໃຫ້ກຽດເຂົ້າຮ່ວມຂອງທ່ານ ບຸນໂຮມ ເທດທານີ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 9, ປະທານສະພາປະຊາຊົນແຂວງ, ມີຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງ, ປະທານ-ຮອງປະທານຄະນະກໍາມະການເສດຖະກິດ, ເຕັກໂນໂລຊີ ແລະ ສິ່ງແວດລ້ອມສະພາປະຊາຊົນແຂວງ, ພະນັກງານທີ່ມາຈາກສະພາແຫ່ງຊາດພະນັກງານຂອງສະພາປະຊາຊົນແຂວງທີ່ຂຶ້ນກັບຄະນະກຳມະການເສດຖະກິດ, ເຕັກໂນໂລຊີ ແລະ ສິ່ງແວດລ້ອມສະພາປະຊາຊົນແຂວງເຂົ້າຮ່ວມ.
ເພື່ອເປັນການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວຽກງານການຂຶ້ນທະບຽນອອກໃບຕາດິນ ແລະ ເຮັດທົດລອງຂຸດຄົ້ນແຮ່ທາດຕາມມະຕິຂອງກອງປະຊຸມສະພາແຫ່ງຊາດ ສະບັບທີ 55 ແລະ ສະບັບທີ 57, ລົງວັນທີ 8 ກໍລະກົດ 2022 ຢູ່ແຂວງຊຽງຂວາງ ໃຫ້ສໍາເລັດຕາມລະດັບຄາດໝາຍທີ່ວາງໄວ້. ໃນທີ່ປະຊຸມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານການຂຶ້ນທະບຽນໃບຂອງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ແລະ ການຂຸດຄົ້ນແຮ່ເຫຼັກ ແລະ ແຮ່ຫາຍາກຂອງພະແນກພະລັງງານ ແລະ ບໍແຮ່ ໃນໂອກາດດັ່ງບັນດາຜູ້ແທນກອງປະຊຸມຍັງມີການແລກປ່ຽນຄໍາເຫັນເຊິ່ງກັນແລະ ກັນເປັນຕົ້ນແມ່ນການອອກໃບຕາທີ່ຍັງບໍ່ທັນບັນລຸເປົ້າໝາຍ, ການຈັດສັນທີ່ດິນຂັ້ນເມືອງ, ຂັ້ນບ້ານຍັງບໍ່ລະອຽດ, ການສະຫງວນທີ່ດິນຂອງລັດ, ການຮຽກຮ້ອງຄ່າຊົດເຊີຍຂອງປະຊາຊົນທີ່ໄດ້ຮັບຜົນກະທົບຈາກໂຄງການຂຸດຄົ້ນ, ການແກ້ໄຂຜົນກະທົບຂອງຖຄງການທີ່ຖືກເຂດທໍາການຜະລິດ ແລະ ເຖື່ອນລ້ຽງສັດຂອງປະຊາຊົນ ແລະ ບັນຫາອື່ນໆອີກ, ເຊິ່ງໃນທີ່ປະຊຸມສາມາດເຫັນໄດ້ເຖິ່ງດ້ານດີທີ່ຄວນເສີມຂະຫຍາຍ ແລະ ດ້ານອ່ອນທີ່ຍັງຄົງຄ້າງທີ່ຈະຕ້ອງຊອກຫາວິທີທາງແກ້ໄຂຊ່ວຍກັນ ໃຫ້ສອດຄ່ອງກັບບັນດານິຕິກໍາ ແລະ ກົດໝາຍທີ່ວາງໄວ້.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ