ໃນລະຫວ່າງວັນທີ 27-28 ກັນຍາ 2023 ຢູ່ທີ່ຫ້ອງປະຊຸມຂອງສະພາປະຊາຊົນແຂວງຊຽງຂວາງ ໄດ້ເປີດກອງປະຊຸມຕິດຕາມກວດກາ ການປະເມີນການຈັດຕັ້ງປະຕິບັດກົດໝາຍ ຂົງເຂດປ້ອງກັນຊາດ-ປ້ອງກັນຄວາມສະຫງົບ ຄື: ກົດໝາຍວ່າດ້ວຍປ້ອງກັນຊາດ, ກົດໝາຍວ່າດ້ວຍນາຍທະຫານ ກອງທັບປະຊາຊົນລາວ ແລະ ກົດໝາຍວ່າດ້ວຍກຳລັງປ້ອງກັນຄວາມສະຫງົບປະຊາຊົນ; ພາຍໃຕ້ການເປັນປະທານຮ່ວມຂອງທ່ານ ບຸນຈັນ ສີວົງພັນ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຊຽງຂວາງ ແລະ ທ່ານ ບຸນໂຮມ ເທດທານີ ຮອງເລຂາພັກແຂວງ, ປະທານສະພາປະຊາຊົນແຂວງຊຽງຂວາງ; ມີບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ບັນດາທ່ານຄະນະປະຈຳສະພາປະຊາຊົນແຂວງ, ສະມາຊິກສະພາປະຊາຊົນແຂວງ, ຄະນະປ້ອງກັນຊາດ-ປ້ອງກັນຄວາມສະຫງົບ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນຂອງແຂວງ ແລະ ພະນັກງານຂອງສະພາປະຊາຊົນແຂວງເຂົ້າຮ່ວມ.

ໃນວາລະດຳເນີນກອງປະຊຸມ ໄດ້ຮັບຟັງການລາຍງານ ຈາກກຳລັງປ້ອງກັນຊາດ-ປ້ອງກັນຄວາມສະຫງົບໃນການຈັດຕັ້ງປະຕິບັດບັນດາກົດໝາຍທີ່ກ່ຽວຂ້ອງໃນໄລຍະຜ່ານມາ, ໄດ້ໂຄສະນາເຜີຍແຜ່, ຈັດຕັ້ງຜັນຂະຫຍາຍໃນແຕ່ລະຂົງເຂດໄດ້ຢ່າງກ້ວາງຂວາງ ເຮັດໃຫ້ພະນັກງານ, ທະຫານ ຕຳຫຼວດ ແລະ ພໍ່ແມ່ປະຊາຊົນສາມາດກຳໄດ້ພາລະບົດບາດ, ສິດ ແລະ ໜ້າທີີ່ຂອງກຳລັງປ້ອງກັນຊາດປ້ອງກັນຄວາມສະຫງົບ, ຄຽງຄູ່ກັບດ້ານດີຍັງມີຂໍ້ຄົງຄ້າງ ທີ່ຕ້ອງໄດ້ສືບຕໍ່ປັບປຸງແກ້ໄຂໂດຍສະເພາະແມ່ນບ່າງມາດຕາຂອງກົດໝາຍ ທີ່ເຫັນວ່າ ໃນການຈັດຕັ້ງປະຕິບັດແມ່ນບໍ່ແທດເໝາະກັບສະພາບຄວາມເປັນຈິງ; ຫຼັງຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ຍົກບັນຫາທີ່ພົບພໍ້ ແລະ ຍຸ້ງຍາກໃນໄລຍະຜ່ານມາເພື່ອຄົ້ນຄວ້າ ແລະ ຊອກວິທີປັບປຸງແກ້ໄຂ ຢ່າງກົງໄປກົງມາ ແລະ ເລິກເຊິ່ງ ເພື່ອສັງລວມລາຍງານ ແລະ ເປັນຂໍ້ມູນທີ່ມີເນື້ອໃນຄົບຖ້ວນ, ຖືກຕ້ອງ, ສອດຄ່ອງ ແລະ ແທດເໝາະກັບຕົວຈິງ ທີ່ຈະນຳເຂົາລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX.

ໃນຕອນທ້າຍຄະນະປະທານຍັງໄດ້ມີຄຳເຫັນໂອລົມ ສະຫຼຸບຕີລາຄາ ການປະເມີນຜົນການຈັດ ຕັ້ງປະຕິບັດ 3 ກົດໝາຍ ຂົງເຂດປ້ອງກັນຊາດ-ປ້ອງກັນຄວາມສະຫງົບ ເຫັນວ່າມີຫຼາຍດ້ານໄດ້ຮັບຜົນສຳເລັດ ແລະ ຍັງມີບາງດ້ານທີ່ຕ້ອງປັບປຸງແກ້ໄຂ ໃຫ້ທຸກສະຫາຍຈົ່ງເອົາໃຈໃສ່ຈັດຕັ້ງປະຕິບັດໜ້າທີອັນສຳຄັນ ທີ່ພັກລັດມອບໝາຍໃຫ້ໄດຮັບຜົນສຳເລັດ ແລະ ຖືກຕ້ອງສອດຄອງກັບລະບຽບ ກົດ    ໝາຍທີ່ວາງໄວ້; ເຮັດໃຫ້ປະເທດຊາດ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ