ປະຕິບັດຕາມພາລະບົດບາດ, ສິດ ແລະ ໜ້າທີ່ໃນການຕິດຕາມກວດກາ ຄະນະກຳມະການຍຸຕິທໍາ ແລະ ປກຊ-ປກສ ຂອງສະພາປະຊາຊົນແຂວງ ໃນວັນທີ 8 ຕຸລາ 2024 ສະພາປະຊາຊົນແຂວງຫຼວງນໍ້າທາ ໄດ້ຈັດກອງປະຊຸມພາຍຫຼັງການລົງຕິດຕາມກວດກາການຈັດຕັ້ງປະຕິບັດມະຕິກອງປະຊຸມສະໄໝສາມັນຂອງສະພາແຫ່ງຊາດ ຂົງເຂດຍຸຕິທຳ ແລະ ປກຊ-ປກສ ພາຍໃຕ້ການເປັນປະທານຂອງ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ເຂົ້າຮ່ວມມີ ປະທານ, ຮອງປະທານຄະນະກຳມະການຍຸຕິທໍາ ແລະ ປກຊ-ປກສ, ຫົວໜ້າ, ຮອງຫົວໜ້າ ທີ່ກ່ຽວຂ້ອງຂົງເຂດວຽກງານຍຸຕິທໍາ ແລະ ປກຊ-ປກສ ແຂວງ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດ ມະຕິກອງປະຊຸມສະໄໝສາມັນຂອງສະພາແຫ່ງຊາດ, ຂໍ້ສະດວກ ແລະ ບັນຫາທີ່ພົບຄວາມຫຍຸ້ງຍາກໃນການປະຕິບັດຕົວຈິງ ຂອງອົງການໄອຍະການແຂວງ, ສານປະຊາຊົນແຂວງ, ພະແນກຍຸຕິທຳ, ກອງບັນຊາການທະຫານແຂວງ ແລະ ກອງບັນຊາການ ປກສ ແຂວງ ເຊິ່ງເຫັນວ່າພາກສ່ວນທີ່ກ່ຽວຂ້ອງໄດ້ເອົາໃຈໃສ່ຈັດຕັ້ງປະຕິບັດ ມີຜົນສຳເລັດຫລາຍດ້ານຕາມທີ່ໄດ້ກຳນົດໄວ້, ພ້ອມດຽວກັນ ຜູ້ແທນກອງປະຊຸມໄດ້ແລກປ່ຽນປະກອບຄໍາຄິດເຫັນຕໍ່ກັບວຽກງານຂົງເຂດຍຸຕິທຳ ຢ່າງມີຈຸດສຸມ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຂົງເຂດຍຸຕິທໍາ ແລະ ປກຊ-ປກສ ມີຄຸນນະພາບຂຶ້ນກວ່າເກົ່າ;  ຕອນທ້າຍປະທານກອງປະຊຸມໄດ້ມີຄຳເຫັນເນັ້ນໜັ້ກໃຫ້ພາກສ່ວນທີ່ກ່ຽວຂ້ອງ, ເອົາໃຈໃສ່ຍົກສູງຄວາມຮັບຜິດຊອບຂອງຕົນຕື່ມອີກໃນການຈັດຕັ້ງປະຕິບັດຕາມພາລະບົດບາດຂອງຕົນດ້ວຍຄວາມຮັບຜິດຊອບສູງ, ແກ້ໄຂດ້ານອ່ອນ, ຂໍ້ຄົງຄ້າງຂອງຕົນໃຫ້ມີຜົນສຳເລັດ.