ກອງປະຊຸມຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍຂົງເຂດປ້ອງກັນຊາດ – ປ້ອງກັນຄວາມສະຫງົບ ຈຳນວນ 3 ສະບັບ ໄດ້ໄຂຂຶ້ນໃນວັນທີ 2 ຕຸລາ 2023 ທີ່ຫ້ອງປະຊຸມສະພາປະຊາຊົນແຂວງຫລວງນ້ຳທາ ພາຍໃຕ້ການເປັນປະທານຂອງທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ມີຄະນະຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ປະຈຳເຂດເລືອກຕັ້ງເມືອງ, ອົງການທຽບເທົ່າພະແນກການຂອງແຂວງ, ສອງກຳລັງ ປກຊ – ປກສ ແຂວງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 40 ກວ່າທ່ານ.

ກອງປະຊຸມໄດ້ຮັບຟັງບົດການປະເມີນຜົນການຈັດຕັ້ງປະຕິບັດກົດໝາຍຂົງເຂດປ້ອງກັນຊາດ – ປ້ອງກັນຄວາມສະຫງົບຈຳນວນ 03 ສະບັບ, ຄື; ກົດໝາຍວ່າດ້ວຍ ນາຍທະຫານກອງທັບປະຊາຊົນລາວ (ສະບັບປັບປຸງ) ທັງໝົດມີ 5 ພາກ, 50 ມາດຕາ ;ກົດໝາຍວ່າດ້ວຍ ການປ້ອງກັນຊາດ ທັງໝົດ 10 ພາກ 65 ມາດຕາ ແລະ ກົດໝາຍວ່າດ້ວຍ ກຳລັງປ້ອງກັນຄວາມສະຫງົບປະຊາຊົນ ( ສະບັບປັບປຸງ ) ທັງໝົດ 9 ພາກ, 55 ມາດຕາ, ພ້ອມດຽວ ກັນຜູ້ແທນກອງປະຊຸມໄດ້ແລກປ່ຽນປະກອບຄຳຄິດເຫັນຕໍ່ບົດປະເມີນຜົນການຈັດຕັ້ງປະຕິບັດກົດໝາຍຂົງເຂດປ້ອງກັນຊາດ – ປ້ອງກັນຄວາມສະຫງົບ ທັງ 03 ສະບັບ ຢ່າງມີຈຸດສຸມ ເພື່ອເຮັດໃຫ້ເນື້ອໃນຂອງບົດປະເມີນກົດໝາຍມີເນື້ອໃນຖືກຕ້ອງສອດຄ່ອງຕາມສະພາບຄວາມເປັນຈິງ

ຕອນທ້າຍທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ຍັງໄດ້ສະຫລຸບ, ສັງລວມຄຳຄິດເຫັນ ແລະ ຊີ້ນຳໃຫ້ກອງເລຂາ, ຄະນະຮັບຜິດຊອບຂອງ 2 ກຳລັງປ້ອງກັນຊາດ – ປ້ອງກັນຄວາມສະຫງົບ ນຳເອົາຄຳຄິດເຫັນນີ້ ໄປປັບປຸງໃຫ້ບົດປະເມີນໃຫ້ມີເນື້ອໃນຖືກຕ້ອງສົມບຸນ, ໃຫ້ທວງທັນເວລາ ເພື່ອນຳເອົາຂໍ້ມູນຄຳຄິດເຫັນດັ່ງກ່າວ ນຳເຂົ້າຄົ້ນຄວ້າ, ພິຈາລະນາ ໃນກອງປະຊຸມສະໄໝສາມັນຂອງສະພາແຫ່ງຊາດ ໃນຕໍ່ໜ້ານີ້ ໃຫ້ມີຄວາມເປັນເອກະພາບ ແລະ ສາມາດນຳໄປຈັດຕັ້ງປະຕິບັດໄດ້ຍາວນານ.

ໂດຍ ວັນນີ ແຝງບົວວັນ