ໃນຕອນເຊົ້າ ວັນທີ 18 ພະຈິກ 2022 ທີ່ສະໂມສອນ ວິທະຍາຄານ ນາຍທະຫານບົກກົມມະດຳ ໄດ້ຈັດກອງປະຊຸມ ຍົກສູງ ພາລະບົດບາດການເຄື່ອນໄຫວ ຂອງສະພາແຫ່ງຊາດ ແລະ ສະພາປະຊາຊົນແຂວງ ໃຫ້ນາຍ ແລະ ພົນທະຫານບົກກົມມະກຳ, ໃຫ້ກຽດກ່າວຕ້ອນຮັບໂດຍ ທ່ານ ພົວຈ ຖາວອນ ແກ້ວອິນທະວົງ ເລຂາຄະນະພັກ, ຫົວໜ້າການເມືອງວິທະຍາຄານ ນາຍທະຫານກົມມະດຳ, ຮັບກຽດເຂົ້າຮ່ວມເປັນປະທານກອງປະຊຸມໂດຍ ທ່ານ ພົຕ ປອ ວົງສັກ ພັນທະວົງ ກຳມະການຄະນະປະຈຳ, ປະທານກຳມາທິການ ປກຊ-ປກສ ສະພາແຫ່ງຊາດ ແລະ ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ ທັງເປັນ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 10 ແຂວງວຽງຈັນ.

ກອງປະຊຸມໃນຄັ້ງນີ້, ໄດ້ຮັບຟັງການເຜີຍແຜ່ເອກະສານ ກ່ຽວກັບ ສະພາບຄວາມເປັນມາ, ທີ່ຕັ້ງ, ພາລະບົດບາດ, ສິດໜ້າທີ່, ການຈັດຕັ້ງ ແລະ ການເຄື່ອນໄຫວ ຂອງກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ແລະ ເອກະສານ ກ່ຽວກັບ ທີ່ຕັ້ງ, ພາລະບົດບາດ, ສິດໜ້າທີ່ ໃນການເຄື່ອນໄຫວວຽກງານ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ນອກຈາກນັ້ນ, ຍັງໄດ້ນຳເອົາເນື້ອຜົນສຳເລັດ ຂອງກອງປະຊຸມ ສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງວຽງຈັນ ຊຸດທີ II ມາເຜີຍແຜ່ໃຫ້ບັນດານາຍ ແລະ ພົນທະຫານ ໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ, ກອງປະຊຸມ ຍັງໄດ້ຮັບຟັງການແລກປ່ຽນຄຳຄິດຄຳເຫັນຂອງບັນດາທ່ານ ໂດຍສະເພາະບັນຫາທີ່ຕິດພັນກັບສອງວາລະແຫ່ງຊາດ ແລະ ຮັບຟັງການຊີ້ແຈງຈາກຄະນະປະທານກອງປະຊຸມ.

ໃນຕອນທ້າຍ, ທ່ານ ພົຕ ປອ ວົງສັກ ພັນທະວົງ ຍັງໄດ້ມີຄຳເຫັນ ຊຸກຍູ້ໃຫ້ແຕ່ລະພາກ ສ່ວນເອົາໃຈໃສ່ຕໍ່ການຈັດຕັ້ງປະຕິບັດໜ້າທີ່ວິຊາສະເພາະຂອງຕົນ ພ້ອມທັງສະແດງ ຄວາມຍ້ອງຍໍຊົມເຊີຍຕໍ່ຄະນະນໍາ ຂອງແຕ່ລະຂົງເຂດວຽກງານທີ່ ໄດ້ຕັ້ງໜ້າປະຕິບັດໜ້າທີ່ດ້ວຍ ຄວາມຮັບຜິດຊອບສູງ ແລະ ເນັ້ນໃຫ້ແຕ່ລະພາກສ່ວນສືບຕໍ່ເອົາໃຈໃສ່ປະຕິບັດໜ້າທີ່ວຽກງານຂອງຕົນ ໃຫ້ໄດ້ຮັບ ຜົນສຳເລັດຕາມຄາດໝາຍທີ່ວາງໄວ້.