ໃນລະຫວ່າງວັນທີ 9-10 ທັນວາ 2024  ທີ່ເມືອງຄູນຄຳ ແຂວງຄໍາມ່ວນ ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມຝຶກອົບຮົມພາວະການເປັນຜູ້ນຳ ແລະວຽກງານສື່ມວນຊົນໃຫ້ແກ່ສະມາຊິກສະພາປະຊາຊົນຂັ້ນແຂວງ ແລະ ເສນາທິການຊ່ວຍວຽກສະພາປະຊາຊົນຂັ້ນແຂວງ ໂດຍການເປັນປະທານຂອງ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມມີ ທ່ານ ສິງຕັນ ໄຊລືຊົ່ງ ຮອງປະທານສະພາປະຊາຊົນແຂວງຫຼວງພະບາງ, ທ່ານ ແກ້ວບຸນຂວັນ ໄຊຍະວົງສາ ເຈົ້າເມືອງຄູນຄຳ, ມີບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງ 10 ຕົວເມືອງ, ສສຂ ແຂວງຫຼວງພະບາງ, ວິທະຍາກອນ ແລະ ພະນັກງານເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນ ແລະ ແຂວງຫຼວງພະບາງ ເຊິ່ງມີຜູ້ເຂົ້າຮ່ວມທັງໝົດ 97 ທ່ານ, ຍິງ 41 ທ່ານ.

ຈຸດປະສົງຂອງການຈັດຝຶກອົບຮົມໃນຄັ້ງນີ້: ເພື່ອຍົກສູງຂີດຄວາມສາມາດໃຫ້ແກ່ສະມາຊິກສະພາປະຊາຊົນຂັ້ນແຂວງ ແລະ ເສນາທິການຊ່ວຍວຽກຂອງສະພາປະຊາຊົນຂັ້ນແຂວງ ທັງເປັນການຍົກລະດັບຄວາມຮູ້, ຄວາມສາມາດທັກສະຄວາມເຂົ້າໃຈເລິກເຊິ່ງໃນການຈັດຕັ້ງປະຕິບັດວຽກງານ, ໃນໄລຍະ 2 ວັນຂອງການດຳເນີນກອງປະຊຸມຜູ້ເຂົ້າຮ່ວມໄດ້ຮັບຟັງການນຳສະເໜີ ຫົວຂໍ້: ຄວາມຮູ້ພຶ້ນຖານໃນການເປັນຜູ້ນຳ ແລະ ທັກສະພຶ້ນຖານໃນພາວະການເປັນຜູ້ນຳ ສະເໜີໂດຍ: ຮສ ປອ ບົວດຳ ແສງຄຳຄຸດລາວົງ ອາດີດຫົວໜ້າຫ້ອງການມະຫາວິທະໄລແຫ່ງຊາດ, ຄວາມຮູ້ພື້ນຖານກ່ຽວກັບບົດບາດ ຍິງ-ຊາຍ ແລະ ການເຊື່ອມທັດສະນະບົດບາດຍິງ-ຊາຍ ເຂົ້າໃນການພັດທະນາ ແລະ ເຄື່ອງມືໃນການເຊື່ອມບົດບາດຍິງ-ຊາຍ ເຂົ້າໃນການວາງແຜນ ສະເໜີໂດຍ:​ ທ່ານ ນາງ ມະນີວອນ ຫຼວງສົມບັດ ຫົວໜ້າຫ້ອງການຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ, ເຕັກນິກການເກັບກຳພາບເພື່ອຍົກສູງບົດບາດຂອງເພດຍິງໂຄສະນາຜ່ານສື່ສັງຄົມອອນລາຍໃນການສົ່ງເສີມວຽກງານຄວາມສະເໜີພາບລະຫວ່າງຍິງ-ຊາຍ ສະເໜີໂດຍ ທ່ານ ບຸນເກີດ ວົງໄຊຍາ ຮອງຫົວໜ້າກົມສື່ມວນຊົນສະພາແຫ່ງຊາດ.

ພ້ອມນັ້ນ, ຜູ້ເຂົ້າຮ່ວມຈະໄດ້ສຸມໃສ່ຄົ້ນຄວ້າ, ປະກອບຄຳຄິດຄຳເຫັນ ແລະ ສົນທະນາແລກປ່ຽນບົດຮຽນກັບນັກວິທະຍາກອນ ໃນແຕ່ລະຫົວຂໍ້ ອັນໄດ້ເຮັດໃຫ້ເຂົ້າສູ່ລວງເລິກ ແລະ ມີໝາກຜົນຫຼາຍຂຶ້ນ.

ໃນຕອນທ້າຍຂອງກອງປະຊຸມຝຶກອົບຮົມໃນຄັ້ງນີ້ ທ່ານ ບົວພັນ ແສງ ຮອງປະທານສະພາປະຊາຊົນແຂວງຄໍາມ່ວນ ໄດ້ມີຄໍາເຫັນສະຫຼຸບເນື້ອໃນວ່າ ກອງປະຊຸມຝຶກອົບຮົມ ຄັ້ງນີ້ເຖິງວ່າຈະດຳເນີນພຽງແຕ່ 2 ວັນກໍຕາມແຕ່ເຊື້ອໝັ້ນວ່າບັນດາທ່ານຜູ້ແທນ ແລະ ເສນາທິການຂອງສະພາປະຊາຊົນຂັ້ນແຂວງທີ່ເຂົ້າຮ່ວມກອງປະຊຸມຍົກສູງຂີດຄວາມສາມາດຄັ້ງນີ້ຈະນຳເອົາເນື້ອໃນບົດຮຽນ ແລະ ທັກສະນຳໄປຈັດຕັ້ງປະຕິບັດໜ້າທີ່ວຽກງານຕາມພາລະບົດບາດຂອງຕົນ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກ່ວາເກົ່າ.

ພ້ອມນັ້ນໂອກາດດຽວກັນ ທ່ານ ຍັງໄດ້ສະແດງຄວາມຊົມເຊີຍ ແລະ ຂອບໃຈຕໍ່ຜູ້ໃຫ້ທຶນຈັດກອງປະຊຸມຝຶກອົບຮົມໃນເທື່ອນີ້ ເຊິ່ງໄດ້ຮັບການສະໜັບສະໜູນໂດຍ: ອົງການເຮວວີຕັດ ( HELVETAS).

ໂດຍ: ເອື້ອ ມະໂນສິງ