ໃນລະຫວ່າງວັນທີ 18-19 ມິຖຸນາ 2024 ຢູ່ທີ່ສະໂມສອນເມືອງຜາໄຊ ໄດ້ເປີດກອງປະຊຸມກອງປະຊຸມຊຸກຍູ້ ແລະ ຕິດຕາມກວດກາ ຂອງຄະນະກຳມະການເສດຖະກິດ, ແຜນການ ແລະ ການເງິນ ພາຍໃຕ້ການເປັນປະທ່ານຂອງທ່ານ ນ. ສົມພອນ ໂສພິລາວັນ ຮອງປະທານສະພາປະຊາຊົນແຂວງ ແລະ ເປັນກຽດເຂົ້າຮ່ວມຂອງ ທ່ານ ຄຳຫຼ້າ ແກ້ວດາວັນ ຮອງເລຂາພັກເມືອງໆຜາໄຊ ມີບັນດາທ່ານ ຄະນະປະທານຄະນະກຳມະການ, ຄະນະເລຂາທິການ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ, ການນຳຂອງເມືອງ, ບັນດາທ່ານຫົວໜ້າ-ຮອງຫົວໜ້າຫ້ອງການ ແລະ ພະນັກງານໃນຂົງເຂດເສດຖະກິດ ເຂົ້າຮ່ວມ.

ເພື່ອປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ ໂດຍສະເພາະແມ່ນຄະນະກຳມະການເສດຖະກິດ, ແຜນການ ແລະ ການເງິນ ໃນການຈັດຕັ້ງປະຕິບັດ, ເຄື່ອນໄຫວວຽກງານ ການປະຕິບັດລັດຖະທຳມະນູນ, ກົດໝາຍ ແລະ ນິຕິກຳຕ່າງໆ ຂອງບັນດາອົງການລັດໃນຂົງເຂດເສດຖະກິດ ແນ່ໃສ່ເກັບກຳຂໍ້ມູນ ແລະ ທົບທວນຄືນດ້ານຄວາມຮູ້, ຄວາມເຂົ້າໃຈຂອງພາກສ່ວນຕ່າງໆໃນການເຄື່ອນໄຫວວຽກງານ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ການເງິນ ເພື່ອລາຍງານຢູ່ໃນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II; ໃນວາລະດໍາເນີນກອງປະຊຸມໄດ້ຮັບຟັງການລາຍງານຫຍໍ້ ຂອງອົງການປົກຄອງເມືອງ ໃນໄລຍະຜ່ານມາຂອງຂົງເຂດເສດຖະກິດ ແລະ ພາກສ່ວນທີ່ກ່ຽວຂ້ອງເປັນຕົ້ນແມ່ນ ການຄຸ້ມຄອງບັນດາໂຄງການຂຸດຄົ້ນບໍ່ແຮ່ລະຫວ່າງແຂວງ, ເມືອງ ແລະ ບ້ານ, ການຄຸ້ມຄອງຊັບພະຍາກອນທີ່ດິນ, ວັດແທກ ແລະ ຂຶ້ນທະບຽນທີ່ດິນໃຫ້ບັນດາຄົວເຮືອນ ການສະກັດກັ້ນການຈັບຈ່ອງທີ່ດິນຊະຊາຍ ຕິດພັນກັບການຄຸ້ມຄອງຜົນກະທົບທາງດ້ານສິ່ງແວດລ້ອມ-ສັງຄົມ ທີ່ເກີດຈາກການຂຸດຄົ້ນແຮ່ຕ່າງໆ ການເກັບກໍາລາຍຮັບ ແລະ ຄຸ້ມຄອງລາຍຈ່າຍຂອງຫ້ອງການການເງິນ, ການຄຸ້ມຄອງຫ້າມໃຊ້ສານເຄມີຕ່າງໆເຂົ້າໃນຂົງເຂດກະສິກຳ ແລະ ການຖາງປ່າຊະຊາຍ ຊຶ່ງສາມາດຈັດຕັ້ງປະຕິບັດໄດ້ດີ ມີຜົນສຳເລັດຕາມແຜນການທີ່ວາງໄວ້ໃນຫຼາຍດ້ານ ແຕ່ຍັງມີຂໍ້ຫຍຸ້ງຍາກບາງດ້ານທີ່ຈະຕ້ອງໄດ້ຮັບປຸງແກ້ໄຂ ກອງປະຊຸມໄດ້ມີຄຳຄິດຄຳເຫັນ, ສະເໜີບັນຫາ ແລະ ປຶກສາຫາລືແລກປ່ຽນ ຢ່າງກົງໄປກົງມາ ຊອກຫາວິທີທາງແກ້ໄຂ ບັນຫາທີ່ຄົງຄ້າງ ແລະ ການເຄື່ອນໄຫວວຽກງານຂອງຂົງເຂດເສດຖະກິດໃນຕໍ່ໜ້າໃຫ້ໄດ້ຮັບຜົນສຳເລັດຕາມແຜນການທີ່ວ່າງໄວ້.

ຕອນທ້າຍຂອງກອງປະຊຸມ ທ່ານ ນ. ສົມພອນ ໂສພິລາວັນ ຍັງໄດ້ມີຄຳເຫັນໂອ້ລົມ ສະຫຼຸບຕີລາຄາ ການປະເມີນຜົນ ການຈັດຕັ້ງປະຕິບັດວຽກງານໃນຂົງເຂດເສດຖະກິດ ເຫັນວ່າມີຫຼາຍວຽກງານທີ່ປະຕິບັດໄດ້ດີ ແລະ ມີຜົນສຳເລັດ; ແຕ່ຍັງມີບາງດ້ານທີ່ຕ້ອງປັບປຸງແກ້ໄຂ ໃຫ້ທຸກພາກສ່ວນທີ່ກ່ຽວຂ້ອງຈົ່ງເອົາໃຈໃສ່ຈັດຕັ້ງປະຕິບັດ ໜ້າທີ່ສຳຄັນຂອງຕົນ ທີ່ພັກລັດມອບໝາຍໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້.

ໃນການລົງຊຸກຍູ້ ແລະ ຕິດຕາມກວດກາ ທີມງານຍັງໄດ້ລົງສະຫນາມ ເພື່ອຕິດຕາມການປະຕິບັດວຽກງານຕົວຈິງຂອງໂຄງການຂຸດຄົ້ນແຮ່ຫາຍາກ ຂອງບໍລິສັດໂບນັດລາວ ຢູ່ບ້ານພາເໜືອ, ເມືອງຜາໄຊ ຊຶ່ງບໍລິສັດສາມາດເຄື່ອນໄຫວໄດ້ດີໃນຫຼາຍດ້ານ ແລະ ມີຂໍ້ຫຍຸ້ງຍາກບາງດ້ານເປັນຕົ້ນແມ່ນການເກັບກຳຂໍ້ມູນຜົນກະທົບຂອງໂຄງການ ຕໍ່ກັບສະຖານທີ່ທຳການຜະລິດຂອງປະຊາຊົນຍັງບໍ່ທັນໄດ້ດີ; ໃຫ້ບໍລິສັດ ແລະ ພາກສ່ວນທີ່ກ່ຽວຂ້ອງຮີບຮ້ອນເກັບກຳຂໍ້ມູນຄືນ ແລະ ແກ້ໄຂໃຫ້ຖືກຕ້ອງສອດຄອງກັບລະບຽບກົດໝາຍ. ການລົງຕິດຕາມກວດກາໃນຄັ້ງນີ້ ແມ່ນໄດ້ຮັບທຶນສະໜັບສະໜູນຊ່ວຍເຫຼືອ ຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs).

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ