ໃນຕອນເຊົ້າວັນທີ 17 ພະຈິກ 2022 ທີ່ຫ້ອງປະຊຸມສະພາປະຊາຊົນແຂວງສະຫວັນນະເຂດ ຄະນະກໍາມະການເສດຖະກິດ, ແຜນການ ແລະ ການເງິນ ໄດ້ເປີດກອງປະຊຸມປຶກສາຫາລື ຮ່ວມກັບ 10 ພະແນກການ-ກົມກອງ ທີ່ຂຶ້ນກັບຄະນະກໍາມະການຂອງຕົນ ໂດຍໃຫ້ກຽດເປັນປະທານກອງປະຊຸມຂອງທ່ານ ຄຳຜັນ ຄູນສະຫວັນ ຮອງປະທານສະພາປະຊາຊົນແຂວງ, ມີບັນດາທ່ານປະທານ ແລະ ຮອງປະທານ ເສດຖະກິດ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງທີ່ສັງກັດຢູ່ໃນຄະນະກໍາມະການ ເສດຖະກິດ, ແຜນການ ແລະ ການເງິນ, ບັນດາຫົວໜ້າ-ຮອງຫົວໜ້າ ແລະ ຜູ້ຕາງໜ້າໃຫ້ ພະແນກການ-ກົມກອງ 10 ພາກສ່ວນ ພ້ອມທັງພະນັກງານວິຊາການທີ່ກ່ຽວຂ້ອງເຂົ້າາຮ່ວມ

ພາຍຫຼັງທີ່ທ່ານປະທານກອງປະຊຸມໄດ້ກ່າວຈຸດປະສົງໃນການເປີດກອງປະຊຸມຄັ້ງນີ້ແລ້ວ, ກອງປະຊຸມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດ, ຂອງພະແນກການ-ກົມກອງ 10 ພາກສ່ວນ, ຕາມຄໍາຖາມເຈົາະຈີ້ມທີ່ທາງສະພາປະຊາຊົນແຂວງໄດ້ສົ່ງໃຫ້ກ່ຽວກັບ  ແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດ ທີ່ໄດ້ຮັບຮອງເອົາໃນກອງປະຊຸມສະໄໝສາມັນເທື່ອທີ 03 ຂອງສະພາປະຊາຊົນແຂວງ ຊຸດທີ ll, ຜ່ານການຮັບຟັງການລາຍງານເຫັນໄດ້ຂໍສະດວກ ແລະ ບັນຫາຄວາມຫຍຸ້ງຍາກໃນການຈັດຕັ້ງປະຕິບັດວຽກງານ, ເຊິ່ງບັນດາທ່ານຜູ້ແທນກອງປະຊຸມໄດ້ມີການປະກອບຄໍາຄິດເຫັນແລກປ່ຽນໃນການຈັດຕັ້ງປະຕິບັດຄາດໝາຍສູ້ຊົນຂອງຂົງເຂດເສດຖະກິດ, ແຜນການ ແລະ ການເງິນ, ພ້ອມທັງຄົ້ນຄວ້າປຶກສາຫາລືການກະກຽມບັນດາເນື້ອໃນ ທີ່ຈະນໍາເຂົ້າກອງປະຊຸມສະໄໝສາມັນເທື່ອທີ 04 ຂອງສະພາປະຊາຊົນແຂວງ ຊຸດທີ ll ທີ່ຈະໄດ້ຈັດຂຶ້ນໃນຕົ້ນປີ 2023 ນີ້.

ໃນຕອນທ້າຍ, ທ່ານປະທານກອງປະຊຸມ ໄດ້ມີຄໍາເຫັນສະຫຼຸບສັງລວມບັນຫາ, ແລະ ສະແດງຄວາມຊົມເຊີຍຕໍ່ຜົນສໍາເລັດ ພ້ອມທັງເນັ້ນໃຫ້ທຸກພາກສ່ວນ ຈົ່ງສື່ບຕໍ່ເພີ່ມທະວີໃນການຈັດຕັ້ງປະຕິບັດບັນດາຄາດໝາຍສູ້ຊົນ ແລະ ການແກ້ໄຂບັນຫາຂໍ້ຄົງຄ້າງໃຫ້ມີຜົນສໍາເລັດ. ຂໍ້ມູນທີ່ທຸກພາກສ່ວນລາຍງານ ຄະນະກໍາມະການ ກໍ່ຄືສະພາປະຊາຊົນແຂວງສະຫວັນນະເຂດ ຈະສັງລວມ ຂໍ້ມູນ ແລ້ວລາຍງານຕໍ່ຄະນະປະຈໍາສະພາປະຊາຊົນແຂວງ ແລະ ສະພາແຫ່ງຊາດ ເຊິ່ງຈະເປັນຂໍ້ມູນພື້ນຖາມໃນການກະກຽມເນື້ອໃນໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ແລະ ສະພາປະຊາຊົນແຂວງ ທີ່ຈະດໍາເນີນໃນມໍ່ໆນີ້.

(ພາບ-ຂ່າວ: ວັນນະສຸກ ອິນສີຊຽງໃໝ່)