(ສພຊ) ວັນທີ 18 ພະຈິກ 2020 ທີ່ຫ້ອງປະຊຸມຄະນະໂຄສະນາອົບຮົມສູນກາງພັກ ນະຄອນ ຫລວງວຽງຈັນ; ກອງປະຊຸມຄົບຄະນະ ຄະນະສະມາຊິກສະພາແຫ່ງຊາດເພດຍິງ ປະຈໍາປີ 2020 ໄດ້ເປີດຂຶ້ນ ແລະ ອັດລົງດ້ວຍຜົນສໍາເລັດອັນຈົບງານຕາມຈຸດປະສົງ ແລະ ຄາດໝາຍທີ່ວາງໄວ້ ດ້ວຍບັນຍາກາດຟົດຟື້ນ ແລະ ມີຄວາມຮັບຜິດຊອບສູງ; ໂດຍການເປັນປະທານຂອງທ່ານ ນາງ ທັດສະດາພອນ ຈັນທະມາດ ປະທານຄະນະສະມາຊິກສະພາແຫ່ງຊາດ (ສສຊ) ເພດຍິງ; ເຂົ້າຮ່ວມມີທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ທັງເປັນຜູ້ຊີ້ນໍາຄະນະ ສສຊ ເພດຍິງ; ມີບັນດາທ່ານປະທານ-ຮອງປະທານກໍາມາທິການສະພາແຫ່ງຊາດ, ສສຊ ເພດຍິງ, ຕາງໜ້າສູນກາງສະຫະພັນແມ່ຍິງລາວ ແລະ ພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ.
ກອງປະຊຸມ, ໄດ້ຮັບຟັງການສະຫລຸບລາຍງານການເຄື່ອນໄຫວວຽກງານຮອບດ້ານໃນໄລຍະ 1 ປີຜ່ານມາຂອງຄະນະ ສສຊ ເພດຍິງ ປີ 2020 ແລະ ທິດທາງແຜນການເຄື່ອນໄຫວວຽກງານຈົນຮອດ ກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX; ບົດສະຫລຸບການເຄື່ອນໄຫວວຽກງານ 5 ປີ (2016-2020) ແລະ ທິດທາງແຜນການ 5 ປີ (2021-2025); ບົດລາຍງານຜົນຂອງການຕິດຕາມກວດກາການຈັດຕັ້ງປະຕິບັດກົດໝາຍ, ຍຸດທະສາດ ແລະ ນະໂຍບາຍ ກ່ຽວກັບການເຊື່ອມທັດສະນະບົດບາດຍິງ-ຊາຍ, ສິດສະເໝີພາບຍິງ-ຊາຍ, ການສ້າງຄວາມເຂັ້ມແຂງໃຫ້ແກ່ແມ່ຍິງ, ວຽກງານພັດທະນາ ແລະ ການປົກປ້ອງແມ່ຍິງ ແລະ ເດັກ ຂອງຄະນະ ສສສຊ ເພດຍິງ. ພ້ອມກັນນັ້ນ, ກອງປະຊຸມໄດ້ປຶກສາຫາລື, ປະກອບຄໍາຄິດເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ແລະ ກວ້າງຂວາງ; ພ້ອມນັ້ນ, ກອງປະຊຸມຈະໄດ້ມີການປັບປຸງຄືນບາງເນື້ອໃນຕາມການປະກອບຄໍາເຫັນຂອງບັນດາທ່ານຜູ້ແທນກອງປະຊຸມ ເພື່ອເຮັດໃຫ້ບັນດາເນື້ອໃນຂອງບົດດັ່ງກ່າວໃຫ້ມີຄວາມຄົບຖ້ວນ, ສອດຄ່ອງ, ຮັດກຸມ ແລະ ໜັກແໜ້ນຂຶ້ນຕື່ມ.
ພ້ອມດຽວກັນນີ້, ກອງປະຊຸມໄດ້ຮັບຟັງການໂອ້ລົມຂອງທ່ານ ນາງ ສີໃສ ລືເດດມູນສອນ ເຊິ່ງທ່ານໄດ້ເນັ້ນໃຫ້ສຸມໃສ່ຄົ້ນຄວ້າບາງບັນຫາສຳຄັນດັ່ງນີ້: ເອົາໃຈໃສ່ສືບຕໍ່ກໍ່ສ້າງຄວາມເຂັ້ມແຂງໃຫ້ແກ່ບັນດາ ສສຊ ເພດຍິງ ໂດຍສະເພາະໃຫ້ເບິ່ງຄືນການຊຸກຍູ້, ສົ່ງເສີມ ແລະ ການສ້າງຄວາມເຂັ້ມແຂງໃຫ້ແກ່ສະມາຊິກສະພາປະຊາຊົນເພດຍິງຂັ້ນແຂວງ ໃຫ້ສາມາດເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ; ເອົາໃຈໃສ່ເຮັດໜ້າທີ່ວຽກງານການລົງໂຄສະນາປຸກລະດົມ ການມີສ່ວນຮ່ວມຂອງຊຸມຊົນ, ບັນດາການຈັດຕັ້ງທີ່ເຮັດໜ້າທີ່ພັດທະນາ ແລະ ປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກ ໃຫ້ມີຄວາມຕື່ນຕົວຫລາຍຂຶ້ນກວ່າເກົ່າ; ເອົາໃຈໃສ່ເພີ່ມທະວີວຽກງານການລົງຕິດຕາມກວດກາ ແລະ ຊຸກຍູ້ໃນຂົງເຂດວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນໃຫ້ຫລາຍຂຶ້ນກວ່າເກົ່າ, ເຮັດຢ່າງຕໍ່ເນື່ອງ ແລະ ລຽນຕິດ ດ້ວຍການເອົາໃຈໃສ່ຊຸກຍູ້ແມ່ຍິງໃຫ້ມີບົດບາດໃນສັງຄົມ ແລະ ມີຄວາມສາມາດຕັດສິນບັນຫາໃນຄອບຄົວ ກໍຄືໃນໜ້າທີ່ວຽກງານຕ່າງໆໃຫ້ຄຽງບ່າຄຽງໄລ່ກັບເພດຊາຍຫລາຍຂຶ້ນກ່ວາເກົ່າ; ເອົາໃຈໃສ່ກວດກາຄືນການປະຕິບັດແຜນຍຸດທະສາດ ແລະ ນະໂຍບາຍກ່ຽວກັບການເຊື່ອມທັດສະນະບົດບາດຍິງ-ຊາຍ, ສິດສະເໝີພາບຍິງ-ຊາຍ, ການປະຕິບັດສັນຍາສາກົນ ແລະ ສົນທິສັນຍາກ່ຽວກັບແມ່ຍິງ ແລະ ເດັກ ທີ່ ສປປລາວ ໄດ້ເປັນພາຄີ ໃຫ້ໜັກແໜ້ນເຂັ້ມແຂງຂຶ້ນເລື້ອຍໆ; ສຸມໃສ່ການບຳລຸງສ້າງ ແລະ ຍົກລະດັບຄວາມຮູ້, ຄວາມສາມາດ ລວມທັງພາສາຕ່າງປະເທດໃຫ້ພະນັກງານທີ່ເປັນເສນາທິການໃຫ້ຄະນະ ສສຊ ເພດຍິງ ແລະ ໜ່ວຍສະພາປະຊາຊົນເພດຍິງຂັ້ນແຂວງ ຢ່າງເປັນປົກກະຕິ.
ແຫຼ່ງຂ່າວທີ່ມາ: ສະພາແຫ່ງຊາດ