ໃນວັນທີ 7 ກຸມພາ 2023 ທີ່ຫ້ອງປະຊຸມໃຫຍ່ຂອງສະພາປະຊາຊົນແຂວງຜົ້ງສາລີ ໄດ້ຈັດກອງປະຊຸມຄົບຄະນະ ປະຈໍາປີ 2022 ຂອງ 3 ຄະນະກໍາມະການ ແລະ ກອງປະຊຸມປະຈໍາປີ 2022 ຂອງຄະນະເລຂາທິການ ສະພາປະຊາຊົນແຂວງ ໂດຍການເປັນປະທານຂອງ ທ່ານ ສົມຈິດ ຫັບລະກອນ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ເລຂາ-ຮອງເລຂາທິການສະພາປະຊາຊົນ ແຂວງ, ມີບັນດາທ່ານສະມາຊິກສະພາປະຊາຊົນແຂວງ ປະຈຳເມືອງ ທີ່ເປັນກຳມະການສັງກັດຂອງບັນດາຄະນະກຳມະການ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.
ໃນກອງປະຊຸມ ໄດ້ຮັບຟັງ ທ່ານ ຄໍາດາ ໂສລະພົມ ປະທານຄະນະກໍາມະການຍຸຕິທໍາ ແລະ ປກຊ-ປກສ ຂຶ້ນຜ່ານຮ່າງບົດສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການປະຈໍາປີ 2023 ຂອງຄະນະກຳມະການ; ຮັບຟັງທ່ານ ນາງ ຈັນມະນີ ດວງພາສຸກ ປະທານຄະນະກໍາມະການເສດຖະກິດ, ແຜນການ ແລະ ການເງິນ ຜ່ານຮ່າງບົດສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການປະຈໍາປີ 2023 ຂອງຄະນະກຳມະການ; ຮັບຟັງທ່ານ ສົມຈິດ ລາວຈຸງ ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ຜ່ານຮ່າງບົດສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການປະຈໍາປີ 2023 ຂອງຄະນະກຳມະການ ແລະ ຮັບຟັງທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ຜ່ານຮ່າງບົດສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການປະຈໍາປີ 2023 ຂອງຄະນະເລຂາທິການສະພາປະຊາຊົນແຂວງ; ຫຼັງຈາກນັ້ນ ທ່ານປະທານກອງປະຊຸມກໍໄດ້ມີຄຳເຫັັນເຈາະຈີ້ມ ຕໍ່ກັບບັນດາເນື້ອໃນບົດສະຫຼຸບຂອງແຕ່ລະຄະນະກຳມະການ ແລະ ຄະນະເລຂາທິການສະພາປະຊາຊົນແຂວງ ເພື່ອເປັນທິດໃຫ້ແກ່ ບັນດາຜູ້ແທນກອງປະຊຸມ (ສະມາຊິກສະພາປະຊາຊົນແຂວງ) ໄດ້ປະກອບຄໍາຄິດຄໍາເຫັນຕໍ່ກັບເນື້ອໃນ ຢ່າງມີຄວາມຮັບຜິດຊອບສູງ ແລະ ເປັນຂະບວນຟົດຟື້ນ ເພື່ອເຮັດໃຫ້ເນື້ອໃນກອງປະຊຸມຄັ້ງນີ້ ຄົບຖ້ວນ, ສົມບູນ ແລະ ຖືກຕ້ອງສອດຄ່ອງກັບພາລະບົດບາດ, ສິດ ແລະ ໜ້າທີ່ຕາມກົດໝາຍກຳນົດໄວ້, ຮັບປະກັນເຮັດໃຫ້ການຈັດຕັ້ງປະຕິບັດໜ້າທີ່ວຽກງານໄດ້ມີຜົນສຳເລັດ ແລະ ການຈັດຕັ້ງໄດ້ຮັບການປັບປຸງໃຫ້ເຂັ້ມແຂງໄປເທື່ອລະກ້າວ.
ໃນຕອນທ້າຍ, ປະທານກອງປະຊຸມ ຍັງໃຫ້ກຽດໂອລົມ ໂດຍທ່ານໄດ້ຍ້ອງຍໍຊົມເຊີຍຕໍ່ກອງປະຊຸມຂອງພວກເຮົາໃນຄັ້ງນີ້ ທີ່ໄດ້ພ້ອມກັນສະຫຼຸບຕີລາຄາຜົນການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາ ແລະ ທິດທາງແຜນການປະຈໍາປີ 2023 ຂອງ 3 ຄະນະກຳມະການ ແລະ ຄະນະເລຂາທິການສະພາປະຊາຊົນແຂວງ, ເຊິ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ກຳນົດທິດທາງແຜນການປະຈໍາປີ 2023 ເພື່ອເປັນບ່ອນອີງໃນການເຄື່ອນໄຫວຈັດຕັ້ງປະຕິບັດໜ້າທີ່ວຽກງານ, ສະແດງຄວາມຊົມເຊີຍຕໍ່ບັນດາທ່ານທີ່ໄດ້ປະກອບຄຳຄິດເຫັນ ຕໍ່ບົດສະຫຼຸບຂອງ 3 ຄະນະກໍາມະການ ແລະ ຄະນະເລຂາທິການສະພາປະຊາຊົນແຂວງ ດ້ວຍຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ຮັບການມອບໝາຍ ໂດຍສະເພາະການປະຕິບັດພາລະບົດບາດ, ສິດ ແລະ ໜ້າທີ່ ໃນການເປັນເສນາທິການໃຫ້ຄະນະປະຈຳສະພາປະຊາຊົນແຂວງ ກໍຄືສະພາປະຊາຊົນແຂວງ; ນອກຈາກນັ້ນ, ທ່ານໄດ້ເນັ້ນ ແລະ ຮຽກຮ້ອງມາຍັງບັນດາຄະນະກໍາມະການ ແລະ ຄະນະເລຂາທິການສະພາປະຊາຊົນແຂວງ ກໍຄືຂອງບັນດາທ່ານ ສະມາຊິກສະພາປະຊາຊົນແຂວງ ທີ່ເປັນກໍາມະການສັງກັດ ຕ້ອງສຸມໃສ່ຈັດຕັ້ງປະຕິບັດແຜນການວຽກງານຫຼາຍດ້ານໃນປີ 2023 ໃຫ້ປະກົດຜົນເປັນຈິງ. ພິເສດແມ່ນພວກເຮົາຈະໄດ້ສຸມໃສ່ການຈັດຕັ້ງປະຕິບັດມະຕິກອງປະຊຸມໃຫ່ຍ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມປະຈໍາປີ 2023 ຂອງແຂວງ, ແຜນປະຈໍາປີ 2023 ຂອງສະພາແຫ່ງຊາດ ກໍຄືຂອງສະພາປະຊາຊົນແຂວງ ຊຸດທີ II. ຕ້ອງມີການປະສານສົມທົບຢ່າງກົມກຽວກັນ ໃນການສັງລວມ, ເກັບກຳຂໍ້ມູນ ແລະ ການສະຫຼຸບສ່ອງແສງລາຍງານເປັນປະຈຳ, ທັງເປັນການເຊີດຊູບົດບາດຂອງຕົນເອງ ໂດຍສະເພາະການພົວພັນກັບພາກສ່ວນກ່ຽວຂ້ອງຂອງອົງການປົກຄອງແຂວງ ກໍ່ຄືການປະສານງານພາຍໃນຄະນະກໍາມະການ, ຄະນະເລຂາທິການສະພາປະຊາຊົນແຂວງ ເພື່ອພ້ອມກັນສູ້ຊົນຈັດຕັ້ງປະຕິບັດບັນດາຄາດໝາຍຕ່າງໆໃຫ້ປະສົບຜົນສຳເລັດ ຕາມຄາດໝາຍທີ່ກຳນົດໄວ້.
ພາບ-ຂ່າວ: ສຸນທອງ ວິໄລຈິດ