ຕອນເຊົ້າຂອງວັນທີ 22 ທັນວາ 2025 ນີ້ ຢູ່ທີ່ສະໂມສອນຂອງແຂວງ ໄດ້ເປີດກອງປະຊຸມຄົບຄະນະ ປະຈໍາປີ 2025 ແລະ ວາງທິດທາງແຜນການປະຈໍາປີ 2026 ຂອງ 3 ຄະນະກໍາມະການຄື ຄະນະກໍາມະການເສດຖະກິດ,ແຜນການ ແລະ ການເງິນ; ຄະນະກຳມະການວັດທະນະທຳສັງຄົມ ແລະ ບັນດາເຜົ່າ ແລະ ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຫລວງນໍ້າທາ,ໂດຍການເປັນປະທານຂອງ ທ່ານ ຄຳພອນ ເຕີ່ນຈະເລີນ, ຄະນະປະຈຳສະພາປະຊາຊົນແຂວງ, ປະທານຄະນະເສດຖະກິດ,ແຜນການ ແລະ ການເງິນ ໃຫ້ກຽດເປັນປະທານຮ່ວມໂດຍ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈຳສະພາປະຊາຊົນແຂວງ, ກຳມະການພັກແຂວງ, ສະມາຊິກສະພາປະຊາຊົນແຂວງ, ບັນດາທ່ານຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງ ພ້ອມທັງແຂກຖຶກເຊີນເຂົ້າຮ່ວມທັງໝົດ 90 ກວ່າທ່ານ.
ໃນກອງປະຊຸມໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກປະຈຳ 5 ປີຂອງ 3 ຄະນະກໍາມະການ ເຊິ່ງໃນໄລຍະ5ປີທີ່ຜ່ານມາ 3 ຄະນະກໍາມະການ ພາຍໃນສະພາປະຊາຊົນແຂວງໄດ້ເອົາໃຈໃສ່ສຶກສາອົບຮົມດ້ານການເມືອງ ແນວຄິດ ໃຫ້ແກ່ພະນັກງານວິຊາການ ພາຍໃນຄະນະກໍາມະການຂອງຕົນຢ່າງເປັນປົກກະຕິ, ເຊິ່ງເຮັດໃຫ້ແຕ່ລະສະຫາຍ ມີແນວຄິດອຸ່ນອຽນທຸ່ນທ່ຽງ, ມີແນວຄິດຫຼັກໝັ້ນ, ການເມືອງໜັກແໜ້ນ, ເຊື່ອໝັ້ນຕໍ່ການນໍາພາຂອງພັກ, ປະຕິບັດລະບຽບກົດໝາຍຂອງລັດ, ມີສະຕິຕໍ່ການຈັດຕັ້ງ, ຕັ້ງໜ້າປະຕິບັດໜ້າທີ່ວຽກງານດ້ວຍຄວາມຮັບຜິດ ຊອບສູງ ແລະ ໄດ້ຮັບຜົນສໍາເລັດຕາມລະດັບຄາດໝາຍ, ມີຄວາມສາມັກຄີພາຍໃນ ແລະ ພາຍນອກຢ່າງໜັກແໜ້ນ ເອົາໃຈໃສ່ປະຕິບັດຕາມພາລະບົດບາດ, ສິດ ແລະ ໜ້າທີ່ເປັນເສນາທິການໃຫ້ແກ່ຄະນະປະຈໍາ ສະພາປະຊາຊົນແຂວງເປັນປົກກະຕິ, ໄດ້ເອົາໃຈໃສ່ໃນການຊຸກຍູ້, ປະສານສົມທົບອົງການປົກຄອງແຂວງ ໃນການສ້າງ ແລະ ປັບປຸງນິຕິກໍາໃຕ້ກົດໝາຍຂອງແຂວງຕາມມະຕິສະບັບເລກທີ 08/ສພຂ, ລົງວັນທີ 6 ກໍລະກົດ 2021 ວ່າດ້ວຍການຮັບຮອງເອົາແຜນການສ້າງ ແລະ ປັບປຸງນິຕິກຳໃຕ້ກົດໝາຍ 5 ປີ (2021-2025) ຂອງສະພາປະຊາຊົນແຂວງ; ຊຶ່ງໃນໄລຍະ 5 ປີ ຜ່ານມາ ໄດ້ພິຈາລະນາຮັບຮອງ ນິຕິກຳໃຕ້ກົດໝາຍຂອງແຂວງ ໄດ້ທັງໝົດຈໍານວນ 18 ສະບັບ,ໃນນີ້ ສ້າງໃໝ່ 15 ສະບັບ ແລະ ປັບປຸງ 03 ສະບັບ,ດ້ານການຕົກລົງບັນຫາສໍາຄັນພື້ນຖານຂອງທ້ອງຖິ່ນ, ໃນໄລຍະ 5 ປີ ຜ່ານມາ ໄດ້ເອົາໃຈໃສ່ໃນການ ຄົ້ນຄວ້າ, ພິຈາລະນາ ແລະ ປະກອບຄຳຄິດຄຳເຫັນ, ຕົກລົງບັນຫາສຳຄັນພື້ນຖານຂອງແຂວງ ຕາມລັດຖະທຳມະນູນ ແລະ ກົດໝາຍ ເປັນຕົ້ນ: ວຽກງານບຸກຄະລາກອນ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ, ວຽກງານສະພາປະຊາຊົນແຂວງ, ວຽກງານອົງການກວດສອບປະຈຳພາກເໜືອ, ອົງການກວດກາພັກ-ລັດແຂວງ, ວຽກງານສານປະຊາຊົນແຂວງ, ວຽກງານອົງການໄອຍະການປະຊາຊົນແຂວງ ແລະ ວຽກງານຍຸຕິທຳ ຊຶ່ງມີເນື້ອໃນທັງໝົດ 72 ເນື້ອໃນ ແລະ ໄດ້ຮັບຮອງອອກເປັນມະຕິສະພາປະຊາຊົແຂວງ ທັງໝົດ 53 ສະບັບ.ວຽກງານແກ້ໄຂຄໍາຮ້ອງທຸກຂອງພົນລະເມືອງໃນ 5 ປີຜ່ານມາໄດ້ຮັບຄໍາຮ້ອງທຸກຂອງພົນລະເມືອງ ທັງໝົດ 121 ສະບັບ ເປັນປະເພດ ຄໍາຮ້ອງຟ້ອງ 15 ສະບັບ, ຄໍາສະເໜີ 90 ສະບັບ, ຄໍາຮ້ອງຂໍຄວາມເປັນທໍາ 16 ສະບັບ, ວຽກງານພົບປະຜູ້ມີສິດປ່ອນບັດເລືອກຕັ້ງ, ພາຍໃນ 5 ປີ ບັນດາສະມາຊິກສະພາແຫ່ງຊາດ, ສະພາປະຊາຊົນແຂວງ ທີ່ສັງກັດພາຍໃນ 3 ຄະນະກໍາມະການ ໄດ້ນໍາເອົາຜົນສໍາເລັດ ຂອງກອງປະຊຸມສະໄໝສາມັນ, ວິສາມັນ ສະພາແຫ່ງຊາດ, ສະພາປະຊາຊົນແຂວງ ໄປເຜີຍແຜ່ໃຫ້ບັນດາພະແນກການອ້ອມຂ້າງແຂວງ, ບັນດາເມືອງ ແລະ ກຸ່ມບ້ານເປົ້າໝາຍ 480 ເທື່ອຈຸດ 597 ເທື່ອບ້ານ, ມີຜູ້ເຂົ້າຮ່ວມຮັບຟັງ ທັງໝົດ 46.991 ເທື່ອຄົນ, ຍີງ 16.957 ເທື່ອຄົນ ແລະ ສໍາລັບປີ 2025 ໄດ້ 88 ຈຸດ 98 ບ້ານ, ມີຜູ້ເຂົ້າຮ່ວມທັງໝົດ 6.897 ເທື່ອຄົນ, ຍີງ 1.922 ເທື່ອຄົນ.
ພ້ອມນັ້ນບັນດາທ່ານສະມາຊິກສະພາປະຊາຊົນແຂວງ ແລະ ຜູ້ແທນກອງປະຊຸມໄດ້ພ້ອມກັນສຸມໃສ່ປະກອບຄຳເຫັນໃສ່ບົດດັ່ງກ່າວເພື່ອໃຫ້ມີເນື້ອໃນຄົບຖ້ວນສົມບຸນ ແລະ ຮັດກຸມກວ່າເກົ່າ.
ໃນຕອນທ້າຍກອງປະຊຸມໄດ້ກອງປະຊຸມໄດ້ພິຈາລະນາ ແລະ ຮັບຮອງເອົາມະຕິ ວ່າດ້ວຍການຮັບຮອງເອົາ ບົດລາຍງານການເຄື່ອນໄຫວວຽກງານປະຈຳປີ 2025 ແລະ ທິດທາງແຜນການເຄື່ອນໄຫວປະຈໍາປີ 2026 ຂອງສາມຄະນະກຳມະການສະພາປະຊາຊົນແຂວງ ຊຸດທີ IV
ໂດຍ ນາງ ອຳພອນ ສີປະເສີດ