(ສພຊ) – ຕອນບ່າຍວັນຈັນທີ 07 ຕຸລາຜ່ານມາ ທີ່ສະພາແຫ່ງຊາດ, ໄດ້ມີກອງປະຊຸມຄົບຄະນະກຳມະການລະດັບຊາດປັບປຸງລັດຖະທຳມະນູນ ສະບັບປີ 2015 (ຄລຊ) ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ປະທານຄະນະກຳມະການລະດັບຊາດປັບປຸງລັດຖະທຳມະນູນ; ມີບັນດາທ່ານຮອງປະທານ, ຄະນະປະຈຳການ, ຫົວໜ້າອະນຸກໍາມະການຕ່າງໆຂອງ ຄລຊ ແລະ ພາກສ່ວນກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ທີ່ກອງປະຊຸມ, ໄດ້ຮັບຟັງລາຍງານຫຍໍ້ຜົນການຄົ້ນຄວ້າ, ວິໄຈ ແລະ ປັບປຸງລັດຖະທໍາມະນູນ ປີ 2015 ເຊິ່ງອະນຸກໍາມະການເນື້ອໃນ ໄດ້ເອົາໃຈໃສ່, ເປັນເຈົ້າການຜັນຂະຫຍາຍທິດຊີ້ນໍາຂອງກອງປະຊຸມກົມການເມືອງສູນກາງພັກທ້າຍເດືອນສິງຫາຜ່ານມາ; ພ້ອມກັນນັ້ນ, ຄະນະກໍາມະການລະດັບຊາດປັບປຸງລັດຖະທໍາມະນູນ ໄດ້ອອກຂໍ້ຕົກລົງແຕ່ງຕັ້ງ 6 ໜ່ວຍງານ ເພື່ອຄົ້ນຄວ້າ, ວິໄຈລົງເລິກແຕ່ລະບັນຫາ, ແຕ່ລະເນື້ອໃນຂອງລັດຖະທຳມະນູນ ຕິດພັນກັບທິດຊີ້ນໍາຂອງກົມການເມືອງສູນກາງພັກ ແລະ ອະນຸກໍາມະການເນື້ອໃນ ໄດ້ສັງລວມຜົນການຄົ້ນຄວ້າຂອງແຕ່ລະໜ່ວຍ; ນອກຈາກນັ້ນ, ຍັງໄດ້ຈັດກອງປະຊຸມຄົ້ນຄວ້າ, ປຶກສາຫາລື ແລະ ຮຽບຮຽງເປັນຮ່າງລັດຖະທຳມະນູນ ເມື່ອທ້າຍເດືອນກັນຍາ ແລະ ຕົ້ນເດືອນຕຸລານີ້ ເພື່ອນໍາມາລາຍງານ ແລະ ຂໍທິດຊີ້ນໍາໃນກອງປະຊຸມຄັ້ງນີ້.

ຫຼັງຈາກຜູ້ເຂົ້າຮ່ວມໄດ້ຄົ້ນຄວ້າ ແລະ ປະກອບຄຳເຫັນຢ່າງເລິກເຊິ່ງ, ກົງໄປກົງມາ ຕໍ່ບົດລາຍງານຫຍໍ້ດັ່ງກ່າວ; ທ່ານປະທານກອງປະຊຸມໄດ້ມອບໃຫ້ອະນຸກໍາມະການເນື້ອໃນຮີບຮ້ອນປັບປຸງຕາມຄໍາເຫັນຂອງຄະນະກໍາມະການລະດັບຊາດ ເພື່ອໄປລາຍງານຂໍທິດຊີ້ນໍາຈາກກອງປະຊຸມກົມການເມືອງສູນກາງພັກ ໃນລະຫວ່າງວັນທີ 14 -15 ຕຸລານີ້.

(ສອນສັກ ວັນວິໄຊ)