(ສພຊ) – ກອງປະຊຸມຄົບຄະນະກຳມາທິການວັດທະນະທຳ-ສັງຄົມ (ກວທສ) ປະ ຈຳປີ 2024 ໄດ້ຈັດຂຶ້ນເມື່ອວັນທີ 02-03 ພະຈິກນີ້ ທີ່ສະພາແຫ່ງຊາດ (ສພຊ) ໂດຍການເປັນປະທານຂອງທ່ານ ບຸນຕາ ເທບພະວົງ ຄະນະປະຈຳສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ ເຊິ່ງມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ; ບັນດາທ່ານສະມາຊິກສະພາແຫ່ງຊາດ (ສສຊ) ທີ່ເປັນກຳມະການຂອງ ກວທສ, ຮອງປະທານກຳ ມາທິການ, ຮອງເລຂາທິການ, ຮອງຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ; ຮອງລັດຖະມົນຕີ 4 ກະຊວງ ຄື: ສຶກສາທິການ ແລະ ກິລາ, ສາທາລະນະສຸກ, ແຮງງານ ແລະ ສະຫວັດດີການສັງຄົມ, ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ; ຜູ້ຕາງໜ້າຈາກສູນກາງສະຫະພັນແມ່ຍິງລາວ, ອົງການກາແດງລາວ, ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ, ອົງການຢູນິເຊັບ; ຄະ ນະກົມ, ຄະນະພະແນກ ແລະ ພະນັກງານຈາກພາກສ່ວນທີ່ກ່ຽວຂ້ອງ ພ້ອມດ້ວຍແຂກຖືກເຊີນ ເຂົ້າຮ່ວມຫຼາຍກວ່າ 90 ທ່ານ.
ທ່ານ ບຸນຕາ ເທບພະວົງ ໄດ້ກ່າວວ່າ: ກອງປະຊຸມຄັ້ງນີ້ ເພື່ອສະຫຼຸບຕີລາຄາການເຄື່ອນໄຫວວຽກງານປະຈໍາປີ 2024 ແລະ ທິດທາງການເຄື່ອນໄຫວປີ 2025 ຂອງກຳມາ ທິການວັດທະນະທຳ-ສັງຄົມ; ຄົ້ນຄວ້າ, ປຶກສາຫາລື ແລະ ສ້າງຄວາມເປັນເອກະພາບດ້ານທັດສະນະຕໍ່ບັນດາເນື້ອໃນຂົງເຂດວັດທະນະທໍາ-ສັງຄົມ ທີ່ຈະນໍາເຂົ້າຄົ້ນຄວ້າ, ພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງ ຊາດຊຸດທີ IX; ຜ່ານຮ່າງບົດລາຍງານຜົນການຕິດຕາມກວດກາການຈັດຕັ້ງປະຕິບັດຍຸດທະສາດການປະຕິຮູບລະບົບການສຶກສາ ແລະ ການພັດທະນາຊັບພະຍາກອນມະນຸດແຫ່ງຊາດໃນໄລຍະຜ່ານມາ, ບົດລາຍງານຜົນຕິດຕາມກວດກາຜົນການປະເມີນການຈັດຕັ້ງປະຕິບັດ 4 ກົດ ໝາຍຂົງເຂດວັດທະນະທຳ-ສັງຄົມ ຄື: ກົດໝາຍວ່າດ້ວຍການສຶກສາ, ກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ, ກົດໝາຍວ່າດ້ວຍແຮງງານ ແລະ ກົດໝາຍວ່າດ້ວຍປ້າຍ; ລາຍງານຄວາມຄືບໜ້າໃນການສ້າງ ແລະ ປັບປຸງກົດໝາຍ ຄື: ຮ່າງກົດໝາຍວ່າດ້ວຍການສຶກສາ (ສະບັບປັບປຸງ), ຮ່າງກົດໝາຍວ່າດ້ວຍການພັດທະນາສີມືແຮງງານ (ສ້າງໃໝ່) ທີ່ຈະນໍາເຂົ້າຜ່ານກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX. ນອກຈາກນີ້, ຍັງຈະໄດ້ຮັບຟັງການປະກອບຄໍາເຫັນຈາກ 4 ກະຊວງ ແລະ 1 ອົງ ການຕໍ່ບົດສະຫຼຸບຕີລາຄາການເຄື່ອນໄຫວວຽກງານປະຈໍາປີ 2024 ແລະ ທິດທາງແຜນການເຄື່ອນໄຫວປີ 2025 ຂອງກຳມາທິການວັດທະນະທຳ-ສັງຄົມ.
ໂອກາດດັ່ງກ່າວ, ທ່ານ ຄຳໃບ ດຳລັດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນເລັດທີ່ກຳມາທິການວັດທະນະທຳ-ສັງຄົມ ຍາດມາໄດ້ໃນໜຶ່ງປີຜ່ານມາ ພ້ອມທັງມີບາງຄຳເຫັນຕໍ່ກອງປະຊຸມ ໂດຍເນັ້ນໜັກໃຫ້ເອົາໃຈໃສ່ຊຸກຍູ້, ປະສານສົມທົບກັບຂະແໜງການ ແລະ ພາກສ່ວນກ່ຽວຂ້ອງ ເພື່ອເຂົ້າຮ່ວມແຕ່ຫົວທີໃນການສ້າງ, ປັບປຸງກົດໝາຍ ໃຫ້ສໍາເລັດຕາມແຜນການ ໂດຍໃຫ້ມີການທາບທາມຄວາມຄິດເຫັນຂອງປະຊາຊົນຢ່າງກວ້າງຂວາງ-ເລິກເຊິ່ງກວ່າເກົ່າ ເພື່ອຮັບປະກັນເນື້ອໃນກົດໝາຍມີຄວາມຄົບຖ້ວນ, ຮັດກຸມ, ສອດຄ່ອງກັບສະພາບຄວາມເປັນຈິງ ແລະ ສາມາດຈັດຕັ້ງປະຕິບັດໄດ້; ປະສານສົມທົບກັບກຳມາທິ ການຂອງສະພາແຫ່ງຊາດ ແລະ ຂະແໜງການທີ່ກ່ຽວຂ້ອງ ເພື່ອເຂົ້າຮ່ວມແຕ່ຫົວທີໃນການຄົ້ນຄວ້າ ແລະ ຕີລາຄາ, ປະເມີນຜົນການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ໃນຂົງເຂດວັດທະນະທຳ-ສັງຄົມ ເພື່ອຄົ້ນຄວ້າ, ວາງມາດຕະການ, ກຳນົດທິດທາງສູ້ຊົນຕໍ່ບັນດາຄາດໝາຍທີ່ມີຄວາມສ່ຽງທີ່ຈະບໍ່ບັນລຸ ແລະ ມີທ່າອຽງຖົດຖອຍ ໃຫ້ມີຜົນສຳເລັດດີຂຶ້ນ; ຕິດຕາມກວດກາວຽກງານຂົງເຂດວັດທະນະທໍາ-ສັງຄົມໃຫ້ຫຼາຍຂຶ້ນ ໂດຍສະເພາະຕິດຕາມກວດກາຕາມມະຕິກອງປະຊຸມສະພາແຫ່ງຊາດທີ່ໄດ້ຮັບຮອງແລ້ວ; ກວດກາຄືນບັນດາແຜນການ, ແຜນງານ, ໂຄງການ ແລະ ກິດຈະກຳໃນແຜນການ 5 ປີ ຂອງກຳມາທິການ (2021-2025) ແລ້ວຮີບຮ້ອນປະສານສົມທົບກັບພາກສ່ວນທີ່ກ່ຽວຂ້ອງ ແລະ ສສຊ ທີ່ເປັນກຳມະການຂອງກຳມາທິການ ເພື່ອຄົ້ນຄວ້າ ແລະ ຈັດຕັ້ງຜັນຂະຫຍາຍໃຫ້ສຳເລັດຕາມແຜນການ ພ້ອມທັງກະກຽມຮ່າງແຜນການ 5 ປີ (2026-2030) ໃຫ້ສຳເລັດ.
(ນາງ ກຸກກິກ ບຸດດາໄຊ)