(ສພຊ) – ວັນທີ 10 ພະຈິກຜ່ານມາ ທີ່ເມືອງວັງວຽງ ແຂວງວຽງຈັນ ໄດ້ມີກອງປະຊຸມຄົບຄະນະກໍາມາທິການແຜນການ, ການເງິນ ແລະ ການກວດສອບ (ກຜງສ) ໂດຍການເປັນປະທານຂອງທ່ານ ປອ. ລີເບີ ລີບົວປາວ ຄະນະປະຈໍາສະພາແຫ່ງຊາດ, ປະທານກໍາມາທິການແຜນການ, ການເງິນ ແລະ ການກວດສອບ; ມີບັນດາທ່ານປະທານ ແລະ ຮອງປະທານກໍາມາທິການພາຍໃນສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງ ກຜງສ, ທ່ານຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານຮອງລັດຖະມົນຕີກະຊວງການເງິນ, ທ່ານຮອງຜູ້ວ່າການທະນາຄານ ແຫ່ງ ສປປລາວ, ທ່ານຮອງປະທານອົງການກວດກາແຫ່ງລັດ, ທ່ານຮອງປະທານອົງການກວດສອບແຫ່ງລັດ ພ້ອມດ້ວຍບັນດາທ່ານຕາງໜ້າຈາກຂະແໜງການ, ອົງການກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ 80 ກວ່າທ່ານ.

ທ່ານ ປອ. ລີເບີ ລີບົວປາວ ໄດ້ກ່າວວ່າ: ຫົວຂໍ້ເນື້ອໃນທີ່ພາກສ່ວນກ່ຽວຂ້ອງຂອງລັດຖະບານ ນໍາມາລາຍງານໃນກອງປະຊຸມຄົບຄະນະຄັ້ງນີ້ ລ້ວນແຕ່ຕິດພັນກັບບັນຫາສໍາຄັນທີ່ໄດ້ຍົກຂຶ້ນໃນກອງປະຊຸມຮ່ວມລະຫວ່າງຄະນະປະຈໍາສະພາແຫ່ງຊາດ ກັບ ຄະນະລັດຖະບານ ເປັນຕົ້ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ, ແຜນກວດສອບ ແລະ ແຜນກວດກາ ທັງສະແດງຄວາມເຊື່ອໝັ້ນວ່າກອງປະຊຸມຄັ້ງນີ້ ຈະຊ່ວຍໃຫ້ສະມາຊິກສະພາແຫ່ງຊາດທີ່ເປັນກໍາມະການຂອງກໍາມາທິການແຜນການ, ການເງິນ ແລະ ການກວດສອບ ແລະ ຕາງໜ້າຂະແໜງການ ໄດ້ມີໂອກາດແລກປ່ຽນຄວາມຄິດຄວາມເຫັນໃນເບື້ອງຕົ້ນກ່ຽວກັບການສ້າງນິຕິກໍາໃນຂົງເຂດແຜນການ, ການເງິນ ແລະ ການກວດສອບ-ກວດກາ, ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດໃນແຕ່ລະປີ ເຊິ່ງຕິດພັນກັບພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບຂອງກໍາມາທິການ ທີ່ຈະຕ້ອງໄດ້ຕີລາຄາສົມທຽບກັບການລົງຕິດຕາມກວດກາຕົວຈິງຂອງສະ ມາຊິກສະພາແຫ່ງ ຊາດຢູ່ບັນດາເຂດເລືອກຕັ້ງຂອງຕົນ, ຜົນການສະແດງອອກທາງດ້ານຄວາມຄິດເຫັນ ແລະ ການປະເມີນຕີລາຄາສະພາບບັນຫາດັ່ງກ່າວ ຈະເປັນປະໂຫຍດຢ່າງຫຼວງຫຼາຍໃນການເສີມຂະຫຍາຍ ແລະ ເປີດກວ້າງແນວຄວາມຄິດທີ່ດີ ໃຫ້ສະມາຊິກສະພາແຫ່ງຊາດທີ່ເປັນກໍາມະການຂອງກໍາມາທິການ, ພາກສ່ວນທີ່ກ່ຽວຂ້ອງຂອງລັດຖະບານ ເພື່ອເປັນການອໍານວຍຄວາມສະດວກໃນການປະສານງານລະ ຫວ່າງອົງການນິຕິບັນຍັດ ກັບ ອົງການບໍລິຫານ ຕໍ່ກັບການພົວພັນວຽກງານ ເພື່ອພ້ອມກັນປະຕິບັດໜ້າທີ່ບໍລິການປະຊາຊົນໃຫ້ມີຄຸນນະ ພາບ ແລະ ປະສິດທິຜົນກວ່າເກົ່າ; ຈາກກອງປະຊຸມນີ້ ຈະເຮັດໃຫ້ມີຄວາມຮັບຮູ້ເຂົ້າ ໃຈ ແລະ ໄດ້ຮັບຄວາມສະດວກຫຼາຍຂຶ້ນ ໃນການສືບຕໍ່ປະຕິບັດໜ້າທີ່ ກໍຄືການສືບຕໍ່ສະ ໜັບສະໜູນວຽກງານຂອງສະພາແຫ່ງຊາດ ພິເສດແມ່ນວຽກງານຂອງກໍາມາທິການແຜນການ, ການເງິນ ແລະ ການກວດສອບ ໃຫ້ກ້າວສູ່ຄຸນນະພາບທີ່ດີຂຶ້ນ ເພື່ອເປັນການປະ ກອບສ່ວນເຂົ້າໃນການຊຸກຍູ້ ແລະ ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ລະບຽບການ, ຮັບປະກັນໃຫ້ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໄດ້ຮັບການຈັດຕັ້ງປະຕິບັດຕາມວິໄສທັດ, ຍຸດທະສາດ ແລະ ຂອບແຜນການ 5 ປີ ຂອງສະພາແຫ່ງຊາດຊຸດທີ IX.

ກອງປະຊຸມໄດ້ຮັບຟັງບົດສະຫຼຸບການເຄື່ອນໄຫວວຽກງານປີ 2024 ແລະ ທິດທາງແຜນການປີ 2025 ຂອງກໍາມາທິການ ແລະ ການພິຈາລະນາຮັບຮອງເອົາແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ, ແຜນກວດສອບ ແລະ ແຜນກວດກາ; ພ້ອມກັນນັ້ນ, ກໍໄດ້ຮັບຟັງການລາຍງານບັນຫາສໍາຄັນຂອງຊາດ ທີ່ລັດຖະ ບານໄດ້ຈັດຕັ້ງປະຕິບັດຜ່ານມາຕາມມະຕິຂອງສະພາແຫ່ງຊາດ ເຊິ່ງລາຍງານໂດຍກະຊວງແຜນການ ແລະ ການລົງທຶນ, ກະຊວງການເງິນ, ທະນາຄານ ແຫ່ງ ສປປລາວ, ອົງການກວດສອບແຫ່ງລັດ, ອົງການກວດກາແຫ່ງລັດ. ຈາກນັ້ນ, ຜູ້ເຂົ້າຮ່ວມໄດ້ສຸມສະຕິປັນຍາເຂົ້າໃນການຄົ້ນຄວ້າ, ສົນທະນາແລກປ່ຽນຄຳຄິດຄຳເຫັນຢ່າງເລິກເຊິ່ງ ແລະ ກວ້າງຂວາງ ເພື່ອຊອກໃຫ້ເຫັນສາເຫດທີ່ເກີດຂຶ້ນຕົວຈິງທັງດ້ານດີ ແລະ ຂໍ້ຄົງຄ້າງ ເພື່ອຄົ້ນຄວ້ານໍາສະເໜີວິທີແກ້ໄຂໃຫ້ສາມາດປະຕິບັດໄດ້ໃນສະເພາະໜ້າ ແລະ ຍາວນານ ເພື່ອຮັບປະກັນໃຫ້ແກ່ການລົງທຶນພັດທະນາທີ່ຍືນຍົງ ແລະ ຄວາມມີສະຖຽນລະພາບທາງດ້ານການເງິນໃຫ້ໝັ້ນຄົງ.

(ນາງ ອາລິນ ສຸພິມມະປະດິດ)