ໃນວັນທີ 13 ກຸມພາ 2024 ເວລາ 8 : 00 ໂມງ ຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ ໄດ້ຈັດກອງປະຊຸມຄົບຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 10 ແຂວງວຽງຈັນ ປະຈໍາປີ 2023 ຂື້ນ ທີ່ຫ້ອງປະຊຸມສະພາປະຊາຊົນແຂວງວຽງຈັນ ໂດຍການເປັນປະທານຂອງ ທ່ານ ບຸນສອນ ເພັດລາວັນ ປະທານຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ, ປະທານສະພາປະຊາຊົນແຂວງວຽງຈັນ; ໃຫ້ກຽດເຂົ້າຮ່ວມ ໂດຍ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ແຂວງວຽງຈັນ; ມີ ທ່ານ ສຈ ປອ ຈະເລີນ ເຍຍປ່າວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານກໍາມາທິການກົດໝາຍ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 10 ແຂວງວຽງຈັນ ເຂົ້າຮ່ວມມີບັນດາທ່ານ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 10 ແຂວງວຽງຈັນ ຫົວໜ້າຄະນະປະຈໍາເຂດເລືອກຕັ້ງເມືອງ 11 ເມືອງ, ຫົວໜ້າ-ຮອງຫົວໜ້າພະແນກການ ແລະ ພະນັກງານຂະແໜງການທີ່ກ່ຽວຂ້ອງຂອງສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອເປັນການສະຫຼຸບຕີລາຄາຄືນກ່ຽວກັບການຈັດຕັ້ງປະຕິບັດ ແລະ ການເຄື່ອນໄຫວວຽກງານຂອງຄະນະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10 ແຂວງວຽງຈັນ ປະຈໍາປີ 2023 ເຊິ່ງສະແດງໃຫ້ເຫັນດ້ານດີຜົນສໍາເລັດ, ດ້ານອ່ອນຂໍ້ຄົງຄ້າງ ແລະ ບົດຮຽນທີຖອດຖອນໄດ້ ໃນໄລຍະ 1 ປີຜ່ານມາ ພ້ອມທັງກໍານົດທິດທາງແຜນການເຄື່ອນໄຫວວຽກງານປະຈໍາປີ 2024 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10 ແຂວງວຽງຈັນ, ພ້ອມດຽວກັນນັ້ນ ກອງປະຊຸມຍັງໄດ້ມີການຄົ້ນຄວ້າປະກອບຄໍາເຫັນໃສ່ຮ່າງບົດດັ່ງກ່າວ ຢ່າງກົງໄປກົງມາ ແລະ ມີຈຸດສຸມ ເພື່ອເຮັດໃຫ້ເນື້ອໃນຄົບຖ້ວນສົມບູນ ແລະ ສອດຄ່ອງກັບການປະຕິບັດພາລະບົດບາດ, ສິດ ແລະ ໜ້າທີ ຂອງບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 10 ແຂວງວຽງຈັນ.
ໃນຕອນທ້າຍຂອງກອງປະຊຸມ ປະທານກອງປະຊຸມຍັງໄດ້ຮຽກຮອງໃຫ້ສະມາຊິກສະພາແຫ່ງຊາດເອົາໃຈໃສ ແລະ ຍົກສູງຄວາມຮັບຜິດຊອບຂອງຕົນໃນການເຄື່ອນໄຫວ, ຕິດຕາມກວດກາ ແລະ ເກັບກໍາຂໍ້ມູນສະພາບການຫ່າງສຽງສັງຄົມ ເພື່ອຮັບປະກັນໃນການປະຕິບັດໜ້າທີວຽກງານໃນຕໍ່ໜ້າໃຫ້ມີຜົນສໍາເລັດຕາມຄາດໜາຍທີວ່າງໄວ້.
ພາບ-ຂ່າວ ນາງ ບູລາຕີ ແສນທະວົງ ແລະ ທ້າວ ຄໍາພັນ ໄຊຍະປະຖຸມ