(ສພຊ) – ຕອນບ່າຍວັນທີ 19 ຕຸລານີ້ ທີ່ຫໍປະຊຸມແຫ່ງຊາດ, ກອງປະຊຸມຄົບຄະນະວາລະທີ 1 ຂອງກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ​​ ທັງເປັນປະທານ​​ AIPA ຄັ້ງທີ 45; ເຂົ້າຮ່ວມມີບັນດາທ່ານປະທານລັດຖະສະພາ, ຫົວໜ້າຄະນະຜູ້ແທນລັດຖະສະພາສະມາຊິກໄອປາ ແລະ ບັນດາທ່ານຫົວໜ້າຄະນະຜູ້ແທນລັດຖະສະພາສັງເກດການຂອງໄອປາ, ບັນດາທ່ານສະມາຊິກລັດຖະສະພາ, ທ່ານເລຂາທິການໃຫຍ່ໄອປາ, ທ່ານເລຂາທິການໃຫຍ່ອາຊຽນ ແລະ ບັນດາແຂກຖືກເຊີນ.

ໃນກອງປະຊຸມ ໄດ້ມີການປຶກສາຫາລື ແລະ ຮັບຮອງເອົາຕາຕະລາງກິດຈະກຳຂອງກອງປະຊຸມສະມັດຊາໃຫຍ່ໄອປາ ຄັ້ງທີ 45, ວາລະດຳເນີນກອງປະຊຸມສະມັດຊາໃຫຍ່ໄອປາ ຄັ້ງທີ 45, ຫົວຂໍ້ກອງປະຊຸມພົບປະກັບບັນດາລັດຖະສະພາສັງເກດການໄອປາ, ຫົວຂໍ້ກອງປະຊຸມປຶກສາຫາລືລະຫວ່າງກອງເລຂາໄອປາ ແລະ ອາຊຽນ, ອົງປະກອບຂອງກຳມາທິການ ແລະ ກອງປະຊຸມສະມັດຊາໃຫຍ່ໄອປາ ຄັ້ງທີ 45, ວັນທີ ແລະ ສະຖານທີ່ ຂອງກອງປະຊຸມສະມັດຊາໃຫຍ່ໄອປາ ຄັ້ງທີ 46, ປະເທດທີ່ຈະເປັນເຈົ້າພາບຈັດກອງປະຊຸມສະມັດຊາໃຫຍ່ໄອປາ ຄັ້ງທີ 47, ປະເທດທີ່ຈະເປັນເຈົ້າພາບຈັດກອງປະຊຸມຄະນະປະສານງານໄອປາ (AIPA Caucus) ຄັ້ງທີ 16, ພິຈາລະນາເຈົ້າພາບຈັດກອງປະຊຸມ AIPA CODD ຄັ້ງທີ 8 ແລະ ວຽກອື່ນໆ; ຈາກນັ້ນ, ຫົວໜ້າຄະນະຜູ້ແທນລັດຖະສະພາສະມາຊິກໄອປາ ແລະ ລັດຖະສະພາສັງເກດການໄອປາ, ເລຂາທິການໃຫຍ່ອາຊຽນ, ເລຂາທິການໃຫຍ່ໄອປາ, ຄູ່ຮ່ວມພັດທະນາຂອງໄອປາ ແລະ ລັດຖະສະພາທີ່ຖືກເຊີນ ຂຶ້ນກ່າວປະກອບຄຳຄິດຄຳເຫັນ.

(ນາງ ອາລິນ ສຸພິມມະປະດິດ)