ໃນຕອນເຊົ້າວັນທີ 07 ພະຈິກ 2024 ນີ້ ຢູ່ທີ່ຫ້ອງປະຊຸມສະພາປະຊາຊົນແຂວງໆສະຫວັນນະເຂດ ຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ຂອງສະພາປະຊາຊົນແຂວງ ໄດ້ຈັດກອງປະຊຸມຄົບ ຄະນະປະຈຳປີ 2024 ຂອງຕົນຂຶ້ນຢ່າງເປັນທາງການ ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ທັງເປັນຜູ້ຊີ້ນຳວຽກງານຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ມີປະທານ-ຮອງປະທານຄະນະກຳມະການ ແລະ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ທີ່ສັງກັດຢູ່ໃນຄະນະກຳມະການ, ມີ ປກສ ແຂວງ, ກອງບັນຊາການທະຫານແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ພາກສ່ວນທີ່ກ່ຽວຂ້ອງ ພ້ອມດ້ວຍຫົວໜ້າ-ຮອງຫົວ ໜ້າຂະແໜງ ແລະ ພະນັກງານພາຍໃນຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບເຂົ້າຮ່ວມ.

 

ກອງປະຊຸມໄດ້ຮັບຟັງການຜ່ານມະຕິຄະນະປະຈຳສະພາປະຊາຊົນແຂວງ ວ່າດ້ວຍການຈັດຕັ້ງ ແລະ ການເຄື່ອນໄຫວ ວຽກງານຂອງຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ; ຜ່ານຮ່າງບົດສະຫຼຸບການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການປະຈຳປີ 2025 ຂອງຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ແລະ ຜ່ານຮ່າງມະຕິກອງປະຊຸມວ່າດ້ວຍການຮັບຮອງເອົາມະຕິບົດສະຫຼຸບການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການປະຈຳປີ 2025 ຂອງຄະນະກຳມະການດັ່ງກ່າວ ຈາກນັ້ນບັນດາທ່ານຜູ້ແທນທີ່ເຂົ້າຮ່ວມກອງປະຊຸມ ກໍໄດ້ພ້ອມກັນຄົ້ນຄວ້າ ແລະ ປະກອບຄຳຄິດ-ຄຳເຫັນຢ່າງກົງໄປກົງ ດ້ວຍຄວາມຮັບຜິດຊອບສູງ ຕໍ່ກັບບັນດາເນື້ອໃນເອກະສານເພື່ອເຮັດໃຫ້ບັນດາເນື້ອໃນດັ່ງກ່າວ ມີຄວາມຖືກຕ້ອງສອດຄ່ອງສາມາດນຳມາຈັດຕັ້ງປະຕິບັດຕາມທິດທາງແຜນການທີ່ວາງໄວ້.

ໃນຕອນທ້າຍປະທານກອງປະຊຸມ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນເລັດທີ່ຄະນະກໍາມະການຍາດມາໄດ້ໃນໄລຍະຜ່ານມາ, ພ້ອມທັງມີບາງຄຳເຫັນຕໍ່ກອງປະຊຸມ ໂດຍເນັ້ນໜັກໃຫ້ເອົາໃຈໃສ່ຊຸກຍູ້, ປະສານສົມທົບກັບ ພາກສ່ວນກ່ຽວຂ້ອງ ເພື່ອຊອກຫາວິທີທາງແກ້ໄຂບັນຫາທີ່ຍັງຄົງງຂ້າງ, ເພື່ອຈະໄດ້ນໍາເນື້ອໃນຈິດໃຈ ແລະ ຄຳສະ ເໜີໄປ ແລະ ມີຄຳເຫັນໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ທີ່ຈະໄດ້ຈັດຂຶ້ນໃນກາງເດືອນພະຈິກນີ້.