ໃນຕອນເຊົ້າຂອງວັນທີ 23 ມັງກອນ 2023 ຢູ່ທີ່ຫ້ອງປະຊຸມສະໂມສອນເມືອງອະນຸວົງໄດ້ເປີດກອງປະຊຸມຂອງ 3 ຄະນະກຳມະການປະຈຳປີ 2022 ໄດ້ໄຂຂຶ້ນໃນໄລຍະເວລາທີ່ທົ່ວພັກ, ທົ່ວລັດ ແລະ ທົ່ວປວງຊົນລາວບັນດາເຜົ່າ ພວມຈັດຕັ້ງຜັນຂະຫຍາຍເນື້ອໃນກອງປະຊຸມໃຫຍ່ຄັ້ງທີ XI ຂອງພັກ, ກອງປະຊຸມໃຫຍ່ ຄັ້ງທີ I ຂອງແຂວງໄຊສົມບູນ, ແຜນພັດທະນາເສດຖະກິດສັງຄົມ 5 ປີ ຄັ້ງທີ II ຂອງແຂວງ, ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ມະຕິກອງປະຊຸມສະພາແຫ່ງຊາດ, ສະພາປະຊາຊົນຂັ້ນແຂວງຢ່າງເປັນຂະບວນກວ້າງຂວາງ, ໂດຍເປັນປະທານຮ່ວມ ທ່ານ ສົມດີ ວົງພະຈັນ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ທ່ານ ທອງພຽນ ກົງສະເດັດ ຮອງປະທານຄະນະກຳມະການຍຸຕິທຳ ແລະ ປກຊ-ປກສ, ທ່ານ ນ. ຄຳຫຼ້າ ທອງສີວອນ ຮອງປະທານຄະນະກຳມະການເສດຖະກິດ ແຜນການ ແລະ ການເງິນ ພ້ອມດ້ວຍຄະນະປະຈຳ, ສສຂ ປະຈຳເມືອງຈົນຮອດພະນັກງານສະພາເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້ກໍ່ເພື່ອຜັນຂະຫຍາຍມະຕິກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງໄຊສົມບູນ ຊຸດທີ II, ແຜນພັດທະນາ 5 ປີ (2021-2025) ຂອງສະພາປະຊາຊົນແຂວງ ກໍຄືຂອງ 3 ຄະນະກຳມະການໃຫ້ປະກົດເປັນຈິງ; ສະຫຼຸບຕີລາຄາຄືນການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2022 ແລະ ວາງທິດທາງແຜນການເຄື່ອນໄຫວວຽກງານປະຈຳປີ 2023 ຂອງຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ຄະນະກຳມະການເສດຖະກິດແຜນການ ແລະ ການເງິນ, ຄະນະກຳມະການຍຸຕິທຳ ແລະ ປກຊ-ປກສ; ເພື່ອຍົກສູງປະສິທິພາບການເຄື່ອນໄຫວວຽກງານຂອງບັນດາຄະນະກຳມະການ ຕາມການທີ່ໄດ້ກຳນົດໄວ້ໃນມະຕິຂອງຄະນະປະຈຳ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ 3 ຄະນະກຳມະການ.
ກອງປະຊຸມຄົບຄະນະຂອງ 3 ຄະນະກຳມະການປະຈຳປີ 2022 ນີ້ແມ່ນມີຄວາມສຳຄັນຫຼາຍເພາະເປັນກອງປະຊຸມຄັ້ງທຳອິດຂອງ 3 ຄະນະກຳມະການສະພາປະຊາຊົນແຂວງໄຊສົມບູນ ຊຸດທີ II ແລະ ໄຂຂຶ້ນໃນສະພາບການຂອງໂລກ ແລະ ພາກພື້ນມີການຜັນແປໄປຢ່າງສະຫຼັບຊັບຊ້ອນຊຶ່ງມີທັງກາລະໂອກາດທີ່ເອື້ອອຳນວຍ, ທັງມີສິງທ້າທາຍທົດສອບນາໆປະການ ແລະ ປະກົດການຫຍໍ້ທໍ້ອື່ນໆໃນສັງຄົມທີ່ສົ່ງຜົນກະທົບຕໍ່ການຈັດຕັ້ງປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືການປະຕິບັດສາມພາລະບົດບາດຂອງສະພາພວກເຮົາ, ດັ່ງນັ້ນເພື່ອຕອບສະໜອງກັບຄວາມຮຽກຮ້ອງຕ້ອງການໃນການຮັບໃຊ້ໜ້າທີ່ການເມືອງໃຫ້ແກ່ສະພາປະຊາຊົນແຂວງໄຊສົມບູນ, ມື້ນີ້ 3 ຄະນະກຳມະການຈຶ່ງໄດ້ເປີດກອງປະຊຸມຄົບຄະນະຂອງຕົນຂຶ້ນເພື່ອສະຫຼຸບຕີລາຄາການຈັດຕັ້ງປະຕິບັດວຽກງານປະຈຳປີ 2022 ແລະ ວາງທິດທາງແຜນການປະຈຳປີ 2023 ຂອງ 3 ຄະນະກຳມະການ.
(ແສງຕາວັນ ລັດຕະນະວົງ)