ກອງປະຊຸມຄົບຄະນະກຳມະການວັດທະນະທຳ-ສັງຄົມ ແລະບັນດາເຜົ່າ ສະພາປະຊາຊົນແຂວງຄຳມ່ວນ ( ຄວສຜ ) ປະຈຳປີ 2024 ໄດ້ຈັດຂຶ້ນໃນຕອນເຊົ້າວັນທີ 12 ທັນວາ 2024ນີ້ ທີ່ສະພາປະຊາຊົນແຂວງຄຳມ່ວນ ໂດຍການເປັນປະທານຂອງທ່ານ ນາງ ກ້ອນແກ້ວ ຫຼວງໄຊມຸງຄຸນ ກຳມະການຄະນະປະຈຳສະພາປະຊາຊົນຂັ້ນແຂວງ, ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ເປັນກຽດເຂົ້າຮ່ວມມີທ່ານ ບົວພັນ ແສງຈັນ ກໍາມະການພັກແຂວງ, ຮອງປະທານສະພາປະຊາຊົນແຂວງຄຳມ່ວນ; ມີບັນດາທ່ານຄະນະປະຈໍາສະພາປະຊາຊົນຂັ້ນແຂວງ, ຄະນະກໍາມະການ, ສະມາຊິກສະພາປະຊາຊົນຂັ້ນແຂວງທີ່ເປັນກຳມະການຂອງ ( ຄວສຜ ), ມີຫົວໜ້າພະແນກ, ຮອງຫົວໜ້າພະແນກ, ອົງການທຽບເທົ່າພະແນກ ແລະ ພະນັກງານຈາກພາກສ່ວນທີ່ກ່ຽວຂ້ອງ ພ້ອມດ້ວຍແຂກຖືກເຊີນ ເຂົ້າຮ່ວມ.

  

 

    ໃນກອງປະຊຸມໄດ້ຮັບຟັງຮ່າງບົດສະຫຼຸບການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການເຄື່ອນໄຫວປີ 2025 ຂອງກຳມະການວັດທະນະທຳ-ສັງຄົມ ແລະ ບັນດາເຜົ່າ, ພ້ອມນັ້ນ, ໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານຂອງ ພະແນກສຶກສາທິການ ແລະ ກິລາແຂວງ, ພະແນກສາທາລະນະສຸກແຂວງ, ພະແນກແຮງງານ ແລະ ສະຫວັດດີການສັງຄົມແຂວງ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ວຽກງານສາມສ້າງ ປະຈຳປີ 2024 ຂອງພະແນກພາຍໃນແຂວງ ແລະ ວຽກງານພັດທະນະຊົນນະບົດລຶບລ້າງຄວາມທຸກຍາກ ພະແນກກະສິກຳ ແລະປ່າໄມ້ແຂວງ, ຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາ.

   ໂອກາດດັ່ງກ່າວ, ທ່ານ ບົວພັນ ແສງຈັນ ຮອງປະທານສະພາປະຊາຂັ້ນແຂວງ ໄດ້ມີຄຳເຫັນໂອ້ລົມຕໍ່ກອງປະຊຸມກ່ອນອຶ່ນ ທ່ານໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ ກໍຄືບັນດາທ່ານສະມາຊິກສະພາປະຊາຊົນຂັ້ນແຂວງ ທີ່ສັງກັດຄະນະກໍາມະການ ທີ່ໄດ້ມີຄວາມເອົາໃຈໃສ່, ມີຄວາມພະຍາຍາມສູງ ໃນການນໍາພາການເຄື່ອນໄຫວປະຕິບັດວຽກງານໃນໄລຍະ 1 ປີຜ່ານມາທີ່ໄດ້ພ້ອມກັນຜ່ານຜ່າທຸກຄວາມຫຍຸ້ງຍາກຈັດຕັ້ງປະຕິບັດທຸກໜ້າທີ່ວຽກງານຈົນໄດ້ຮັບຜົນສໍາເລັດ, ຄຽງຄູ່ກັບຜົນງານໃນ 1 ປີຜ່ານມາທີ່ຍາດມາໄດ້ນັ້ນ ກໍຍັງມີບາງດ້ານຄົງຄ້າງທີ່ຈະຕ້ອງໄດ້ສືບຕໍ່ນໍາໄປຄົ້ນຄວ້າພິຈາລະນາແກ້ໄຂ ເພື່ອຕອບສະໜອງກັບຄວາມຮຽກຮອງຕ້ອງການຂອງໜ້າທີ່ການເມືອງໃນໄລຍະໃໝ່ ທີ່ພັກ-ລັດ ແລະ ສະພາປະຊາຊົນຂັ້ນແຂວງ ໄດ້ມອບໝາຍໃຫ້ ໃຫ້ນັບມື້ນັບດີຂຶ້ນຢ່າງບໍ່ຢຸດຢັ້ງ.

ໂດຍ: ເອື້ອ ມະໂນສິງ