(ສພຊ) – ວັນທີ 04 ພະຈິກຜ່ານມາ ທີ່ສະພາແຫ່ງຊາດ (ສພຊ) ໄດ້ມີກອງປະຊຸມຄົບຄະນະຂອງກຳມາທິການກົດໝາຍ (ກກໝ) ປະຈຳປີ 2024 ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການກົດໝາຍ; ເຂົ້າຮ່ວມມີບັນດາທ່ານຮອງປະທານກຳມາທິການພາຍໃນ ສພຊ, ຮອງລັດຖະມົນຕີກະຊວງຍຸຕິທຳ, ຮອງລັດຖະມົນຕີກະຊວງພາຍໃນ, ຮອງຫົວໜ້າຫ້ອງວ່າການສຳນັກງານປະທານປະເທດ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ບັນດາທ່ານສະມາຊິກສະພາແຫ່ງຊາດທີ່ສັງກັດ ກກໝ ແລະ ແຂກຖືກເຊີນ ເຂົ້າຮ່ວມ 60 ກວ່າທ່ານ.

ກອງປະຊຸມໄດ້ຮັບຟັງການລາຍງານ ແລະ ປະກອບຄຳເຫັນໃສ່ຮ່າງບົດສະຫຼຸບການເຄື່ອນໄຫວວຽກງານປີ 2024 ແລະ ທິດທາງແຜນການເຄື່ອນໄຫວວຽກງານປີ 2025 ຂອງກໍາມາທິການກົດໝາຍ; ຮ່າງແຜນການສ້າງ ແລະ ປັບປຸງກົດໝາຍ ປະຈຳປີ 2025 ຂອງຄະນະປະຈຳສະພາແຫ່ງຊາດ; ການລາຍງານຂອງກະຊວງຍຸຕິທຳ ແລະ ກະຊວງພາຍໃນ ກ່ຽວກັບວຽກງານສ້າງ ແລະ ປັບປຸງກົດໝາຍ, ວຽກງານໂຄສະນາເຜີຍແຜ່ກົດ ໝາຍ ແລະ ວຽກງານການຜັນຂະຫຍາຍມາດຕາຂອງກົດໝາຍ ອອກເປັນນິຕິກຳໃຕ້ກົດ ໝາຍ ປະຈຳປີ 2024; ແລະ ຜ່ານຮ່າງມະຕິກອງປະຊຸມຄົບຄະນະຂອງ ກກໝ ປະຈຳປີ 2024.

ທ່ານ ຄຳແພງ ວິລະພັນ ໄດ້ມີຄຳເຫັນເນັ້ນໜັກໃຫ້ສຸມໃສ່ກະກຽມຮຽບຮຽງບັນດາກົດໝາຍທີ່ຈະຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃຫ້ສຳເລັດໂດຍໄວ ເພື່ອໃຫ້ທັນໄດ້ປະກາດໃຊ້ຕາມກົດໝາຍ ແລະ ລະບຽບການກຳນົດ; ຮີບຮ້ອນປະສານສົມທົບກັບບັນດາກະຊວງ-ອົງການ ທີ່ເປັນເຈົ້າຂອງກົດໝາຍ ແລະ ບັນດາກຳມາທິການທີ່ກ່ຽວຂ້ອງ ເພື່ອກະກຽມແຜນການສ້າງ ແລະ ປັບປຸງກົດໝາຍ 5 ປີ (2026-2030) ແລະ ແຜນການສ້າງ ແລະ ປັບປຸງກົດໝາຍ ປີ 2025 ໃຫ້ສຳເລັດໂດຍໄວ ເພື່ອລາຍງານຕໍ່ຄະນະປະຈຳສະພາແຫ່ງຊາດ ພິຈາ ລະນາຕົກລົງ ແລະ ໃຫ້ທັນໄດ້ປະ ກາດໃຊ້ໃນຕົ້ນປີ 2025; ເອົາໃຈໃສ່ປະສານສົມທົບກັບບັນດາກະຊວງ-ອົງການທີ່ເປັນເຈົ້າຂອງກົດໝາຍ ເພື່ອສ້າງເງື່ອນໄຂຕ່າງໆໃນການນຳເອົາບັນດາກົດໝາຍທີ່ໄດ້ປະກາດໃຊ້ແລ້ວ ລົງໂຄສະນາເຜີຍ ແຜ່ຢູ່ສູນກາງ ແລະ ທ້ອງຖິ່ນ ເພື່ອໃຫ້ປະຊາຊົນລາວບັນດາເຜົ່າ ໄດ້ຮັບຮູ້, ເຂົ້າໃຈຢ່າງກວ້າງຂວາງ ດ້ວຍຫຼາຍວິທີ, ຫຼາຍຮູບການ.

(ນາງ ອາລິນ ສຸພິມມະປະດິດ)