ວັນທີ 6 ທັນວາ 2023 ທີ່ສຳນັກງານສະພາປະຊາຊົນແຂວງຄໍາມ່ວນ, ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມຄົບຄະນະປະຈໍາປີ 2023 ໂດຍການເປັນປະທານກອງປະຊຸມຂອງທ່ານ ຄໍາສຸກ ວັນທະວົງສາ ປະທານຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງ, ໂດຍການໃຫ້ກຽດເຂົ້າຮ່ວມມີ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ຜູ້ຊີ້ນຳວຽກງານຍຸຕິທຳ ແລະ ປກຊ-ປກສ, ມີບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງແຂວງ, ສະມາຊິກສະພາປະຊາຊົນຂັ້ນແຂວງທີ່ສັງກັດ ຄະນະກຳມະການຍຸຕິທຳ ແລະ ປກຊ-ປກສ, ມີ ຄະນະກອງບັນຊາການທະຫານແຂວງ, ປກສແຂວງ, ອົງການກວດກາລັດແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທຳແຂວງ ແລະ ພາກສ່ວນກ່ຽວຂ້ອງ.
ກອງປະຊຸມໄດ້ຮັບຟັງຮ່າງບົດສະຫຼຸບການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການ ປະຈຳປີ 2024 ຂອງຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄໍາມ່ວນ ຊຸດທີ II, ສະເໜີໂດຍທ່ານ ພັທ. ຈັນເພັງ ແກ້ວມະນີ ຮອງປະທານຄະນະກຳມະການຍຸຕິທຳ ແລະ ປກຊ-ປກສ, ຈາກນັ້ນ; ຜູ້ເຂົ້າຮ່ວມກອງປະຊຸມ ໄດ້ຜັດປ່ຽນກັນປະກອບຄໍາຄິດຄໍາເຫັນໃສ່ຮ່າງບົດສະຫຼຸບການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການ ປະຈຳປີ 2024 ຂອງກຳມະການຍຸຕິທຳ ແລະ ປກຊ-ປກສ, ພ້ອມນັ້ນກອງປະຊຸມກໍ່ໄດ້ຮັບຟັງການຈັດຕັ້ງປະຕິບັດວຽກງານ ປະຈໍາປີ 2023 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2024 ຂອງອົງການໄອຍະການປະຊາຊົນແຂວງ, ການຈັດຕັ້ງປະຕິບັດວຽກງານ ປະຈໍາປີ 2023 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2024 ສານປະຊາຊົນແຂວງ ແລະ ຮັບຟັງການລາຍງານການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຈາກປກສ ແຂວງ.
ໃນໂອກາດດັ່ງກ່າວ, ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳຕໍ່ ກອງປະຊຸມຄົບກຳມະການຄັ້ງນີ້ແມ່ນມີຄວາມໝາຍຄວາມສຳຄັນ ເຊິ່ງເນື້ອແທ້ແມ່ນບັ້ນກວດກາ-ຕີລາຄາຄືນໃນການຈັດຕັ້ງປະຕິບັດພາລະບົດບາດ ຂອງຄະນະກຳມະການ ຍຸຕິທຳ ແລະ ປກຊ-ປກສ ໃນການຈັດຕັ້ງປະຕິບັດເຄື່ອນໄຫວວຽກງານ, ການຕິດຕາມກວດກາ, ຊຸກຍູ້ການຈັດຕັ້ງປະຕິບັດລັດຖະທຳມະນູນ-ກົດໝາຍ ກໍຄືຄຳຮ້ອງ-ຄໍາສະເໜີຂໍຄວາມເປັນທຳ ຂອງນາຍ ແລະ ພົນທະຫານ, ນາຍ ແລະ ພົນຕໍາຫລວດ ຕະຫລອດຮອດ ປະຊາຊົນບັນດາເຜົ່າໃນທົ່ວແຂວງຄໍາມ່ວນ, ທີ່ຕິດພັນກັບການພົວພັນປະສານງານອຳນວຍຄວາມສະດວກເຊິ່ງກັນ ແລະ ກັນ ລະຫວ່າງສະພາປະຊາຊົນແຂວງ ກັບກອງກຳລັງ, ອົງການ, ພະແນກການທີ່ກ່ຽວຂ້ອງ ເພື່ອນຳເອົາຄວາມຍຸຕິທຳມາໃຫ້ສັງຄົມ; ພ້ອມກັນນັ້ນກອງປະຊຸມຄັ້ງນີ້ບໍ່ພຽງແຕ່ເປັນການສະຫລຸບຕີລາຄາບັນດາໝາກຜົນ, ບົດຮຽນໃນການຈັດຕັ້ງປະຕິບັດບັນດາມະຕິກອງປະຊຸມສະໄໝສາມັນເທື່ອທີ 4-5 ຂອງສະພາປະຊາຊົນແຂວງຄໍາມ່ວນ ຊຸດທີ II, ເພື່ອບັນລຸເປົ້າໝາຍໃນການຈັດຕັ້ງປະຕິບັດໜ້າທີວຽກງານ ມີຄວາມໂປ່ງໃສ, ເປັນທຳ ແລະ ຖືກຕ້ອງຕາມກົດໝາຍ, ເພື່ອເຮັດໃຫ້ວຽກງານຕິດຕາມກວດກາ ແລະ ແກ້ໄຂຄໍາຮ້ອງຂໍຄວາມເປັນທຳ ມີປະສິດທິພາບຍິ່ງຂຶ້ນ.
ໂດຍ: ເອື້ອ ມະໂນສິງ