(ສພຊ) – ວັນທີ 24-29 ກັນຍາ 2024 ທ່ານ ປອ. ກໍລະກັນ ພົມມະວົງ ກໍາມະການປະຈໍາກໍາມາທິການວັດ ທະນະທໍາ-ສັງຄົມ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 6 ແຂວງຫຼວງພະບາງ ໄດ້ສຳເລັດການເຂົ້າຮ່ວມກອງປະຊຸມຄະນະປະຈໍາກໍາມາທິການວັດທະນະທໍາ-ສັງຄົມ ຂອງລັດຖະສະພາອາຊີ (Asian Parliamentary Assembly – APA) ຢູ່ນະຄອນຫຼວງມົດສະກູ, ສະຫະພັນລັດເຊຍ ເຊິ່ງເປັນເຈົ້າພາບຈັດໂດຍສະພາດູມາ (ສະພາຕໍ່າລັດເຊຍ).

ກອງປະຊຸມຄັ້ງນີ້ ພາຍໃຕ້ການເປັນປະທານຂອງທ່ານ ໂບລິສ ເຊີນິຊອບ (Boris CHERNYSHOV) ຮອງປະທານຄະນະປະຈໍາສະພາດູມາ ໂດຍມີຜູ້ແທນຕາງໜ້າ 16 ປະເທດຈາກພາກພື້ນອາຊີເຂົ້າຮ່ວມ ຄື: ອາແຊກໄບຊານ, ບາເຣນ, ກໍາປູເຈຍ, ຈີນ, ອີຣານ, ອີຣັກ, ກຽກກິດສະຖານ, ລາວ, ປາແລດສະຕິນ, ​ປາກິດສະຖານ, ກາຕາ,​ ລັດເຊຍ, ຕັດຈີກິດສະຖານ, ຕວັກກີ, ສະຫະລັດ ອາຣັບ ເອມີເຣດ, ແລະ ຫວຽດນາມ ພ້ອມດ້ວຍບັນດາແຂກຂອງປະເທດເຈົ້າ ພາບ ເຊິ່ງໄດ້ປຶກສາຫາລື ແລະ ພິຈາລະນາເນື້ອໃນຮ່າງມະຕິກ່ຽວກັບຂົງເຂດກໍາມາທິການວັດທະນະທໍາ-ສັງຄົມ ເປັນຕົ້ນ ການສົ່ງເສີມຄວາມຫຼາກຫຼາຍທາງດ້ານວັດທະນະທໍາ ແລະ ປົກປັກຮັກສາມໍລະດົກອາຊີ, ການທ່ອງທ່ຽວ, ການເຊື່ອມໂຍງ, ສຸຂະພາບ, ຊັບພະຍາກອນມະນຸດ, ການຕ້ານການສໍ້ລາດບັງຫຼວງ, ການສົ່ງເສີມຊາວໜຸ່ມ ແມ່ຍິງ ແລະ ເດັກນ້ອຍ, ແລະ ອື່ນໆ ລວມທັງໝົດ 14 ຮ່າງມະຕິ.

ຄະນະຜູ້ແທນທັງໝົດ ໄດ້ມີໂອກາດຢ້ຽມຢາມພື້ນຖານການພັດທະນາເສດຖະກິດ-ສັງຄົມ ໂດຍການທັດສະນະສຶກສາການພັດທະນານະວັດຕະກໍາອັນທັນສະໄໝ, ລະບົບການເລືອກຕັ້ງອອນລາຍຂອງລັດເຊຍ ແລະ ທ່ຽວຊົມພະລາ ຊະວັງເກົ່າແກ່ແກຣມແລງ (Kremlin); ພ້ອມດຽວກັນນີ້, ຍັງໄດ້ວາງດອກໄມ້ໃຫ້ແກ່ນັກຮົບນິລະນາມ ຢູ່ຂ້າງກໍາແພງພະລາຊະວັງດັ່ງກ່າວອີກດ້ວຍ.