(ສພຊ) ເພື່ອພິຈາລະນາ ແລະ ຕົກລົງບັນຫາສໍາຄັນພື້ນຖານຂອງປະເທດຊາດ ຕາມພາລະບົດບາດ, ສິດ ແລະ ໜ້າທີ່ຂອງຄະນະປະຈຳສະພາແຫ່ງຊາດ ໃຫ້ມີປະສິດທິພາບ ແລະ ປະສິດທິຜົນ, ໃນລະຫວ່າງວັນທີ 01-02 ກຸມພາຜ່ານມາ ທີ່ສະພາແຫ່ງຊາດ ໄດ້ດໍາເນີນກອງປະຊຸມຄະນະປະຈຳສະພາແຫ່ງຊາດ ປະຈຳເດືອນມັງກອນ 2024 ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຜູ້ຮັກສາການແທນປະທານຄະນະປະຈໍາສະພາແຫ່ງຊາດ; ເຂົ້າຮ່ວມກອງປະຊຸມຍັງມີບັນດາທ່ານຮອງປະທານຄະນະປະຈໍາສະພາແຫ່ງຊາດ ແລະ ກຳມະການຄະນະປະຈໍາສະພາແຫ່ງຊາດ, ຮອງລັດຖະມົນຕີກະຊວງ-ອົງການທີ່ກ່ຽວຂ້ອງ, ຮອງປະທານກຳມາທິການ ແລະ ຮອງເລຂາທິການສະພາແຫ່ງຊາດ ພ້ອມດ້ວຍພາກສ່ວນທີ່ກ່ຽວຂ້ອງ.
ໃນກອງປະຊຸມ, ໄດ້ຮັບຟັງການລາຍງານແຜນການການສ້າງ ແລະ ປັບປຸງກົດໝາຍ ປະຈຳປີ 2024 ທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 7 ແລະ ເທື່ອທີ 8 ຂອງສະພາແຫ່ງຊາດຊຸດທີ IX ແລະ ການເຜີຍ ແຜ່ຄຳແນະນຳ ແລະ ມະຕິຂອງຄະນະປະຈຳສະພາແຫ່ງຊາດ; ລາຍງານຜົນການຢ້ຽມຢາມ ແລະ ເຮັດວຽກຮ່ວມກັບສະພາແຫ່ງຊາດ ແຫ່ງ ສສ.ຫວຽດນາມ ຂອງຄະນະຮັບຜິດຊອບຄົ້ນຄວ້າ ແລະ ຮຽບຮຽງປະຫວັດຂອງສະພາແຫ່ງຊາດ ແຫ່ງ ສປປ ລາວ; ລາຍງານຂໍທິດຊີ້ນຳກ່ຽວກັບການແຕ່ງຕັ້ງຄະນະກຳມະການລະດັບຊາດ ເພື່ອປັບປຸງລັດຖະທຳມະນູນ ແຫ່ງ ສປປ ລາວ ສະບັບປີ 2015; ຮ່າງແຜນການຕິດຕາມກວດກາຂອງກຳມາທິການບັນດາເຜົ່າ ປະຈຳປີ 2024 ກ່ຽວກັບການຈັດຕັ້ງປະຕິບັດມະຕິ 82/ສພຊ ໃນການຈັດຕັ້ງປະຕິບັດ ບັນດາຄາດໝາຍຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ; ຄົ້ນຄວ້າການສະເໜີແຕ່ງຕັ້ງບຸກຄະລາກອນຂອງສານປະຊາຊົນ; ລາຍງານການສັງລວມບັນດາມະຕິກອງປະຊຸມສະພາແຫ່ງຊາດ ແລະ ມະຕິຂອງຄະນະປະຈຳສະພາແຫ່ງຊາດ ໃນສະພາແຫ່ງຊາດຊຸດທີ IX; ແຜນດໍາເນີນການທາບທາມກົດໝາຍ 3 ສະບັບ ໃນຂົງເຂດສະພາແຫ່ງຊາດ; ຜົນການຄົ້ນຄວ້າໜັງສືສະເໜີຂອງລັດຖະບານກ່ຽວກັບການສົ່ງບັນຊີໂຄງການລົງທຶນຂອງລັດລະດັບຊາດ ເພື່ອສະໜັບສະໜູນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025), ການຈັດສັນແຜນງົບປະມານເຂົ້າໃສ່ໂຄງການກໍ່ສ້າງຕາຝັ່ງເຈື່ອນ; ຄວາມຄືບໜ້າການປັບປຸງຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໄລຍະ 3 ປີ (2021-2023); ຜົນການຄົ້ນຄວ້າໜັງສືສະເໜີຂອງອົງການກວດສອບແຫ່ງລັດ ກ່ຽວກັບການສະເໜີນະໂຍບາຍ ຫຼື ງົບປະມານສ່ວນໃດໜຶ່ງເພີ່ມຕື່ມ ໃນອັດຕາບໍ່ຫຼຸດ 5% ບົນພື້ນຖານມູນຄ່າ ຫຼື ຕົວເລກລວມຍອດປະຈຳປີຈາກການເກັບກູ້ ຫຼື ແກ້ໄຂຜົນການກວດສອບຕາມມະຕິກອງປະຊຸມສະພາແຫ່ງຊາດ; ລາຍງານແຜນການຕິດຕາມກວດກາປະເມີນຜົນການຈັດຕັ້ງປະຕິບັດກົດໝາຍຂົງເຂດວັດທະນະທໍາ-ສັງຄົມ ຈໍານວນ 4 ສະບັບ ຄື ກົດໝາຍວ່າດ້ວຍການສຶກສາ, ກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ, ກົດໝາຍວ່າດ້ວຍແຮງງານ ແລະ ກົດໝາຍວ່າດ້ວຍປ້າຍ; ລາຍງານການກະກຽມກອງປະຊຸມສໍາມະນາ WAIPA ຄັ້ງທີ II; ແຜນການກະກຽມ ແລະ ດໍາເນີນກອງປະຊຸມພົບປະແລກປ່ຽນບົດຮຽນ ລະຫວ່າງຄະນະເລຂາທິການສະພາແຫ່ງຊາດ ແລະ ຫ້ອງວ່າການສະພາແຫ່ງຊາດຫວຽດນາມ ຄັ້ງທີ XII ທີ່ຈະຈັດຂຶ້ນຢູ່ແຂວງອຸດົມໄຊ; ລາຍງານວຽກງານການເງິນກ່ຽວກັບການຈັດສັນງົບປະມານປະຈໍາປີ 2024 ຂອງສະພາແຫ່ງຊາດ.
ຈາກນັ້ນ, ບັນດາຜູ້ເຂົ້າຮ່ວມໄດ້ເອົາໃຈໃສ່ຄົ້ນຄວ້າປະກອບຄໍາເຫັນຢ່າງມີຈຸດສຸມ, ກົງໄປກົງມາ ຕໍ່ບັນດາບົດລາຍງານທີ່ນໍາມາພິຈາລະນາໃນກອງປະຊຸມຄັ້ງນີ້ ເພື່ອຮັບປະກັນການຕົກລົງບັນຫາຢ່າງມີຄວາມເປັນເອກະພາບ, ສາ ມາດເປັນບ່ອນອີງໃນການຈັດຕັ້ງປະຕິບັດ ແລະ ນໍາຜົນປະໂຫຍດລວມມາສູ່ປະເທດຊາດ ແລະ ປະຊາຊົນບັນດາເຜົ່າຢ່າງແທ້ຈິງ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)