(ສພຊ) ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນພຶດສະພາ 2022 ດຳເນີນລະຫວ່າງວັນທີ 1-2 ມິຖຸນາ 2022, ທີ່ຫ້ອງປະຊຸມຄະນະປະຈຳສະພາແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ, ມີບັນດາທ່ານ ຮອງປະທານຄະນະປະຈຳສະພາແຫ່ງຊາດ, ກໍາມະການຄະນະປະຈໍາສະພາແຫ່ງຊາດ, ບັນດາກະຊວງ, ອົງການກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ເພື່ອພິຈາລະນາ ແລະ ຕົກລົງບັນຫາສຳຄັນພື້ນຖານຂອງປະເທດຊາດ ຕາມພາລະບົດບາດ, ສິດ ແລະ ໜ້າທີ່ຂອງຄະນະປະຈຳສະພາແຫ່ງຊາດ ຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ໂດຍສູມໃສ່ການກວດກາບັນດາເນື້ອໃນທີ່ຈະນເຂົ້າພິຂາລະນາຕົກລົງຢູ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX, ການພິຈາລະນາຕົກລົງວຽກງານຈຳນວນໜຶ່ງຕາມການສະເໜີຊອງລັດຖະບານ ແລະ ພາກສ່ວນທີ່ກ່ຽວຂ້ອງ.
ທ່ານ ປອ. ໄຊສົມພອນ ພົມວິຫານ ໄດ້ກ່າວໄຂກອງປະຊຸມວ່າ: ປະຕິບັດຕາມກົດໝາຍວ່າດ້ວຍສະພາແຫ່ງຊາດ ແລະ ມະຕິິວ່າດ້ວຍການເຄື່ອນໄຫວຂອງຄະນະປະຈໍາສະພາແຫ່ງຊາດ, ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນພຶດສະພາ 2022 ໄດ້ໄຂຂຶ້ນໃນທ່າມກາງບັນຍາກາດ ທີ່ຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະເລຂາທິການສະພາແຫ່ງຊາດ, ສະຖາບັນຄົ້ນຄວ້ານິຕິກໍາສະພາແຫ່ງຊາດ ກໍາລັງສຸມໃສ່ກະກຽມໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ດ້ວຍຄວາມຫ້າວຫັນ ແລະ ເປັນຂະບວນຟົດຟື້ນ; ບັນດາກົງຈັກເສນາທິການຂອງສະພາແຫ່ງຊາດ ໄດ້ປະສານສົມທົບກັບບັນດາກະຊວງ, ອົງການ ຄົ້ນຄວ້າ, ຮຽບຮຽງເນື້ອໃນຂອງບັນດາຮ່າງບົດລາຍງານ, ຮ່າງກົດໝາຍ ແລະ ເອກະສານຕ່າງໆ ໃຫ້ມີຄຸນນະພາບ. ພ້ອມກັນນັ້ນ, ກົງຈັກເສນາທິການຈໍານວນໜຶ່ງ ກໍໄດ້ລົງເຄື່ອນໄຫວເກັບກໍາຂໍ້ມູນ, ລະດົມຄວາມຄິດເຫັນຈາກບັນດາອົງການຈັດຕັ້ງ ທັງພາກລັດ, ພາກເອກະຊົນ ກໍຄືປະຊາຊົນບັນດາເຜົ່າ ເພື່ອເປັນຂໍ້ມູນໃນການກະກຽມດ້ານເນື້ອໃນກອງປະຊຸມໃຫ້ສອດຄ່ອງກັບສະພາບຄວາມເປັນຈິງຂອງສັງຄົມ.
ໃນກາງເດືອນມິຖຸນາ 2022 ນີ້ ສະພາແຫ່ງຊາດ ກໍຈະດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ. ສະນັ້ນ, ການດໍາເນີນກອງປະຊຸມຄະນະປະຈໍາສະພາແຫ່ງຊາດ ໃນເດືອນພຶດສະພາ 2022 ນີ້ ຄະນະປະຈໍາສະພາແຫ່ງຊາດ ກໍຈະໄດ້ສຸມໃສ່ຮັບຟັງລາຍງານ ການກະກຽມບັນດາເອກະສານຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ເປັນຕົ້ນ ບົດລາຍງານກ່ຽວກັບແຜນພັດທະນາເສດຖະກິດ-ສັມຄົມ, ແຜນງົບປະມານແຫ່ງລັດ, ແຜນເງິນຕາ; ການກະກຽມບັນດາຮ່າງກົດໝາຍ ແລະ ບົດລາຍງານຕ່າງໆຂອງລັດຖະບານ ແລະ ພາກສ່ວນກ່ຽວຂ້ອງຕ່າງໆ. ນອກຈາກເນື້ອໃນດັ່ງກ່າວ ກອງປະຊຸມຄະນະປະຈໍາສະພາແຫ່ງຊາດ ກໍຈະໄດ້ພິຈາລະນາໜັງສືສະເໜີຂອງລັດຖະບານ ກ່ຽວກັບການພັດທະນາໂຄງການລົງທຶນຈໍານວນໜຶ່ງ, ການພິຈາລະນາບົດລາຍງານຂົງເຂດວຽກງານຂອງກໍາມາທິການການຕ່າງປະເທດ, ກໍາມາທິການປ້ອງກັນຊາດ-ປ້ອງກັນຄວາມສະຫງົບ, ກໍາມາທິການວັດທະນະທໍາ-ສັງຄົມ ແລະ ເອກະສານອື່ນຈໍານວນໜຶ່ງ.
ບັນດາເນື້ອໃນທີ່ນໍາມາພິຈາລະນາຕົກລົງ ຢູ່ກອງປະຊຸມຄະນະປະຈໍາສະພາແຫ່ງຊາດເທື່ອນີ້ ມີຄວາມສໍາຄັນຫຼາຍ ຕໍ່ການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ເຊິ່ງເປັນໜ້າທີ່ການເມືອງຂອງສະພາແຫ່ງຊາດ. ສະນັ້ນ, ຈຶ່ງສະເໜີມາຍັງບັນດາທ່ານ ຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະເລຂາທິການສະພາແຫ່ງຊາດ ຈົ່ງໄດ້ສຸມເຫື່ອແຮງ, ສະຕິປັນຍາ ເຂົ້າໃນການປຶກສາຫາລື, ຄົ້ນຄວ້າປະກອບຄໍາເຫັນ ໃສ່ວຽກງານສໍາຄັນຂອງຊາດ ທີ່ນໍາມາພິຈາລະນາຢູ່ກອງປະຊຸມຄັ້ງນີ້ ເພື່ອເຮັດໃຫ້ການຕົກລົງຂອງກອງປະຊຸມ ມີຄວາມເປັນເອກະພາບ, ສາມາດຈັດຕັ້ງປະຕິບັດ ແລະ ນໍາຜົນປະໂຫຍດມາສູ່ປະເທດຊາດ ແລະ ປະຊາຊົນບັນດາເຜົ່າ.