ຕອນເຊົ້າຂອງວັນທີ 21 ມີນາ 2024 ນີ້ຄະນະປະຈຳສະພາປະຊາຊົນແຂວງຫລວງນ້ຳທາ ໄດ້ເປີດກອງປະຊຸມຄະນະປະຈຳສະພາປະຊາຊົນແຂວງ ປະຈໍາເດືອນ ມີນາ 2024 ຂື້ນທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງ, ມີຄະນະປະຈຳສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ

ກອງປະຊຸມໄດ້ຮັບຟັງການລາຍງານກ່ຽວກັບຜົນການຈັດຕັ້ງປະຕິບັດບົດບັນທຶກຂອງຄະນະປະຈໍາສະພາປະຊາຊົນແຂວງ ສະບັບ ເລກທີ 09/ຄປຈຂ, ລົງວັນທີ 1 ກຸມພາ 2024 ແລະ ພິຈາລະພິຈາລະນາ ຮັບຮອງເອົາ ການສະເໜີຂອງທ່ານເຈົ້າແຂວງ ກ່ຽວກັບການດັດແກ້ແຜນການສ້າງ ແລະ ປັບປຸງນິຕິກໍາໃຕ້ກົດໝາຍ 5 ປີ (2021-2025) ຂອງແຂວງ; ຮັບຮອງເອົາ ການສະເໜີຂອງທ່ານເຈົ້າແຂວງ ກ່ຽວກັບການດັດປັບໂຄ່ງສ້າງລາຄານໍ້າປະປາ; ປຶກສາຫາລື ກ່ຽວກັບໂກຕາລັດຖະກອນ ປະຈໍາປີ 2024 ; ຄົ້ນຄວ້າບົດລາຍງານຂອງຄະນະກໍາມະການຍຸຕິທໍາ ແລະ ປກຊ-ປກສ ກ່ຽວກັບການສະເໜີໃຫ້ ສະພາແຫ່ງຊາດ ພິຈາລະນາຄົ້ນຄວ້າ ຄໍາຮ້ອງຂໍຄວາມເປັນທໍາຂອງປະຊາຊົນ; ຄົ້ນຄວ້າໜັງສືສະເໜີຂອງຄະນະປະຈໍາສະພາປະຊາຊົນແຂວງ  ກ່ຽວກັບສະເໜີເຈົ້າໜ້າທີ່ປ້ອງກັນເວນຍາມຫ້ອງການ ຈໍານວນ 2 ຄົນ ແລະ ສ້າງຕັ້ງປ້ອມຍາມ ທີ່ປະຕູທາງເຂົ້າ-ອອກຫ້ອງການ 1 ປ້ອມ; ຄົ້ນຄວ້າປະກອບຄໍາເຫັນຕໍ່ ຮ່າງຂໍ້ຕົກລົງຂອງຄະນະປະຈໍາສະພາປະຊາຊົນແຂວງ ວ່າດ້ວຍການແຕ່ງຕັ້ງຄະນະກວດກາພາຍໃນ; ພ້ອມທັງ ປະກອບຄໍາເຫັນຕໍ່ຮ່າງແຜນພັບ ຂອງສະພາປະຊາຊົນແຂວງຫຼວງນໍ້າທາ ຊຸດທີ 2; ຮັບຟັງການລາຍງານກ່ຽວກັບ ຕົວເລກບົດລາຍງານແຜນພັດທະນາເສດຖະກິດ-ສັງຄົມຂອງແຂວງ ຈໍານວນໜຶ່ງ ທີ່ບໍ່ສອດຄ່ອງກັບ ມະຕິກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ທີ່ໄດ້ເຊັນອອກໄປແລ້ວ; ນອກນັ້ນ ຍັງໄດ້ປຶກສາຫາລືວຽກງານພາຍໃນສະພາປະຊາຊົນແຂວງ ເພື່ອເຮັດໃຫ້ການຈັດຕັ້ງປະຕິບັດວຽກງານມີຜົນສຳເລັດ ແລະ ມີຄຸນະພາບຂຶ້ນກວ່າເກົ່າ.