ກອງປະຊຸມຄະນະປະຈຳສະພາປະຊາຊົນແຂວງ ຫລວງນ້ຳທາ ປະຈຳເດືອນຕຸລາ ໄດ້ໄຂຂຶ້ນໃນຕອນເຊົ້າວັນທີ່ 24 ຕຸລາ 2023 ຂຶ້ນທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ຄໍາຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໃຫ້ກຽດເຂົ້າຮ່ວມມີບັນດາທ່ານຄະນະປະຈຳພາຍໃນ ສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ ໄດ້ປຶກສາຫາລື ກ່ຽວກັບການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຫລວງນ້ຳທາ ຊຸດທີ II ທີ່ຈະໄຂຂຶ້ນໃນຕໍ່ໜ້າ ໂດຍສະເພາະ ຄວາມເອກະພາບກັນລະຫວ່າງ ວັນເວລາ, ສະຖານທີ່ປະຊຸມ, ງົບປະມານ ແລະ ເນື້ອໃນທີ່ຈະນໍາເຂົ້າພິນາລະນາ, ຮັບຮອງໃນກອງປະຊຸມ ພ້ອມທັງ ປຶກສາຫາລື ກ່ຽວກັບການກະກຽມ ແລະ ດໍາເນີນກອງປະຊຸມ ຄົບຄະນະຂອງສາມຄະນະກໍາມະການ ຂອງສະພາປະຊາຊົນແຂວງ; ກອງປະຊຸມປະຈໍາປີ 2023 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ  ແລະ ປຶກສາຫາລື ກ່ຽວກັບການເຂົ້າຮ່ວມກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ເຊັ່ນ: ງົບປະມານ, ການສະໜອງຂໍ້ມູນໃຫ້ ສສຊ ປະຈໍາເຂດເລືອກຕັ້ງ, ບົດປະກອບຄໍາເຫັນ ຕາງໜ້າຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ທີ່ຈະປະກອບຄໍາເຫັນຕໍ່ວຽກງານຂອງລັດ ຖະບານ, ກວດສອບ-ກວດກາ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ວຽກງານຂອງສະພາຊາດ ແລະ ຄົ້ນຄວ້າ ປະກອບຄໍາເຫັນຕໍ່ຮ່າງມະຕິຂອງຄະນະປະຈໍາສະພາປະຊາຊົນແຂວງ ວ່າດ້ວຍການດໍາເນີນກອງປະຊຸມຂອງຄະນະປະທານຄະນະປະຈໍາ ແລະ ກອງປະຊຸມຄະນະປະຈໍາສະພາປະຊາຊົນແຂວງ; ຄົ້ນຄວ້າ ໜັງສືສະເໜີຂອງທ່ານເຈົ້າແຂວງ ສະບັບເລກທີ 100/ຈຂ, ລົງວັນທີ 19 ຕຸລາ 2023 ກ່ຽວກັບການພິຈາລະນາ ຮັບຮອງເອົາເຈົ້າເມືອງໆວຽງພູຄາ; ຄົ້ນຄວ້າ ໜັງສືສະເໜີຂອງເລຂາທິການສະພາປະຊາຊົນແຂວງ ສະບັບເລກທີ 480/ຄລຂ.ສພຂ, ລົງວັນທີ 23 ຕຸລາ 2023 ກ່ຽວກັບການພິຈາລະນາ ແຕ່ງຕັ້ງຮອງເລຂາທິການສະພາປະຊາຊົນແຂວງຜູ້ໃໝ່; ຄົ້ນຄວ້າ ແລະ ຊີ້ນໍາບັນດາຄະນະກໍາມະການ ແລະ ຄະນະເລຂາທິການ ໃນການແກ້ໄຂຄໍາສະເໜີຂອງປະຊາຊົນ ທີ່ສະເໜີຜ່ານການເຜີຍແຜ່ຜົນສໍາເລັດກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ແລະ ສະພາປະຊາຊົນແຂວງ ພ້ອມດຽວກັນ ບັນດາທ່ານຄະນະປະຈຳສະພາປະຊາຊົນແຂວງ ຍັງໄດ້ສຸມໃສ່ປະກອບຄຳຄິດເຫັນຕໍ່ກັບການຈັດຕັ້ງປະຕິບັດວຽກງານພາຍໃນສະພາປະຊາຊົນແຂວງ ຢ່າງມີຈຸດສຸ່ມ ເພື່ອເຮັດໃຫ້ວຽກງານພາຍໃນສະພາປະຊາຊົນແຂວງ ໄດ້ປະຕິບັດຕາມພາລະບົດບາດຢ່າງມີຄຸນນະພາບຂື້ນກວ່າເກົ່າ.

ໂດຍ: ວັນນີ ແຝງບົວວັນ