(ສພຊ) – ວັນທີ 18 ຕຸລານີ້ ທີ່ຫໍປະຊຸມແຫ່ງຊາດ ໄດ້ມີກອງປະຊຸມຄະນະບໍລິຫານງານໄອປາ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ, ປະທານ AIPA ຄັ້ງທີ 45; ມີບັນດາທ່ານປະທານ, ຫົວໜ້າຄະນະຜູ້ແທນລັດຖະສະພາສະມາຊິກໄອປາ, ສະມາຊິກຄະນະບໍລິຫານງານໄອປາ, ເລຂາທິການໃຫຍ່ໄອປາ ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.
ທ່ານ ປອ. ໄຊສົມພອນ ພົມວິຫານ ກ່າວວ່າ: ການເຂົ້າຮ່ວມຂອງບັນດາທ່ານມີຄວາມໝາຍ ແລະ ຄວາມສຳຄັນເປັນຢ່າງຍິ່ງ ໃນການຢືນຢັນຄືນຄວາມໝາຍໝັ້ນຮ່ວມກັນທີ່ຈະສົ່ງເສີມການຮ່ວມມືຂອງລັດຖະສະພາທີ່ແໜ້ນແຟ້ນ ແລະ ເສີມຂະຫຍາຍການທູດພາຍໃນຄອບຄົວໄອປາ; ພ້ອມກັນນັ້ນ, ພວກເຮົາພະຍາຍາມສ້າງປະຊາຄົມອາຊຽນທີ່ມີຄວາມເປັນເອກະພາບ ແລະ ເຂັ້ມແຂງ, ສອດຄອງກັບເປົ້າໝາຍວິໄສທັດປະຊາຄົມອາຊຽນ 2025 ແລະ ຄວາມມຸ່ງມາດປາຖະໜາຮ່ວມກັນເພື່ອອະນາຄົດ.
ໃນກອງປະຊຸມ ໄດ້ມີການປຶກສາຫາລື ແລະ ພິຈາລະນາ 12 ວາລະຫົວຂໍ້ ແລະ ມີ 4 ຫົວຂໍ້ເພີ່ມຕື່ມ ຄື: 1. ຕາຕະລາງການດຳເນີນກອງປະຊຸມສະມັດຊາໃຫຍ່ໄອປາ ຄັ້ງທີ 45, ກອງປະຊຸມເວທີປຶກສາຫາລືຜູ້ນຳທາງການເມືອງເພດຍິງຂອງສະມາຊິກລັດຖະສະພາເພດຍິງໄອປາ ເຊິ່ງຈະຈັດຂຶ້ນໃນວາລະກອງປະຊຸມສະມັດຊາໃຫຍ່ໄອປາ ຄັ້ງທີ 45; 2. ວາລະກອງປະຊຸມສະມັດຊາໃຫຍ່ໄອປາ ຄັ້ງທີ 45 ປະກອບມີ: ກຳມາທິການວຽກງານການເມືອງ, ກຳມາທິການວຽກງານເສດຖະກິດ, ກຳມາທິການວຽກງານສັງຄົມ, ກອງປະຊຸມສະມາຊິກລັດຖະສະພາເພດຍິງໄອປາ, ກອງປະຊຸມສະມາຊິກລັດຖະສະພາໜຸ່ມໄອປາ, ກຳມາທິການວຽກງານຈັດຕັ້ງພາຍໃນໄອປາ; 3. ພິຈາລະນາຫົວຂໍ້ກອງປະຊຸມປຶກສາຫາລືກັບລັດຖະສະພາສັງເກດການໄອປາ; 4. ພິຈາລະນາຫົວຂໍ້ກອງປະຊຸມປຶກສາຫາລືລະຫວ່າງກອງເລຂາໄອປາ ແລະ ອາ ຊຽນ ຄັ້ງທີ 3; 5. ພິຈາລະນາອົງປະຊຸມກຳມາທິການປະຈຳ ແລະ ກອງປະຊຸມຕ່າງໆ ໃນວາລະກອງປະຊຸມສະມັດຊາໃຫຍ່ໄອປາ ຄັ້ງທີ 45 ປະກອບມີ: ກຳມາທິການວຽກງານການເມືອງ, ກຳມາທິການວຽກງານເສດຖະກິດ, ກຳມາທິການວຽກງານສັງຄົມ, ກອງປະຊຸມສະມາຊິກລັດຖະສະພາເພດຍິງໄອປາ, ກອງປະຊຸມສະມາຊິກລັດຖະສະພາໜຸ່ມໄອປາ, ກຳມາທິການວຽກງານຈັດຕັ້ງພາຍໃນ, ກອງປະຊຸມປຶກສາຫາລືກັບລັດຖະສະພາສັງເກດການ, ກອງປະຊຸມປຶກສາຫາລືລະຫວ່າງກອງເລຂາໄອປາ ແລະ ອາຊຽນ ຄັ້ງທີ 3, ກອງປະຊຸມຮ່າງຖະແຫຼງການຮ່ວມ; 6. ຮັບຟັງບົດລາຍງານການເຄື່ອນໄຫວວຽກງານຂອງກອງເລຂາໄອປາ ປະຈຳປີ 2023-2024 ໂດຍທ່ານເລຂາທິການໃຫຍ່ໄອປາ; 7. ວັນເວລາ ແລະ ສະຖານທີ່ ກອງປະຊຸມສະມັດຊາໃຫຍ່ໄອປາ ຄັ້ງທີ 46; 8. ວັນເວລາ ແລະ ສະຖານທີ່ ກອງປະຊຸມສະມັດຊາໃຫຍ່ໄອປາ ຄັ້ງທີ 47; 9. ພິຈາລະນາເຈົ້າພາບຈັດກອງປະຊຸມຄະນະປະສານງານໄອປາ (AIPA Caucus) ຄັ້ງທີ 16; 10. ພິຈາລະນາເຈົ້າພາບຈັດກອງປະຊຸມ AIPACODD ຄັ້ງທີ 8; 11. ພິຈາລະນາການມອບລາງວັນກຽດຕິຄຸນໃຫ້ຜູ້ທີ່ມີຜົນງານດີເດັ່ນໃນການປະກອບສ່ວນເຂົ້າໃນວຽກງານໄອປາ; 12. ການສະເໜີ ແລະ ຮັບຮອງເອົາລັດຖະສະພາສັງເກດການໃໝ່ໄອປາ: ສະພາແຫ່ງຊາດ ແຫ່ງ ລາຊະອານາຈັກບາເຣນ ແລະ ລັດຖະສະພາເຢຍລະມັນ; 13. ບັນຫາອື່ນໆ: ກອງປະຊຸມສຸດຍອດຜູ້ນຳໄອປາ, ການແຕ່ງຕັ້ງຄະນະສະເພາະກິດເພື່ອສ້າງກົນໄກທີ່ເໝາະສົມກ່ຽວກັບການແກ້ໄຂບັນຫາມຽນມາ, ການແຕ່ງຕັ້ງຄະນະກຳມະການຄົ້ນຄວ້າຄວາມເປັນໄປໄດ້ໃນການປ່ຽນຊື່ຈາກກອງປະຊຸມສະພາທີ່ປຶກສາໄອປາ ກ່ຽວກັບໄພອັນຕະລາຍຂອງຢາເສບຕິດ (AIPACODD) ເປັນກອງປະຊຸມສະພາທີ່ປຶກສາໄອປາ ກ່ຽວກັບອາຊະຍາກຳຂ້າມຊາດ (AIPA-ACT), ການສ້າງຕັ້ງຄະນະເຮັດວຽກ ເພື່ອສ້າງຄວາມເຂັ້ມແຂງໃຫ້ແກ່ໄອປາ ແລະ ລັດຖະສະພາສະມາຊິກໄອປາ.
ຈາກນັ້ນ, ຜູ້ເຂົ້າຮ່ວມໄດ້ຄົ້ນຄວ້າ ແລະ ພິຈາລະນາ ດ້ວຍຈິດໃຈທີ່ເຕັມໄປດ້ວຍໄມຕີຈິດມິດຕະພາບ, ເຄົາລົບເຊິ່ງກັນແລະກັນ ແລະ ມີວິໄສທັດຮ່ວມກັນ ເພື່ອການເຊື່ອມຈອດອາຊຽນທີ່ມີຄວາມເຂັ້ມແຂງຂຶ້ນກວ່າເກົ່າ, ເຮັດວຽກຮ່ວມກັນເພື່ອສ້າງພຶ້ນຖານໃຫ້ແກ່ກອງປະຊຸມສະມັດຊາໃຫຍ່ໄອປາ 45 ເປັນເວທີສຳລັບການປຶກສາຫາລືທີ່ມີໝາກມີຜົນ ແລະ ຜົນໄດ້ຮັບທີ່ມີການຫັນປ່ຽນໃໝ່ທີ່ຈະນຳເອົາຜົນປະໂຫຍດມາສູ່ປະເທດຊາດ ແລະ ພາກພື້້ນ.
(ນາງ ອາລິນ ສຸພິມມະປະດິດ)