(ສພຊ) ຄະນະຜູ້ແທນສະພາແຫ່ງຊາດລາວ ນຳໂດຍ ທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ ໄດ້ເຂົ້າຮ່ວມກອງປະຊຸມຄະນະບໍລິຫານງານ ແລະ ກອງປະຊຸມຄົບຄະ ນະຂອງສະມັດຊາລັດຖະສະພາອາຊີ (APA) ຄັ້ງທີ 14 ເຊິ່ງຈັດຂຶ້ນທີ່ນະຄອນຫຼວງບາກູ, ປະເທດອາແຊກໄບຊານ ໃນລະຫວ່າງວັນທີ 20-24 ກຸມພາ 2024 ໂດຍມີຄະນະຜູ້ແທນເຂົ້າຮ່ວມທັງໝົດ 300 ທ່ານ ທີ່ມາຈາກ 23 ປະເທດ ໃນນີ້, ຄະນະຜູ້ແທນນຳໂດຍປະທານລັດຖະສະພາ 7 ປະເທດ, ຮອງປະທານລັດຖະສະພາ 6 ປະເທດ ພ້ອມທັງຜູ້ຕາງໜ້າຈາກສະມາຊິກລັດຖະສະພາປະເທດສັງເກດການ 2 ປະເທດ ແລະ ອົງການຈັດຕັ້ງສັງເກດການ 6 ອົງການ.
ກອງປະຊຸມຄັ້ງນີ້, ຄະນະຜູ້ແທນທີ່ເຂົ້າຮ່ວມ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນພາຍໃຕ້ຫົວ ຂໍ້ “ຊຸກຍູ້ການຮ່ວມມືໃນພາກພື້ນເພື່ອການພັດທະນາແບບຍືນຍົງໃນອາຊີ” ພ້ອມທັງຄົ້ນຄວ້າ ແລະ ປະກອບຄຳເຫັນຕໍ່ບັນດາຮ່າງມະຕິທີ່ສະເໜີໃນກອງປະຊຸມຄະນະກຳມະການຕ່າງໆຂອງສະມັດຊາລັດຖະສະພາອາຊີເຊັ່ນ: ກອງປະຊຸມຄະນະກຳມະການການເມືອງ, ຄະນະກຳມະການເສດຖະກິດ ແລະ ການພັດທະນາແບບຍືນຍົງ, ຄະ ນະກຳມະການວັດທະນະທຳ-ສັງຄົມ, ແລະ ຄະນະກຳມະການງົບປະມານ ແລະ ແຜນການ.
ຜູ້ແທນສະພາແຫ່ງຊາດລາວໄດ້ມີຄຳເຫັນໃນວາລະກອງປະຊຸມຄົບຄະນະຄັ້ງທີ I ໂດຍໄດ້ຍົກໃຫ້ເຫັນສິ່ງທ້າທາຍຫຼາຍດ້ານທີ່ສົ່ງຜົນກະທົບຕໍ່ສະຖຽນລະພາບ ແລະ ຄວາມໝັ້ນຄົງໃນພາກພື້ນ ກໍຄືໃນໂລກ ເປັນຕົ້ນແມ່ນໄພທໍາມະຊາດ, ການປະທະກັນທາງດ້ານອາວຸດໃນພາກພື້ນ, ບັນຫາດ້ານການເງິນ, ອາຫານ, ພະລັງງານ; ພ້ອມດຽວກັນນັ້ນ ຄະນະຜູ້ແທນລາວ ກໍໄດ້ຍົກໃຫ້ເຫັນເຖິງນະໂຍບາຍການຕ່າງປະເທດ ສັນຕິພາບ, ເອ ກະລາດ, ມິດຕະພາບ ແລະ ການຮ່ວມມື ຂອງ ສປປລາວ ແລະ ບົດບາດຂອງສະພາແຫ່ງຊາດລາວ ໃນນາມເປັນຕົວແທນແຫ່ງສິດ, ຜົນປະໂຫຍດ ແລະ ຄວາມມຸ່ງມາດປາຖະໜາຂອງປະຊາຊົນລາວບັນດາເຜົ່າ ເຊິ່ງເປັນການປະ ກອບສ່ວນທີ່ສຳຄັນໃນການສ້າງສະພາບແວດລ້ອມທີ່ເອື້ອອຳນວຍໃຫ້ແກ່ສັນຕິພາບ, ການຮ່ວມມື, ການເຊື່ອມໂຍງ ແລະ ການພັດທະນາເສດຖະກິດ-ສັງຄົມ ເພື່ອບັນລຸເປົ້າໝາຍການພັດທະນາແບບຍືນຍົງ.
ຄະນະຜູ້ແທນລາວ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມໃນຖານະທີ່ເປັນສະມາຊິກລັດຖະສະພາອາຊີ ຕ້ອງຖືເອົາໂອກາດກອງປະຊຸມຄົບຄະນະຄັ້ງທີ 14 ຂອງ APA ເປັນເວທີເພື່ອເສີມຂະຫຍາຍບົດບາດນິຕິບັນ ຍັດໃນການຊຸກຍູ້ສັນຕິພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງຢູ່ພາກພື້ນ, ຊຸກຍູ້ຄວາມໄວ້ເນື້ອເຊື່ອໃຈ, ການຮ່ວມມື ແລະ ການຊ່ວຍເຫຼືອເຊິ່ງກັນ ແລະກັນຕາມກົນໄກບົດບາດຂອງລັດຖະສະພາ ເພື່ອຮັບມືກັບສິ່ງທ້າທາຍ ແລະ ແກ້ໄຂບັນຫາພາກພື້ນ ແລະ ສາກົນ.
ພິເສດ, ໃນກອງປະຊຸມຄັ້ງນີ້ ຄະນະຜູ້ແທນລາວ ໄດ້ແຈ້ງໃຫ້ບັນດາປະເທດສະມາຊິກ APA ຮັບຊາບວ່າ ໃນປີ 2024 ສະພາແຫ່ງຊາດລາວ ເປັນປະທານສະມັດຊາລັດຖະສະພາລະຫວ່າງຊາດອາຊຽນ (AIPA) ສະພາແຫ່ງຊາດລາວ ມີຄວາມມຸ່ງໝັ້ນທີ່ຈະເຮັດໜ້າທີ່ການທູດລັດຖະສະພາ ເສີມຂະຫຍາຍການຮ່ວມມືພາຍໃນອາຊຽນ ແລະ ສາກົນ ເພື່ອສັນຕິພາບ, ຄວາມໝັ້ນຄົງ ແລະ ການພັດທະນາ ໃນພາກພື້ນ ແລະ ໃນໂລກ.