(ສພຊ) ກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າ ສະພາແຫ່ງຊາດ ໄດ້ສົມທົບກັບ ໂຄງການ ສ້າງຄວາມເຂັ້ມແຂງ ໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ຈັດກອງປະຊຸມ ພາຍໃຕ້ຫົວຂໍ້ ຄະນະຊີ້ນຳໂຄງການ ສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS) ໃນຕອນເຊົ້າຂອງວັນທີ 19 ກັນຍາ 2023 ທີ່ສະພາແຫ່ງຊາດ, ເຂົ້າຮ່ວມກອງປະຊຸມໃນຄັ້ງນີ້ມີ ທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ, ຫົວໜ້າກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າ, ທ່ານ ນາງ ມາຕິນ ແທເຣີ ຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈຳ ສປປລາວ ເຂົ້້າຮ່ວມມີຫົວໜ້າກົມການເງິນ; ຕາງໜ້າຈາກກົມຮ່ວມມືສາກົນ ກະຊວງແຜນການ ແລະ ການລົງທຶນ; ຕາງໜ້າຈາກກົມ ອົງການຈັດຕັ້ງສາກົນ ກະຊວງການຕ່າງປະເທດ; ຜູ້ຕາງໜ້າອົງການພັດທະນາສາກົນປະເທດສະຫະລັດອາເມລິກາ ປະຈຳ ສປປລາວ ພ້ອມດ້ວຍບັນດາທ່ານຈາກກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າ, ຄະນະເລຂາທິການສະພາແຫ່ງຊາດ, ຕາງໜ້າຈາກອົງການສະຫະປະຊາຊາດເພືີ່ອການພັດທະນາ ປະຈຳ ສປປລາວ, ພະນັກງານໂຄງການສະເຕັບ ແລະ ແຂກຖືກເຊີນເຂົ້າຮ່ວມ.

ຈຸດປະສົງຂອງກອງປະຊຸມ ແມ່ນເພື່ອທົບທວນຄືນການຈັດຕັ້ງປະຕິບັດບັນດາກິດຈະກຳ ແລະ ຜົນງານ ນັບແຕ່ ກອງປະຊຸມຄະນະຊີ້ນຳໂຄງການຄັ້ງທຳອິດ ມາຮອດປັດຈຸບັນ, ແຜນວຽກປະຈຳໄຕມາດທີ 4 ປີ 2023 ແລະ ສະເໜີ ບັນດາບຸລິມະສິດ ໃນການສະໜັບສະໜູນທາງດ້ານວິຊາການ ໃນປີ 2024 ຂອງໂຄງການ. ພ້ອມທັງຮັບຟັງຜົນ ສຳເລັດການຈັດຕັ້ງປະຕິບັດແຜນວຽກປະຈຳ ໃນໄຕມາດທີ 1-3 ປີ 2023; ແຜນວຽກປະຈຳໄຕມາດທີ 4 ປີ 2023; ລາຍງານວຽກປິ່ນອ້ອມ ເຊັ່ນ: ວຽກງານການເງິນ, ແຜນບຸກຄະລາກອນ, ບໍລິສັດດ້ານການຈັດການ ແລະ ວຽກງານບຸລິມະສິດ ປະຈຳປີ 2024 ແລະ ແລກປ່ຽນຄຳຖາມ ພ້ອມທັງປຶກສາຫາລືຮ່ວມກັນດ້ວຍບັນຍາກາດທີ່ດີ.

ໂອກາດດັ່ງກ່າວ, ທ່ານ ປອ. ບຸນທັນ ບຸນວິໄລ ໄດ້ສະເໜີ ມາຍັງບັນດາທ່ານຜູ້ເຂົ້າຮ່ວມກອງປະຊຸມ ຈົົ່ງໄດ້ ເອົາໃຈໃສ່ໃນການຕິດຕາມການລາຍງານ, ການປະກອບຄຳເຫັນ ແລະ ຖອດຖອນບົດຮຽນ ກ່ຽວກັບຜົນການຈັດຕັັ້ງປະຕິບັດໂຄງການໃນໄລຍະຜ່ານມາ ພ້ອມທັງສົນທະນາ ແລກປ່ຽນ ກ່ຽວກັບການວາງແຜນໂຄງການໃນຕໍ່ໜ້າ ເພື່ອຮັບປະກັນປະສິດທິພາບ ແລະ ປະສິດທິຜົນຂອງການຈັດຕັ້ງປະຕິບັດເວົ້າລວມ, ເວົ້າສະເພາະ ແມ່ນການສະໜັບສະໜູນ ການປະຕິບັດ ພາລະ ບົດບາດອັນຊົງກຽດຂອງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອນຳຜົນປະໂຫຍດອັນ ສູງສຸດມາໃຫ້ແກ່ປະຊາຊົນ ໂດຍຜ່ານ 3 ພາລະບົດບາດ ເຊັ່ນ: ນິຕິບັນຍັດ, ການຕົກລົງບັນຫາສຳຄັນພື້ນຖານຂອງ ປະເທດຊາດ ແລະ ການຕິດຕາມກວດກາ.

(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)