ກອງປະຊຸມຂອງຄະນະກໍາມະການ ແລະ ຄະນະເລຂາທິການສະພາປະຊາຊົນແຂວງ ປະຈໍາປີ 2023 ແລະ ທິດທາງແຜນການປະຈໍາປີ 2024 ໄດ້ຈັດຂຶ້ນໃນວັນທີ 12 ມີນາ 2024 ນີ້ ຢູ່ທີ່ສະພາປະຊາຊົນແຂວງ ໂດຍການເປັນປະທານຂອງທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນແຂວງ ມີບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ຕາງໜ້າພະແນກການອ້ອມຂ້າງແຂວງ ຖືກເຊີນເຂົ້າຮ່ວມ.
ກອງປະຊຸມໄດ້ຮັບຟັງການລາຍງານ ການເຄື່ອນໄຫວວຽກງານປະຈໍາປີ 2023 ແລະ ທິດທາງແຜນການປະຈໍາປີ 2024 ຈາກທ່ານນາງ ຟອງສະໝຸດ ພົງວິຈິດ ກຳມະການພັກແຂວງ, ເລຂາທິການສະພາປະຊາຊົນແຂວງ ໂດຍໄດ້ເອົາໃຈໃສ່ເຄື່ອນໄຫວວຽກງານ ຕາມພາລະບົດບາດ ສິດ ແລະ ໜ້າທີ່ຂອງຕົນ ໃນຖານະທີ່ເປັນເສນາທິການໃຫ້ແກ່ຄະນະປະຈໍາສະພາປະຊາຊົນແຂວງກໍ່ຄືສະພາປະຊາຊົນແຂວງ, ໃນການຄົ້ນຄວ້າ-ສັງລວມເນື້ອໃນ ວຽກງານຮອບດ້ານ ສ້າງສິ່ງອໍານວຍຄວາມສະດວກ ໃຫ້ແກ່ການເຄື່ອນໄຫວວຽກງານ ຂອງຄະນະປະຈໍາສະພາປະຊາຊົນແຂວງກໍ່ຄືສະພາປະຊາຊົນແຂວງ ແລະ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ຄຸ້ມຄອງວຽກງານບໍລິຫານ ແຜນການ ແລະ ການເງິນ, ພ້ອມນີ້ຍັງໄດ້ປັບປຸງແບບແຜນວິທີເຮັດວຽກ ມີການແບ່ງງານແບ່ງຄວາມຮັບຜິດຊອບຢ່າງຈະແຈ້ງ ປະສານສົມທົບກັບຫ້ອງວ່າການແຂວງ ພາກສ່ວນທີ່ກ່ຽວຂ້ອງ ແຕ່ລະໄລຍະເປັນຢ່າງດີ ປະສານສົມທົບກັບບັນດາຄະນະກໍາມະການ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ, ພາກສ່ວນທີ່ກ່ຽວຂ້ອງ ໃນການສ້າງ ແລະ ປັບປຸງນິຕິກໍາ ຂອງສະພາປະຊາຊົນແຂວງໄດ້ແຕ່ງຕັ້ງຄະນະປະສານງານຮ່ວມກັນ ເພື່ອເປັນບ່ອນອີງໃນການເຄື່ອນໄຫວວຽກງານຂອງຕົນ ແລະ ນິຕິກໍາອື່ນໆ ໄດ້ທັງໝົດ 20 ກວ່າສະບັບ, ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອກະກຽມໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ລົງພົບປະ-ປະຊາຊົນ ແລະ ໂຄສະນາເຜີຍແຜ່ຜົນສຳເລັດຂອງກອງປະຊຸມສະໄໝສາມັນ ເທື່ອທີ 4 -6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຜ່ານການຈັດຕັ້ງປະຕິບັດສາມາດປະຕິບັດໄດ້ 132 ຈຸດ ມີ 101 ບ້ານ 9 ກົມກອງ 3 ສໍານັກງານ ແລະ ປະຕິບັດຢູ່ຂັ້ນແຂວງໄດ້ 19 ຈຸດ ຊຶ່ງມີຜູ້ເຂົ້າຮ່ວມຮັບຟັງ 9.396 ຄົນ, ຍິງ 3.546 ຄົນ ພ້ອມນີ້ຍັງໄດ້ເອົາໃຈໃສ່ໃນການສັງລວມຄໍາສະເໜີຂອງປະຊາຊົນ ທີ່ສະເໜີຜ່ານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ເພື່ອສະເໜີຕໍ່ພາກສ່ວນທີ່ກ່ຽວຂ້ອງ ພິຈາລະນາແກ້ໄຂ ແລະ ອະທິບາຍຊີ້ແຈ້ງຕໍ່ປະຊາຊົນ ແລະ ວຽກງານອື່ນໆ, ພ້ອມນີ້ໃນທີ່ປະຊຸມ ຕາງໜ້າແຕ່ລະຄະນະກໍາມະການ ໄດ້ພັດປ່ຽນກັນຂຶ້ນລາຍງານ ການຈັດຕັ້ງປະຕິບັດວຽກງານຂອງຕົນ ເພີ່ມທະວີການປະສານສົມທົບ ຢ່າງກົມກຽວເຊິ່ງກັນ ແລະ ກັນ ລະຫວ່າງກົງຈັກການຈັດຕັ້ງ ພາຍໃນສະພາປະຊາຊົນແຂວງ ລະຫວ່າງຄະນະເລຂາທິການສະພາປະຊາຊົນແຂວງ ກັບຫ້ອງວ່າການແຂວງ, ພາກສ່ວນທີ່ກ່ຽວຂ້ອງ ເພື່ອປະຕິບັດແຜນການໃຫ້ບັນລຸຕາມຄາດໝາຍທີ່ວາງໄວ້ ເອົາໃຈໃສ່ຈັດຕັ້ງປະຕິບັດ ລະບອບແບບແຜນວິທີເຮັດວຽກ ແຕ່ລະໄລຍະເພື່ອຮັບປະກັນ ການປະຕິບັດວຽກງານໃຫ້ມີປະສິດທິຜົນ ຈາກນັ້ນ, ບັນດາທ່ານໄດ້ເປັນເຈົ້າການສຸມສະຕິປັນຍາເຂົ້າໃສ່ການຄົ້ນຄວ້າປະກອບຄໍາຄິດຄໍາເຫັນຢ່າງສ້າງສັນ ແລະ ຊັກຖາມບັນດາພະແນກການຢ່າງກົງໄປກົງມາຕໍ່ບັນຫາທີ່ນຳມາປຶກສາຫາລືໃນກອງປະຊຸມຄັ້ງນີ້ ເຊິ່ງເປັນການສະແດງໃຫ້ເຫັນຄວາມຮຽກຮ້ອງຕ້ອງການ ແລະ ຄວາມມຸ່ງມາດປາຖະໜາຂອງພໍ່ແມ່ປະຊາຊົນ; ພາກສ່ວນກ່ຽວຂ້ອງກໍໄດ້ຂຶ້ນຊີ້ແຈງທຸກໆບັນຫາທີ່ຕັ້ງຂຶ້ນດ້ວຍຄວາມສ້າງສັນ ເຮັດໃຫ້ການພິຈາລະນາ-ຮັບຮອງເອົາບັນຫາຕ່າງໆ ບົນຈິດໃຈແຫ່ງຄວາມເປັນເອກະພາບທາງດ້ານທັດສະນະ, ແນວຄິດ, ລະບຽບຫຼັກການ ແລະ ຄວາມຮັບຜິດຊອບສູງຂອງບັນດາທ່ານ.
ຂ່າວ ແລະ ພາບ : ໂສລະຢ໋າ
