ໃນວັນທີ 9 ພຶດສະພາ 2022 ຢູ່ທີ່ຫ້ອງປະຊຸມຫ້ອງວ່າການແຂວງໄດ້ເປີດກອຊຸມກ່ຽວກັບການປະເມີນ ຜົນການຈັດຕັ້ງ ປະຕິບັດກົດໝາຍ 4 ສະບັບ (ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດແລະກົດໝາຍວ່າດ້ວຍແຮ່ທາດ) ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານ ເສດ ຖະກິດ-ການໂດຍການເປັນປະທານຂອງທ່ານສົມມາດພົລເສນາກຳມະການສູນກາງພັກຮອງປະທານສະພາພາແຫ່ງຊາດ, ໃຫ້ກຽດເຂົ້າຮ່ວມຂອງທ່ານບຸນໂຮມເທດທານີຮອງເລຂາພັກແຂວງ ປະທານສະພາປະຊາຊົນແຂວງ, ມີຄະນະປະຈຳພັກແຂວງ, ຮອງປະທານສະພາປະຊາຊົນແຂວງ, ເຈົ້າເມືອງ-ຮອງເຈົ້າເມືອງ 7 ເມືອງ, ຄະນະເລຂາທິການ, ຄະນະກໍາມະການ, ຫົວໜ້າ-ຮອງຫົວໜ້າພະແນກ, ກົມກອງອ້ອມຂ້າງແຂວງ ແລະ ພະນັກງານງານສະພາປະຊາຊົນແຂວງເຂົ້າຮ່ວມ.
ເພື່ອເປັນການທົບທວນຄືນ ແລະ ເນັ້ນໜັກເຖິງການຄຸ້ມຄອງລັດ ແລະ ຄຸ້ມຄອງເສດຖະກິດ-ສັງຄົມດ້ວຍກົດ ໝາຍ ທີ່ເປັນຄວາມຮຽກຮ້ອງຕ້ອງການຢ່າງພາວະວິໄສ ເລັ່ງທວງໃຫ້ບັນດາອົງການແຫ່ງສິດອຳນາດລັດ ເພີ່ມທະວີນິຕິທຳ ໃນການ ຄຸ້ມຄອງໂດຍກົດໝາຍ ໃຫ້ມີຄວາມສັກສິດ ແລະ ເຂັ້ມງວດ ເພື່ອເປັນເຄື່ອງມືດ້ານນິຕິກຳໃນການຄຸ້ມຄອງສັງຄົມ ແລະ ສ້າງ ເງື່ອນໄຂອຳນວຍຄວາມສະດວກຊຸກຍູ້ສົ່ງເສີມການລົງທຶນພາຍໃນ ແລະ ຕ່າງປະເທດ. ໃນທີ່ປະຊຸມໄດ້ ຮັບຟັງການ ລາຍງານ ການປະເມີນການຈັດຕັ້ງປະຕິບັດກົດໝາຍວ່າດ້ວຍທີ່ດິນ ຂອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ຮັບຟັງການລາຍງານການປະເມີນການຈັດຕັ້ງປະຕິບັດກົດໝາຍວ່າດ້ວຍການສົ່ງເສີມການລົງທຶນ ຂອງພະແນກການ ແລະ ການລົງທຶນ, ຮັບຟັງການລາຍງານການປະເມີນການຈັດຕັ້ງປະຕິບັດກົດໝາຍວ່າດ້ວຍຊັບສິນຂອງລັດ ຂອງພະແນກການເງິນ, ຮັບຟັງການລາຍງານການປະເມີນການຈັດຕັ້ງປະຕິບັດກົດໝາຍວ່າດ້ວຍແຮ່ທາດ ຂອງພະແນກພະລັງງານ ແລະ ບໍ່ແຮ່. ນອກນັ້ນ, ບັນດາຜູ້ແທນກອງປະຊຸມໄດ້ຍົກສູງຄວາມຮັບຜິດຊອບໜ້າທີ່ການເມືອງຂອງຕົນສຸມສະຕິປັນຍາ ໃນການຄົ້ນຄວ້າປະກອບຄຳເຫັນ ຕໍ່ການປະເມີນກົດໝາຍ 4 ສະບັບ ດັ່ງກ່າວນັ້ນ ເຊິ່ງທີ່ເຫັນວ່າກົດໝາຍທັງ 4 ສະບັບ ມີທັງຂໍ້ສະດວກ, ດ້ານດີ, ດ້ານອ່ອນ, ຍັງພົບຄວາມຫຍຸ້ງຍາກໃນການຈັດຕັ້ງປະຕິບັດຕົວຈິງ ແລະຊອກຫາວິທີການແກ້ໄຂ ຫຼື ກ້າວໄປເຖິງການສະເໜີປັບປຸງໃນຕໍ່ໜ້າ.
ໃນຕອນທ້າຍທ່ານສົມມາດພົລເສນາໄດ້ມີບາງຄຳເຫັນ ສະເໜີໃຫ້ພະແນກການກ່ຽວຂ້ອງ ຮີບຮ້ອນນຳເອົາຄຳເຫັນ ຕ່າງໆ ທີ່ກອງປະຊຸມຍົກຂຶ້ນ ໄປຄົ້ນຄວ້າແລ້ວປັບປຸງໃສ່ ບົດລາຍງານ ໃຫ້ມີຄວາມຄົບຖ້ວນ, ສົມບູນ ແລະ ສ່ອງແສງໄດ້ ການຈັດຕັ້ງປະຕິບັດຕົວຈິງ ຢ່າງພາວະວິໄສ, ສຳລັບສະພາປະຊາຊົນແຂວງ ແມ່ນໃຫ້ຮີບຮ້ອນສະຫຼຸບສັງລວມ ຜົນຂອງ ກອງປະຊຸມປະເມີນ 4 ກົດໝາຍ ໃນຄັ້ງນີ້ ຕໍ່ຄະນະຮັບຜິດຊອບຊີ້ນຳການປະເມີນກົດໝາຍ 4 ສະບັບ ຂອງສະພາແຫ່ງຊາດ ເພື່ອສະຫຼຸບສັງລວມລາຍງານ ຄະນະປະຈຳສະພາແຫ່ງຊາດ.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງສຸກສະຫວັນອິນທະແສງ