(ສພຊ) – ຕອນເຊົ້າວັນທີ 20 ຕຸລາ 2024 ທີ່ຫໍປະຊຸມແຫ່ງຊາດ ໄດ້ມີກອງປະ ຊຸມກຳມາທິການເສດຖະກິດ ທີ່ຈັດຂຶ້ນໃນລະຫວ່າງກອງປະຊຸມສະມັດຊາໃຫຍ່ລັດຖະ ສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໂດຍການເປັນປະທານຂອງທ່ານ ປອ. ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ເຊິ່ງມີສະມາຊິກລັດຖະສະພາຈາກບັນດາປະເທດສະມາຊິກອາຊຽນເຂົ້າຮ່ວມ.

ກອງປະຊຸມໄດ້ຮ່ວມກັນຄົ້ນຄວ້າ, ປຶກສາຫາລື ແລະ ພິຈາລະນາຮ່າງມະຕິຈຳ ນວນ 8 ສະບັບ ໃນຂົງເຂດວຽກງານເສດຖະກິດຄື: 1) ຮ່າງມະຕິວ່າດ້ວຍການເສີມສ້າງຄວາມສາມາດໃນການຮັບມືໄຊເບີ ຜ່ານການຮ່ວມມືຂອງລັດຖະສະພາອາຊຽນ ກ້າວໄປສູ່ເສດຖະກິດດິຈິຕອນທີ່ປອດໄພ ແລະ ມີຊີວິດຊີວາ; 2) ຮ່າງມະຕິວ່າດ້ວຍບົດບາດຂອງລັດຖະສະພາ ໃນການສະໜັບສະໜູນການປະຕິບັດຄໍາແນະນໍາຂອງອາຊຽນ ໃນການສົ່ງເສີມການລົງທຶນຢ່າງມີຄວາມຮັບຜິດຊອບໃນຂະແໜງການກະສິ ກຳ, ອາຫານ ແລະ ປ່າໄມ້; 3) ຮ່າງມະຕິວ່າດ້ວຍບົດບາດຂອງລັດຖະສະພາໃນການສົ່ງ ເສີມການລະດົມທຶນເພື່ອພັດທະນາການເຊື່ອມຈອດພື້ນຖານໂຄງລ່າງຂອງພາກພື້ນ ແນໃສ່ບັນລຸແຜນແມ່ບົດການເຊື່ອມຈອດອາຊຽນ ໃນປີ 2025 ແລະ ໃນຕໍ່ໜ້າ; 4) ຮ່າງມະຕິວ່າດ້ວຍບົດບາດລັດຖະສະພາໃນການຊຸກຍູ້ການເຊື່ອມໂຍງທາງດ້ານເຕັກໂນໂລຊີດິຈິຕອນອາຊຽນ ກ້າວໄປສູ່ການບັນລຸແຜນແມ່ບົດວ່າດ້ວຍການເຊື່ອມຈອດອາຊຽນ 2025 ແລະ ໃນຕໍ່ໜ້າ; 5) ຮ່າງມະຕິວ່າດ້ວຍການເສີມຂະຫຍາຍສ້າງລະບົບການຄ້າກາກບອນຂອງອາຊຽນ ເພື່ອເຕີບໂຕແບບຍືນຍົງ ແລະ ຄວາມຍືດຍຸ່ນທາງດ້ານສິ່ງແວດລ້ອມ ໃຫ້ເປັນອັນໜຶ່ງອັນດຽວກັນ; 6) ຮ່າງມະຕິວ່າດ້ວຍການໝູນໃຊ້ທ່າແຮງທາງດ້ານການທ່ອງທ່ຽວ ເຂົ້າໃນການຟື້ນຟູເສດຖະກິດຂອງອາຊຽນໃຫ້ມີຄວາມຍືນຍົງ; 7) ຮ່າງມະຕິວ່າດ້ວຍການຍົກລະດັບຂີດຄວາມສາມາດຂອງສະຖາບັນ ເພື່ອເຊື່ອມຈອດດ້ານການຂົນສົ່ງ, ການບິນ ແລະ ທ່າເຮືອທາງທະເລ ຢູ່ໃນພາກພື້ນອາຊຽນ; 8) ຮ່າງມະຕິວ່າດ້ວຍການສ້າງຕັ້ງສູນຄົ້ນຄວ້າປັນຍາປະດິດຂອງອາຊຽນ.

(ກົງທະນູຄຳ ພິພັດເສລີ)