(ສພຊ) – ໃນຕອນເຊົ້າຂອງວັນທີ 20 ຕຸລາ 2024, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ໄດ້ເປັນປະທານກອງປະຊຸມກຳມາທິການວຽກງານການເມືອງ ທີ່ຈັດຂຶ້ນໃນລະຫວ່າງກອງປະຊຸມສະມັດຊາໃຫຍ່ໄອປາ ຄັ້ງທີ 45. ໃນກອງປະຊຸມມີສະມາຊິກລັດຖະສະພາຈາກບັນດາປະເທດສະມາຊິກອາຊຽນເຂົ້າຮ່ວມ ເຊິ່ງໄດ້ຮ່ວມກັນຄົ້ນຄວ້າ, ປຶກສາຫາລື ແລະ ພິຈາລະ ນາຮ່າງມະຕິຈຳນວນ 4 ສະບັບ ໃນຂົງເຂດວຽກງານການເມືອງຄື: 1) ຮ່າງມະຕິວ່າດ້ວຍການຮັບຮອງເອົາບົດລາຍງານຜົນຂອງກອງປະຊຸມພົບປະລະຫວ່າງຜູ້ນຳອາຊຽນ ແລະ ໄອປາ ຄັ້ງທີ 13 ທີ່ຈັດຂຶ້ນໃນລະຫວ່າງກອງປະຊຸມສຸດຍອດອາຊຽນ ຄັ້ງທີ 45 ຜ່ານມາ; 2) ຮ່າງມະຕິວ່າດ້ວຍການນໍາໃຊ້ດິຈິຕອນແບບກວມ ລວມ ເຂົ້າໃນການສ້າງຄວາມເຂັ້ມແຂງໃຫ້ແກ່ປະຊາຊາດໃນພາກພື້ນ; 3) ຮ່າງມະຕິວ່າດ້ວຍການສົ່ງເສີມການຮ່ວມມືລະຫວ່າງປະຊາຄົມການເມືອງ-ຄວາມໝັ້ນຄົງອາຊຽນ ຜ່ານການເຊື່ອມໂຍງເຊື່ອມຈອດ ແລະ ການເຕີບໂຕແບບກວມ ລວມ; 4) ຮ່າງມະຕິວ່າດ້ວຍການສົ່ງເສີມການມີສ່ວນຮ່ວມຂອງປະຊາຊົນໃນການຮັກສາສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ.

ຜົນຂອງກອງປະຊຸມດັ່ງກ່າວ, ຈະຖືກນຳໄປລາຍງານຕໍ່ກອງປະຊຸມຄົບຄະນະວາລະທີ 2 ເພື່ອພິຈາລະນາຮັບ ຮອງກ່ອນພິທີປິດກອງປະຊຸມສະມັດຊາໃຫຍ່ໄອປາ ຄັ້ງທີ 45.

(ກົງທະນູຄຳ ພິພັດເສລີ)