ໃນລະຫວ່າງວັນທີ 28 ຫາ 29 ກັນຍາ 2023 ສະພາປະຊາຊົນແຂວງວຽງຈັນ ໄດ້ຈັດກອງປະຊຸມປະເມີນ ກົດໝາຍ 3 ສະບັບໃນຂົງເຂດປ້ອງກັນຊາດ-ປ້ອງກັນຄວາມສະຫງົບ ໂດຍການເປັນປະທານຮ່ວມ ຂອງ ທ່ານ ຄໍາພັນ ສິດທິດໍາພາ ເລຂາພັກແຂວງ ເຈົ້າແຂວງໆວຽງຈັນ, ທ່ານ ພົທ ສຸວອນ ເລືອງບຸນມີ ຄະນະປະຈໍາ, ຮອງປະທານສະພາແຫ່ງຊາດ ຜູ້ຊີ້ນໍາວຽກງານກໍາມາທິການ ປກຊ-ປກສ ສະພາແຫ່ງຊາດ, ທ່ານ ບຸນສອນ ເພັດລາວັນ ປະທານສະພາປະຊາຊົນແຂວງວຽງຈັນ ເຂົ້າຮ່ວມມີ  ຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊົນແຂວງ, ປະທານຄະນະກໍາມະການ ແລະ ຄະນະຮັບຜິດຊອບປະເມີນ ຈາກ 2 ກໍາລັງ ປກຊ-ປກສບັນດາທານຈາກອົງການມະຫາຊົນຂັ້ນແຂວງ ສະຫະພັນນັກຮົບເກົ່າແຂວງ, ແນວລາວສ້າງຊາດແຂວງ, ກວດກາແຂວງ,ອົງການໄອຍະການແຂວງ, ພະແນກຍຸຕິທໍາແຂວງ, ສານປະຊາຊົນແຂວງ ແລະ ຄະນະຮັບຜິດຊອບທີ່ກ່ຽວຂ້ອງຂອງສະພາປະຊາຊົນແຂວງເຂົ້າຮ່ວມຢ່າງພ້ອມພຽງ

ກອງປະຊຸມໄດ້ຮັບຟັງການລາຍງານ ຜົນການປະເມີນ ການຈັດຕັ້ງປະຕິບັດກົດໜາຍວ່າດ້ວຍ ການປ້ອງກັນຊາດ, ກົດໝາຍວ່າດ້ວຍ ນາຍທະຫານກອງທັບປະຊາຊົນລາວ ແລະ  ກົດໝາຍວ່າດ້ວຍ ກໍາລັງປ້ອງກັນຄວາມສະຫງົບປະຊາຊົນ ກໍ່ເພື່ອເປັນການປະຕິບັດຕາມແຜນການຂອງສະພາແຫ່ງຊາດໃນການສ້າງ ແລະ ປັບປຸງກົດໝາຍໃຫ້ມີຄວາມຖຶກຕ້ອງສອດຄອ່ງກັບລັດຖະທໍາມະນູນ ແລະ ກົດໝາຍ ເທື່ອລະກ້າວ, ທັງຮັບປະກັນເຮັດໃຫ້ເນື້ອໃນກົດໝາຍຈໍານວນ 3 ສະບັບ ໃນຂົງເຂດປ້ອງກັນຊາດ-ປ້ອງກັນຄວາມສະຫງົບ ມີຄວາມຄົບຖ້ວນຮັດກຸມ ແລະ ສາມາດຈັດຕັ້ງປະຕິບັດໄດ້ ພ້ອມດຽວກັນນັ້ນກອງປະຊຸມໄດ້ປະກອບຄໍາຄິດຄໍາເຫັນໃສ່ບັດດາຮ່າງກົດໝາຍ ແນ່ໃສເຮັດໃຫ້ເນື້ອໃນມີຄວາມຖຶກຕ້ອງ ແລະ ສອດຄ່ອງກັບສະພາບຕົວຈິງ ເພື່ອສັງລວມງານໃຫ້ສະພາແຫ່ງຊາດ ທີ່ຈະນໍາເຂົ້າກອງປະຊຸມສະໄໜສາມັນເທື່ອທີ່ 6 ຂອງສະພາແຫ່ງຊາດ ຊຸດທີ IX

ໃນຕອນບາຍຂອງວັນດຽດກັນນັ້ນ ຄະນະທີມງານກໍາມາທິການປ້ອງກັນຊາດ ແລະ ປ້ອງກັນຄວາມສະຫງົບສະພາແຫ່ງຊາດ, ສະພາປະຊາຊົນແຂວງວຽງຈັນ ແລະ ພາກສວນທີ່ກ່ຽວຂ້ອງໄດ້ລົງຢ້ຽມຢາມຢູ່ທີ່ຟາມໄກ່ລາດ ບ້ານບຸ້ງພ້າວ  ແລະ ຢ້ຽມຢາມກ່ອງຜະລິດເຂົ້າກອ່ງ ບ້ານແຈ້ງ ເມືອງທຸລະຄົມແຂວງວຽງຈັນ.

ພາບ-ຂ່າວ ບູລາຕີ ແສນທະວົງ