ໂດຍ ອີງຕາມກົດໝາຍວ່າດ້ວຍການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສະບັບເລກທີ 12/ສພຊ, ລົງວັນທີ 15 ພະຈິກ 2016 ແລະ ປະຕິບັດຕາມ ແຈ້ງການ ຂອງຄະນະເລຂາທິການສະພາແຫ່ງຊາດ ສະບັບເລກທີ 179/ຄລສ.ກວທສ, ລົງວັນທີ 8 ພຶດສະພາ 2023 ວ່າດ້ວຍແຜນຕິດຕາມກວດກາຂອງກຳມາທິການວັດທະນະທຳ-ສັງຄົມ ສະພາແຫ່ງຊາດ.

ໃນວັນທີ 16 ພຶດສະພາ 2023 ທີ່ສະພາປະຊາຊົນແຂວງຄໍາມ່ວນ ໄດ້ເປີດກອງປະຊຸມການຈັດຕັ້ງປະຕິບັດແຜນການຕິດຕາມກວດກາການປະຕິບັດຍຸດທະສາດການປົກປ້ອງສັງຄົມແຫ່ງຊາດ ໂດຍການເປັນປະທານຂອງ ທ່ານ ນາງ ບັງອອນ ໄຊຍະສິດ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ, ເຂົ້າຮ່ວມມີ ທ່ານ ນາງ ກ້ອນແກ້ວ ຫຼວງໄຊມຸງຄຸນ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ພ້ອມດ້ວຍບັນດາ ທ່ານ ຄະນະປະຈໍາສະພາປະຊາຊົນແຂວງ, ຫົວໜ້າ-ຮອງຫົວໜ້າແນກການ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.

ຈຸດປະສົງ: ຂອງກອງປະຊຸມແມ່ນຕິດຕາມກວດກາ, ເກັບກໍາຂໍ້ມູນກ່ຽວກັບການຈັດຕັ້ງປະຕິບັດຍຸດທະສາດການປົກປ້ອງສັງຄົມແຫ່ງຊາດ ໂດຍລົງເລິກ 3 ວຽກງານຄື: ວຽກງານປະກັນສຸຂະພາບ, ປະກັນສັງຄົມ ແລະ ສະຫວັດດີການສັງຄົມຂອງແຂວງ, ເພື່ອກະກຽມເປັນຂໍ້ມູນລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ແລະ ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX.

ກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດວຽກງານຂອງ ພະແນກສາທາລະນະສຸກ, ພະແນກແຮງງານ ແລະ ສະຫວັດດີການ-ສັງຄົມ, ພະແນກອຸດສາຫະກຳ ແລະ ການຄ້າ, ພະແນກກຳສິກຳ ແລະ ປ່າໄມ້, ຫ້ອງການປະກັນສຸຂະພາບ, ຫ້ອງການປະກັນສັງຄົມ…; ຈາກນັ້ນ, ປະທານກອງປະຊຸມ ພ້ອມດ້ວຍຄະນະຜູ້ແທນເຂົ້າຮ່ວມກອງປະຊຸມໄດ້ມີຄໍາຖາມເຈາະຈີ້ມທີ່ເຫັນວ່າມີຄວາມສົນໃຈ, ບັນດາພະແນກການ ແລະ ຂະແໜງທີ່ກ່ຽວຂ້ອງ ກໍໄດ້ຜັດປ່ຽນກັນອະທິບາຍຊີ້ແຈງຕໍ່ຄໍາຖາມເຈາະຈີ້ມ ດ້ວຍບັນຍາກາດອັນຟົດຟຶ້ນ ເຊິ່ງສະແດງເຫັນເຖິງ ຂໍ້ສະດວກ, ຂໍ້ຄົງຄ້າງ ໃນການຈັດຕັ້ງປະຕິບັດວຽກງານຜ່ານມາ.

ໃນຕອນທ້າຍ ທ່ານ ນາງ ບັງອອນ ໄຊຍະສິດ ໄດ້ມີຄໍາເຫັນໂອ້ລົມ ແລະ ກ່າວສະແດງຄວາມຊົມເຊີຍຕໍ່ພະແນກການ, ຂະແໜງການທີ່ກ່ຽວຂ້ອງທີ່ໄດ້ສະໜອງຂໍ້ມູນເນື້ອໃນຮອບດ້ານໃຫ້ກອງປະຊຸມຄັ້ງນີ້ເຊິ່ງເປັນພຶ້ນຖານອັນລະອຽດໃນການກະກຽມຂໍ້ມູນລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ແລະ ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX, ໃນຕໍ່ໜ້າໃຫ້ຮັບປະກັນຄວາມຖືກຕ້ອງ ແລະ ສອດຄ່ອງຕາມລະບຽບກົດໝາຍ.