(ສພຊ) ຄະນະບໍລິຫານງານພັກ ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມ ກາງສະໄໝທີ II ຂອງຕົນຂຶ້ນ ໃນວັນທີ 11 ກໍລະກົດ 2023 ທີ່ຫ້ອງປະຊຸມຂອງກະຊວງດັ່ງກ່າວ ໂດຍການເຂົ້າຮ່ວມຂອງສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ; ມີສະຫາຍ ບັນດິດ ສຈ. ບໍ່ວຽງຄໍາ ວົງດາລາ ກໍາມະການສູນກາງພັກ ເລຂາຄະນະພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ສະຫາຍ ທອງຈັນ ໂຂງພູມຄຳ ຮອງຫົວໜ້າຄະນະຈັດຕັ້ງສູນກາງພັກ, ບັນດາສະຫາຍ ຄະນະບໍລິຫານງານພັກກະຊວງ, ຄະນະຮັບຜິດຊອບຈາກສູນກາງພັກ ແລະ ບັນດາສະຫາຍຜູ້ແທນກອງປະຊຸມເຂົ້າຮ່ວມ.

ໃນກອງປະຊຸມ, ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ກ່າວວ່າ: ກອງປະຊຸມຄົບຄະນະບໍລິຫານງານພັກກະຊວງ ກາງສະໄໝທີ II ໄດ້ແບ່ງເປັນ 3 ວາລະຄື: 1) ກອງປະຊຸມທາບທາມຄວາມໄວ້ວາງໃຈ ຕໍໍ່ການນໍາພາລວມ ແລະ ບຸກຄົນໃນຄະນະບໍລິຫານງານພັກກະຊວງ ກາງສະໄໝທີ II, 2) ດໍາເນີນກອງປະຊຸມເປີດກວ້າງ, 3) ດໍາເນີນກອງປະຊຸມພາຍໃນ (ດໍາເນີນຊີວິດການເມືອງ). ຈາກນັ້ນ, ສະຫາຍ ຍັງໄດ້ຮຽກຮ້ອງມາຍັງບັນດາສະຫາຍຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບ, ເສີມຂະຫຍາຍສິດປະຊາທິປະໄຕຂອງຕົນ ສຸມສະຕິປັນຍາເຂົ້າໃສ່ການຄົ້ນຄວ້າ, ສະແດງທັດສະນະ, ຄວາມຄິດຄຳເຫັນ ໃຫ້ເລິກເຊິ່ງ, ພາວະວິໄສ ແລະ ກົງໄປກົງມາ ຕໍ່ການຊີ້ນຳ-ນຳພາລວມ ຂອງອົງຄະນະພັກ ແລະ ບັນດາສະຫາຍກຳມະການພັກກະຊວງ ທີ່ຊີ້ນຳຢູ່ແຕ່ລະຂົງເຂດວຽກງານ ເພື່ອເຮັດໃຫ້ຜົນຂອງການທາບທາມຄວາມໄວ້ວາງໃຈໃນຄັ້ງນີ້ ຖືກຕ້ອງກັບສະພາບຄວາມເປັນຈິງ ແລະ ບັນລຸຜົນສຳເລັດຕາມລະດັບຄາດໝາຍ.

ໂອກາດດັ່ງກ່າວ ກອງປະຊຸມ ຍັງໄດ້ຮັບຟັງຄໍາເຫັນຊີ້ນຳຂອງສະຫາຍ ປອ. ໄຊສົມພອນ ພົມວິຫານ ເຊິ່ງສະຫາຍ ໄດ້ເນັ້ນຫຼາຍບັນຫາສໍາຄັນຄື:

ໜຶ່ງ: ຄວາມໝາຍສຳຄັນຂອງກອງປະຊຸມທາບທາມຄວາມໄວ້ວາງໃຈກາງສະໄໝ ຕໍ່ຄະນະພັກແຕ່ລະຂັ້ນ ການຈັດໃຫ້ມີການທາບທາມ ຫຼື ປະກອບຄໍາເຫັນຕໍ່ຄະນະພັກຄັ້ງນີ້ ແມ່ນເປັນການເປີດກວ້າງປະຊາທິປະໄຕພາຍໃນພັກ ໂດຍສະເພາະແມ່ນພາຍໃນພະນັກງານຫຼັກແຫຼ່ງຂອງແຕ່ລະອົງຄະນະພັກ ເພື່ອໃຫ້ປະກອບຄວາມເຫັນຕໍ່ຄວາມຮັບຜິດຊອບ ລວມ ກໍຄືຄວາມຮັບຜິດຊອບໜ້າທີ່ການເມືອງຂອງແຕ່ລະສະຫາຍໃນຄະນະພັກ ແນໃສ່ປັບປຸງຄະນະພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ແລະ ມີຄວາມເປັນເອກະພາບສູງ ເພື່ອສືບຕໍ່ເປັນຫຼັກແຫຼ່ງນຳພາປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍຄືກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງ ໃຫ້ບັນລຸຕາມລະດັບຄາດໝາຍທີ່ວາງໄວ້;

ສອງ: ຈຸດປະສົງຂອງກອງປະຊຸມທາບທາມຄວາມໄວ້ວາງໃຈຕໍ່ຄະນະພັກ ເພື່ອໃຫ້ບັນດາສະຫາຍທີ່ເຂົ້າຮ່ວມການທາບທາມພ້ອມກັນເບິ່ງ ແລະ ມີຄວາມເຫັນຕີລາຄາບັນຫາຕ່າງໆທີ່ພົວພັນເຖິງຄຸນລັກສະນະ, ມາດຕະຖານຂອງພະນັກງານນໍາພາ-ຄຸ້ມຄອງ ເປັນຕົ້ນແມ່ນດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຈັນຍາບັນ, ຄວາມຮັບຜິດຊອບການເມືອງແບບແຜນນຳພາ, ວິທີເຮັດວຽກ, ຄວາມຮູ້ ຄວາມສາມາດໃນການປະຕິບັດໜ້າທີ່, ແບບແຜນການດໍາລົງຊີວິດຄວາມສັດຊື່ບໍລິສຸດ ຫຼື ການສວຍໃຊ້ໜ້າທີ່ຕໍາແໜ່ງບໍ່ຖືກຕ້ອງ, ການພົວພັນໃນສັງຄົມ, ທັດສະນະມະຫາຊົນ, ຄວາມຈິງໃຈຮັບເອົາຄໍາຄິດຄໍາເຫັນ, ຄໍາສະເໜີສົ່ງຂ່າວຂອງໝູ່ຄະນະຂອງສະມາຊິກພັກ, ພະນັກງານ ກໍຄືປະຊາຊົນໃນໄລຍະຜ່ານມາ ແລະ ອື່ນໆ;

ສາມ: ຈຸດຢືນທີ່ຕ້ອງເອົາໃຈໃສ່ໃນການປະກອບຄໍາເຫັນ ແລະ ໃຫ້ຄໍາເຫັນໄວ້ວາງໃຈ ຫຼື ບໍ່ໄວ້ວາງໃຈຕໍ່ແຕ່ລະສະຫາຍໃນຄະນະບໍລິຫານງານພັກ ການເບິ່ງບັນຫາ ແລະ ຕີລາຄາຄວາມຮັບຜິດຊອບລວມຂອງຄະນະພັກ ແລະ ຄວາມຮັບຜິດຊອບໜ້າທີ່ການເມືອງຂອງແຕ່ລະສະຫາຍໃນຄະນະບໍລິຫານງານພັກ ຕ້ອງບົນພື້ນຖານແນວທາງ ແລະ ຫຼັກການຂອງພັກ, ເບິ່ງ ແລະ ຕີລາຄາລົງເລິກການປະຕິບັດບັນດາຄາດໝາຍລວມ ກໍຄືຄາດໝາຍແຕ່ລະຂົງເຂດວຽກງານໃນຂະແໜງການທີ່ກອງປະຊຸມໃຫຍ່ ຄັ້ງທີ II ຂອງອົງຄະນະພັກວາງອອກ ຕ້ອງເບິ່ງຢ່າງຮອບຄອບ, ຖີ່ຖ້ວນ, ພາວະວິໄສ, ເລິກເຊິ່ງແທດເຖິງ, ຖືກຕ້ອງຕາມຄວາມເປັນຈິງ ທັງດ້ານດີ-ຜົນສໍາເລັດ, ດ້ານອ່ອນ-ຂໍ້ຄົງຄ້າງ ຫຼື ຂາດຕົກບົກຜ່ອງ ເພາະວ່າບັນຫາເຫຼົ່ານັ້ນ ເປັນເນື້ອໃນພື້ນຖານ ຫຼື ເປັນໄມ້ຫຼາວັດແທກສໍາລັບການລົງຄໍາເຫັນໃຫ້ຄວາມໄວ້ວາງໃຈ ຫຼື ບໍ່ໄວ້ວາງໃຈຕໍ່ແຕ່ລະສະຫາຍໃນຄະນະພັກ.