ໃນວັນທີ 16 ກັນຍາ 2024 ທ່ານ ປອ. ເກດແກ້ວ ສີຫາລາດ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ການຈັດຕັ້ງກໍ່ສ້າງ, ບູລະນະສ້ອມແປງ ເສັ້ນທາງ ແລະ ການພັດທະນາຂະຫຍາຍໂຄງລ່າງພື້ນຖານທີ່ຈໍາເປັນເຊື່ອມຈອດເຂົ້າສູ່ແລວທາງເສດຖະກິດ ຢູ່ແຂວງຄໍາມ່ວນ.
ໂອກາດດັ່ງກ່າວ, ທ່ານ ປອ. ເກດແກ້ວ ສີຫາລາດ ພ້ອມຄະນະ ໄດ້ເຂົ້າພົບ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ເພື່ອແຈ້ງຈຸດປະສົງໃນການເຄື່ອນໄຫວເຮັດວຽກໃນຄັ້ງນີ້; ຈາກນັ້ນ, ໄດ້ຈັດກອງປະຊຸມການຕິດຕາມກວດກາ ການຈັດຕັ້ງກໍ່ສ້າງ, ບູລະນະສ້ອມແປງ ເສັ້ນທາງ ແລະ ການພັດທະນາຂະຫຍາຍໂຄງລ່າງພື້ນຖານທີ່ຈໍາເປັນເຊື່ອມຈອດເຂົ້າສູ່ແລວທາງເສດຖະກິດ, ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໂດຍການເປັນປະທານຂອງ ທ່ານ ປອ. ເກດແກ້ວ ສີຫາລາດ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດ, ໂດຍການເຂົ້າຮ່ວມມີ ທ່ານ ນາງ ບັງອອນ ໄຊຍະສິດ ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ຮອງປະທານສະພາປະຊາຊົນຂັ້ນແຂວງ, ມີປະທານ/ຮອງປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນຂັ້ນແຂວງ, ຫົວໜ້າກົມ, ກົມຂົວທາງ ກະຊວງໂຍທາທິການ ແລະ ຂົນສົ່ງ, ບັນດາພະແນກການທີ່ກ່ຽວຂ້ອງຂອງແຂວງ ແລະ ແຂກຖືກເຊີນເຂົ້າຮ່ວມ.
ກອງປະຊຸມໄດ້ຮັບຟັງການລາຍງານຂອງບັນດາພະແນກການທີ່ກ່ຽວຂ້ອງຄື: ພະແນກໂຍທາທິການ ແລະ ຂົນສົ່ງແຂວງ, ພະແນກແຜນການ ແລະ ການລົງທຶນແຂວງ, ພະແນກພະລັງງານ ແລະບໍ່ແຮ່ແຂວງ, ພະແນກການເງິນແຂວງ ແລະ ພາກສ່ວນຂອງສະມາຄົມຂົນສົ່ງ ແລະ ຈັດສົ່ງສິນຄ້າ-ໂດຍສານ ແຂວງຄໍາມ່ວນ. ພາຍຫຼັງໄດ້ຮັບຟັງການລາຍງານຈາກບັນດາພະແນກການ ແລະ ພາກສ່ວນທີ່ກ່ຽວຂ້ອງເຊິ່ງໄດ້ຍົກໃຫ້ເຫັນດ້ານດີ, ແລະ ຂໍ້ຄົງຄ້າງກ່ຽວກັບການຈັດຕັ້ງປະຕິບັດວຽກງານຜ່ານມາ ທ່ານ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະຕິດຕາມ ກໍ່ໄດ້ແລກປ່ຽນຄໍາຄິດ-ຄໍາເຫັນ ແລະ ມີຄໍາຊັກຖາມເຈາະຈີ້ມທີ່ມີຄວາມສົນໃຈໂດຍກົງຕໍ່ກັບພະແນກການເພື່ອເປັນຂໍ້ມູນຮອບດ້ານນຳໄປຄົ້ນຄວ້າຊຸກຍູ້ການຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິພາບ ແລະ ປະສິດທິຜົນ; ຈາກນັ້ນຄະນະໄດ້ສືບຕໍ່ລົງຕິດຕາມກວດກາພາກສະໜາມເສັ້ນທາງຫຼວງແຫ່ງຊາດ ເລກທີ 11 ( ເມືອງທ່າແຂກ-ເມືອງໜອງບົກ ) ແລະ ເສັ້ນທາງເມືອງບົວລະພາ.
ຈຸດປະສົງໃນການເຄື່ອນໄຫວຕິດຕາມ, ກວດກາ ແລະ ຊຸກຍູ້ວຽກງານຄັ້ງນີ້: ເພື່ອຕິດຕາມ, ກວດກາເກັບກຳຂໍ້ມູນຕົວຈິງ ໃນການຈັດຕັ້ງປະຕິບັດງົບປະມານລົງທຶນປີ 2024 ເຂົ້າໃນການກໍ່ສ້າງ ແລະ ສ້ອມແປງບັນດາໂຄງການພັດທະນາໂຄງລ່າງພຶ້ນຖານທີ່ຈໍາເປັນ, ເປັນຕົ້ນ: ດ່ານສາກົນ, ເສັ້ນທາງ, ຂົວຕາມເສັ້ນທາງສາຍຫຼັກໃນການເຊື່ອມຈອດ ແລະ ການອຳນວຍຄວາມສະດວກດ້ານການຂົນສົ່ງສິນຄ້າ, ໂດຍສານ ແລະ ເກັບກໍາຂໍ້ມູນຂອງສະມາຄົມລົດຂົນສົ່ງພາຍໃນແຂວງ, ທັງນີ້ກໍ່ເພື່ອເສີມຂະຫຍາຍ, ຊຸກຍູ້ສົ່ງເສີມໃນການຈັດຕັ້ງວຽກງານດັ່ງກ່າວ ໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມ ແຕ່ລະໄລຍະ, ພ້ອມນັ້ນ, ເພື່ອລາຍງານຜົນການຕິດຕາມກວດກາ ຕໍ່ກອງປະຊຸມຄະນະປະຈໍາສະພາແຫ່ງຊາດ ແລະ ກອງປະຊຸມສະໄໝມັນເທື່ອທີ 8 ຂອງສະພາແຫ່ງຊາດຊຸດທີ IX ທີ່ຈະມາເຖິງນີ້.
ທ່ານ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ຈະໄດ້ສືບຕໍ່ເຄື່ອນໄຫວຕິດຕາມ, ກວດກາ ແລະ ຊຸກຍູ້ວຽກງານ ທີ່ດ່ານສາກົນນາເພົ້າ ເມືອງບົວລະພາ ແຂວງຄໍາມ່ວນ.