(ສພຊ) ທ່ານ ຮສ. ປອ. ລິນຄໍາ  ດວງສະຫວັນ ກຳມະການສໍາຮອງສູນກາງພັກ, ຄະນະປະຈໍາສະພາແຫ່ງຊາດ, ປະ ທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ແລະ ທ່ານ ໄຊຄໍາ ອຸ່ນມີໄຊ ຮອງປະທານຄະ ນະກວດກາສູນກາງພັກ, ຮອງປະທານອົງການກວດກາແຫ່ງລັດ ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 1 ນະຄອນຫຼວງວຽງຈັນ ພ້ອມດ້ວຍຄະນະ ໂດຍມີກົມຄຸ້ມຄອງບໍ່ແຮ່, ກະຊວງພະລັງງານ ແລະ ບໍ່ແຮ່ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກົດໝາຍ ແລະ ມະຕິຂອງສະພາແຫ່ງຊາດ ກ່ຽວກັບບັນດາໂຄງການທົດລອງຂຸດຄົ້ນແຮ່ທາດ ແລະ ການຊຸກຍູ້ສົ່ງເສີມການຜະລິດທີ່ສໍາຄັນເພື່ອຫຼຸດຜ່ອນການນໍາເຂົ້າ ຢູ່ແຂວງໄຊສົມບູນ ໃນລະຫວ່າງວັນທີ 24-26 ມັງກອນ 2024.

ການລົງເຄື່ອນໄຫວຕິດຕາມກວດກາຊຸກຍູ້ການຈັດຕັ້ງປະຕິບັດກົດໝາຍ ແລະ ມະຕິຂອງສະພາແຫ່ງຊາດໃນຄັ້ງນີ້, ທ່ານ ຮສ. ປອ. ລິນຄໍາ ດວງສະຫວັນ ພ້ອມດ້ວຍຄະນະ ໄດ້ເຂົ້າພົບທ່ານເຈົ້າແຂວງໆໄຊສົມບູນ ເພື່ອລາຍງານຈຸດປະສົງ ໃນການລົງເຄື່ອນໄຫວເຮັດວຽກຢູ່ພາຍໃນແຂວງ; ພ້ອມກັນນັ້ນ, ກໍໄດ້ຈັັດກອງປະຊຸມເຮັດວຽກຮ່ວມກັບສະພາປະຊາ ຊົນແຂວງ (ສພຂ) ແລະ ພະແນກການທີ່ກ່ຽວຂ້ອງຂອງແຂວງຄື: ແຜນການ ແລະ ການລົງທຶນ, ຊັບພະຍາກອນທຳມະ ຊາດ ແລະ ສິ່ງແວດລ້ອມ, ພະລັງງານ ແລະ ບໍ່ແຮ່, ກະສິກຳ ແລະ ປ່າໄມ້, ອຸດສາຫະກຳ ແລະ ການຄ້າ, ພະແນກການເງິນ, ແລະ ຕາງໜ້າບໍລິສັດຈຳນວນໜຶ່ງ ເພື່ອຮັບຟັງການລາຍງານກ່ຽວກັບການຈັດຕັ້ງປະຕິບັດໂຄງການທົດລອງຂຸດຄົ້ນແຮ່ທາດ ຕາມຂໍ້ຕົກລົງຂອງທ່ານນາຍົກລັດຖະມົນຕີ ວ່າດ້ວຍການອະນຸຍາດການຂຸດຄົ້ນແຮ່ທາດແບບທົດລອງ ສະບັບເລກທີ 61/ນຍ, ລົງວັນທີ 21/6/2021 ແລະ ການຈັດຕັ້ງປະຕິບັດບັນດາມະຕິຂອງສະພາແຫ່ງຊາດ ບົນພື້ນຖານການແລກປ່ຽນຄໍາຄິດຄໍາເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີທີ່ຄວນເສີມຂະຫຍາຍ ແລະ ດ້ານອ່ອນຂໍ້ຄົງຄ້າງທີ່ຕ້ອງໄດ້ຊອກຫາວິທີແກ້ໄຂ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.

ຜ່ານການຮັບຟັງການລາຍງານ, ທ່ານ ຮສ. ປອ. ລິນຄໍາ ດວງສະຫວັນ ໃນນາມປະທານກອງປະຊຸມ ໄດ້ມີຄໍາເຫັນຊີ້ ນໍາໃຫ້ພາກສ່ວນທີ່ກ່ຽວຂ້ອງ ສືບຕໍ່ຈັດຕັ້ງປະຕິບັດວຽກງານທີ່ຢູ່ໃນຄວາມຮັບຜິດຊອບຂອງຕົນ ໂດຍໃຫ້ມີສ່ວນຮ່ວມ ແລະ ເປັນເຈົ້າການຊຸກຍູ້ການຜະລິດເປັນສິນຄ້າເພື່ອຫຼຸດຜ່ອນການນໍາເຂົ້່າ, ບັນຫາທີ່ສຳຄັນ ຕ້ອງກຳນົດບຸລິມະສິດ ແລະ ທ່າແຮງໃນແຕ່ລະຂົງເຂດພາຍໃນແຂວງ ເປັນຕົ້ນ: ວຽກງານແຮ່ທາດ: ຮີບຮ້ອນປະເມີນຜົນການຈັດຕັ້ງປະຕິບັດໂຄງການທົດລອງຂຸດຄົ້ນແຮ່ທາດ ທີ່ກໍາລັງຈັດຕັ້ງປະຕິບັດຢູ່ພາຍໃນແຂວງ ໃຫ້ມີປະສິດທິພາບ, ປະສິດທິຜົນ, ຍືນຍົງ ພ້ອມທັງມີມາດຕະການຢ່າງເຂັ້ມງວດຕໍ່ໂຄງການທີ່ບໍ່ມີປະສິດທິຜົນ ຄວນໂຈະ ແລະ ໂຄງການໃດທີ່ມີປະສິດທິຜົນ ຄວນສືບຕໍ່ຈັດຕັ້ງປະຕິບັດໃຫ້ສໍາເລັດ ໂດຍຫັນເຂົ້າສູ່ການດຳເນີນໂຄງການແບບປົກກະຕິ; ການຄົ້ນຄວ້າອະນຸມັດໂຄງການຂຸດຄົ້ນແຮ່ທາດໃນຕໍ່ໜ້າ ຕ້ອງໃຫ້ສອດຄ່ອງກັບຍຸດທະສາດການພັດທະນາແຮ່ທາດທີ່ສະພາແຫ່ງຊາດໄດ້ຮັບຮອງໃນກອງປະຊຸມສະ ໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ແລະ ແຈ້ງການຂອງຄະນະເລຂາທິການສະພາແຫ່ງຊາດ ກ່ຽວກັບການພິຈາລະນາການອະນຸມັດໂຄງການຂຸດຄົ້ນແຮ່ທາດ ສະບັບເລກທີ 647/ຄລສ, ລົງວັນທີ 27 ທັນວາ 2023. ວຽກງານອຸດສາຫະກຳ ແລະ ການຄ້າ: ສືບຕໍ່ຊຸກຍູ້ສົ່ງເສີມການຜະລິດປຸງແຕ່ງສິນຄ້າເພື່ອສົ່ງອອກຜະລິດຕະພັນສໍາເລັດຮູບຕ່າງໆໃຫ້ມີຄວາມຄ່ອງຕົວ. ວຽກງານກະສິກໍາ ແລະ ປ່າໄມ້: ເອົາໃຈໃສ່ຄົ້ນຄວ້າ, ປັບປຸງ ນະໂຍບາຍ ແລະ ນິຕິກຳ ກ່ຽວກັບການສົ່ງເສີມວຽກງານການຟື້ນຟູ ແລະ ປູກໄມ້ ໂດຍການມີສ່ວນຮ່ວມລະຫວ່າງພາກລັດ, ຜູ້ປະກອບການ ແລະ ປະ ຊາຊົນ ໃຫ້ມີຄວາມຊັດເຈນ ແລະ ຮັດກຸມ; ສ້າງແຜນຟື້ນຟູປ່າ, ປູກໄມ້ທົດແທນ ແລະ ປົກປັກຮັກສາໃນແຕ່ລະຂົງເຂດ ເພື່ອໃຫ້ສອດຄ່ອງກັບແຜນແມ່ບົດຈັດສັນທີ່ດິນແຫ່ງຊາດ ທີ່ກຳນົດໃຫ້ມີເນື້ອທີ່ປ່າປົກຫຸ້ມກວມ 70%; ສຸມໃສ່ຕິດຕາມ, ກວດກາ ແລະ ສັງລວມການປະຕິບັດພັນທະຕ່າງໆກ່ຽວກັບວຽກງານຟື້ນຟູປ່າໄມ້ ແລະ ປູກໄມ້ທົດແທນ ຕາມສັນຍາສຳປະທານ, ກົດໝາຍ, ມະຕິສະພາແຫ່ງຊາດ ແລະ ນິຕິກຳອື່ນທີ່ກ່ຽວຂ້ອງ ຂອງບັນດາໂຄງການກໍ່ສ້າງເຂື່ອນໄຟຟ້າ, ບໍ່ແຮ່, ໂຄງລ່າງພື້ນຖານ ທີ່ໄດ້ຮັບອະນຸຍາດຈາກລັດຖະບານໃນໄລຍະຜ່ານມາ ແລະ ຊຸກຍູ້ສົ່ງເສີ່ມການຜະລິດ, ຫຼຸດຜ່ອນການ ນໍາເຂົ້າພາຍໃນທີ່ເປັນບຸລິມະສິດ ແລະ ທ່າແຮງຂອງແຂວງ. ວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ: ​ສືບ​ຕໍ່ເອົາ​ໃຈ​ໃສ່ສຳ​ຫຼວດ, ວັດ​ແທກ, ຂຶ້ນ​ທະບຽນ​ອອກ​ໃບ​ຕາດິນ ແລະ ການຈັດສັນທີ່ດິນ ໃຫ້​​ບັນລຸ​ຕາມ​ແຜນການ​ທີ່​ວາງ​ໄວ້ ​ພ້ອມທັງສືບຕໍ່ຜັນຂະຫຍາຍແຜນແມ່ບົດຈັດສັນທີ່ດິນແຫ່ງຊາດ ແລະ ແຜນຈັດສັນທີ່ດິນ, ຄຸ້ມຄອງຊັບພະຍາ ກອນທໍາມະຊາດ ແລະ ສິ່ງແວດລ້ອມຂັ້ນແຂວງ ໂດຍຕິດພັນກັບການຊຸກຍູ້ຢ່າງແຂງແຮງໃນການຈັດຕັ້ງຜັນຂະຫຍາຍກົດໝາຍວ່າດ້ວຍທີ່ດິນ ເຂົ້າສູ່ຊິວິດຕົວຈິງຂອງສັງຄົມໃຫ້ທົ່ວເຖິງ ແລະ ມີຜົນສັກສິດ; ສືບ​ຕໍ່​ຕິດຕາມຢ່າງ​ໃກ້ຊິດ​ບັນຫາຜົນ​ກະທົບຕໍ່່ສິ່ງແວດລ້ອມ ສັງຄົມ ແລະ ທໍາມະຊາດ ​ທີ່​ອາດ​ຈະ​ເກີດ​ຂຶ້ນ​ຈາກ​ໂຄງການ​ພັດທະນາ​ຕ່າງໆ ​ເຊັ່ນ: ​ໂຄງການ​ພັດ ທະນາ​ໄຟຟ້າ, ​ໂຄງການ​ຂຸດ​ຄົ້ນ​ແຮ່ທາດ, ​ໂຄງການ​ພັດທະນາ​ພື້ນຖານ​ໂຄງ​ລ່າງອື່ນໆ.

ຫຼັງຈາກນັ້ນ, ຄະນະຍັງໄດ້ເດີນທາງໄປເບິ່ງເຂດພື້ນທີ່ຕົວຈິງຂອງໂຄງການຂຸດຄົ້ນແຮ່ເຫຼັກຢູ່ເມືອງລ້ອງແຈ້ງ 3 ໂຄງ ການຄືື: ໂຄງການຂຸດຄົ້ນ ແລະ ປຸງແຕ່ງແຮ່ທາດ ຂອງບໍລິສັດ ສີສະເກດ ຂຸດຄົ້ນ ປຸງແຕ່ງ ແລະ ສົ່ງອອກແຮ່ເຫຼັກ ຈໍາກັດ, ບໍລິສັດ ອຸດົມຊັບ ຈໍາກັດຜູ້ດຽວ, ແລະ ບໍລິສັດ ເອທີໂອໂຕ ຈໍາກັດຜູ້ດຽວ.

ໃນໄລຍະທີ່ຄະນະລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານຢູ່ແຂວງໄຊສົມບູນ, ທ່ານປະທານ ກສຕສ ໃນນາມຫົວໜ້າຄະນະ ໄດ້ມອບເຄື່ອງຄອມພິວເຕີຕັ້ງໂຕະ 1 ໜ່ວຍ ແລະ ຄອມພິວເຕີໂນດບຸກ 1 ໜ່ວຍ ທີ່ໄດ້ຮັບຈາກກອງທຶນຊ່ວຍເຫຼືອສັງຄົມ ຂອງສະພາແຫ່ງຊາດ ໃຫ້ແກ່ ສພຂ ໄຊສົມບູນ ເພື່ອປະກອບສ່ວນເຂົ້າໃນການປະຕິບັດວຽກງານໃຫ້ມີຄວາມສະດວກ ແລະ ວ່ອງໄວຂຶ້ນຕື່ມ.